ماماندار سالىق تۇسىمدەرى مەن الەۋمەتتىك اۋدارىمداردى جيناۋ پروتسەسىندە وڭ اسەرلەر بارىن العا تارتتى. نەگىزگى قيىندىقتاردى دا اتاپ ءوتتى.
فورۋمدا ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ولجاس انافين بىلتىر مەملەكەتتىك كىرىستەر كوميتەتى Yandex Qazaqstan-مەن بىرلەسىپ, تاكسي جۇرگىزۋشىلەرىنە ارنالعان پلاتفورمالىق جۇمىسپەن قامتۋ بويىنشا پيلوتتىق جوبا ىسكە قوسقانىن ايتتى. اتالعان جوبا ارقىلى تاكسي جۇرگىزۋشىلەرى استانا جانە الماتى قالالارىندا Yandex go قوسىمشاسى ارقىلى قىزمەت كورسەتەدى.
«ياندەكس تاكسي نارىقتا ءبىرىنشى بولىپ ءوز جۇيەلەرىن ينتەگراتسيالاپ, 1 قىركۇيەكتەن باستاپ جاڭا مەحانيزم بويىنشا جۇمىس ىستەي باستادى. ارينە, قيىندىقتار بار, بىراق جۇمىس ءجۇرىپ جاتىر. الدا باسقا دا پلاتفورمالاردىڭ وسى جوباعا قاتىسۋىن كۇتەمىز», دەدى ولجاس انافين.
ياندەكس تاكسيدىڭ پلاتفورمالىق جۇمىسپەن قامتۋدى دامىتۋ جونىندەگى ديرەكتورى ناتاليا موسكۆيتينانىڭ سوزىنشە, بۇگىندە جوبا شەڭبەرىندە جەكە كاسىپكەر رەتىندە 36 مىڭ جۇرگىزۋشى تىركەلگەن. بيىل 1 قىركۇيەكتەن باستاپ كومپانيا الەۋمەتتىك جانە سالىق كودەكستەرىنە ەنگىزىلگەن جاڭا تۇزەتۋلەرگە سايكەس, ورىنداۋشى سالىق اگەنتى اتاندى. وسى كەزەڭدە جۇرگىزۋشىلەردىڭ اگەنت ارقىلى اۋدارعان سالىقتارى مەن الەۋمەتتىك جارنالارىنىڭ سوماسى 913 ميلليون تەڭگەنى قۇرادى. ال ولاردىڭ جەكە كاسىبى بار جۇرگىزۋشىلەردىڭ تابىسى 46,8 ميلليارد تەڭگەگە جەتكەن.
ء«اربىر جەكە كاسىپكەر رەتىندە تىركەلگەن جۇرگىزۋشى تابىس سالىعىن تولەيدى. سونىمەن قاتار ول وزىنىڭ زەينەتاقى جيناقتارىن قالىپتاستىرادى. قوسىمشا مەديتسينالىق كومەك پەن الەۋمەتتىك قورعاۋعا قول جەتكىزەدى», دەيدى ناتاليا موسكۆيتينا.
سونداي-اق, ن.موسكۆيتينا جەكە كاسىپكەر مارتەبەسى بار جۇرگىزۋشىلەردىڭ e-Salyq Business-تە اۆتوماتتى چەكتەر قۇراتىنىن اتاپ ءوتتى. دەگەنمەن وسى تۇستا باستى كەدەرگىلەردىڭ ءبىرى ەلەكتروندىق قۇجات اينالىمى (ەدو) بولىپ وتىر. اتالعان ماسەلە جۇرگىزۋشىلەر مەن سەرۆيس سەرىكتەستەرى ءۇشىن دە, پلاتفورمانىڭ ءوزى ءۇشىن دە كوپتەگەن سۇراقتار مەن قيىندىقتار تۋدىرىپ وتىر.
«قۇجاتتارعا قاشىقتان قول قويۋ ءۇشىن ەلەكتروندىق شوت-فاكتۋرالاردىڭ اقپاراتتىق جۇيەدە تىركەۋ قاجەت. بۇنداي تىركەۋدى جەكە كومپيۋتەر ارقىلى عانا ورىنداۋعا بولادى. ءبىز زەرتتەۋ جۇرگىزدىك. وسى تۇرعىدا جۇرگىزۋشىلەردىڭ 70%-ى دەربەس كومپيۋتەرگە قول جەتكىزە المايدى», دەپ قوستى ن.موسكۆيتينا.
ياندەكس تاكسي جۇرگىزۋشىسى ءارى سەرىكتەسى نۇرلان بەيسەمباەۆ ەدو-مەن قيىندىقتار تۋىنداپ جاتقانىن راستادى.
«وسى ەلەكتروندىق قۇجاتتاردىڭ كەسىرىنەن جەكە كاسىپكەرلىكتەن كەتكىم كەلەدى. بۇل وتە قيىن ءارى تۇسىنىكسىز. اي سايىن وسى «اتقارىلعان جۇمىس اكتىسىن» جانە «ەلەكتروندىق شوت-فاكتۋراسىن» تۇسىنبەي الاڭدايمىن. بۇل ماعان قيىن. سەبەبى مەن ەسەپشى مامان ەمەس, تاكسي جۇرگىزۋشىسىمىن», دەدى ول.
ماسەلەنى شەشۋ ءۇشىن ياندەكس تاكسي جۇرگىزۋشىلەرگە قاجەتتى قۇجاتتاردى قالىپتاستىرۋعا كومەكتەسەتىن پروۆايدەرلەردى قوستى.
«ەلەكتروندىق قۇجات اينالىمى كۇردەلى جانە ىڭعايسىز قۇرال بولىپ قالا بەرەدى. سوندىقتان ءبىز بۇل پروتسەستى قاراپايىم جانە قولجەتىمدى ەتۋ ارقىلى قايتا قاراۋدى ۇسىنامىز. مىسالى, قۇجات اينالىمىن e-salyq Business-تە ارنايى ءموبيلدى قوسىمشانى پايدالانا وتىرىپ, سالىق رەجيمى شەڭبەرىندە پلاتفورما قوياتىن چەكتەرگە اۋىستىرۋعا بولادى. پلاتفورمامەن اينالىساتىن بىرقاتار ەلدەردە ءدال وسىلاي جۇزەگە اسىرىلدى», دەپ اتاپ ءوتتى ن.موسكۆيتينا.
تاكسي جۇرگىزۋشىلەرىمەن جۇمىس قالاي وزگەردى
الماتى مەملەكەتتىك كىرىستەر دەپارتامەنتى باسشىسىنىڭ ورىنباسارى ايدوس مۇحامەدجانوۆ تاكسوموتورلىق تاسىمالداردى رەتتەۋ ماسەلەسى سالىق ورگاندارىنىڭ نازارىندا بۇرىننان جۇرگەنىن ەكەنىن اتاپ ءوتتى. ايتۋىنشا, اگرەگاتورلار پايدا بولعانعا دەيىن نارىق اشىق بولعان جوق. سول سەبەپتى بۇل تاكسي جۇرگىزۋشىلەرىمەن جۇمىستى قيىنداتتى.
سونداي-اق, ماماننىڭ سوزىنشە, سالىق ورگاندارى الداعى ۋاقىتتا دا باسقا دا پلاتفورمالارمەن ءوزارا ءىس-قيمىلدى جالعاستىرادى.
«نارىقتا 18 پلاتفورما بار. ولار سالىقتى قالاي شەگەرەدى, تىركەۋ تەتىكتەرىن دۇرىس قولدانا ما؟ ءبىز ولاردىڭ جۇمىسىنا تالداۋ جاساعىمىز كەلەدى», دەپ تۇيىندەدى ول.
سالىقتىق اكىمشىلەندىرۋدىڭ بولاشاعى
«تسيفرلىق سالىق تەحنولوگيالارى» جشس باس ديرەكتورى الەنا گەرۋن پلاتفورمالىق جۇمىسپەن قامتۋ ءۇشىن سالىقتىق اكىمشىلەندىرۋدى جەڭىلدەتۋدىڭ ماڭىزدىلىعىن اتاپ ءوتتى. ايتۋىنشا, ەڭ نەگىزگى شەشىمدەردىڭ ءبىرى – دەكلاراتسياسىز سالىق رەجيمدەرىن ەنگىزۋ.
«الگوريتمدەر نەعۇرلىم قاراپايىم بولسا, سوعۇرلىم كوپ ينتەرنەت-پلاتفورمالار جوباعا قوسىلعىسى كەلەدى. ءبىز مۇنى ياندەكس تاكسيمەن باستاعان پيلوتتىق جوبادان دا كورىپ وتىرمىز», دەپ قوستى ا.گەرۋن.
سالىق ساراپشىسى دميتري كازانتسەۆ تە وسى تۇستا سالىقتى اكىمشىلەندىرۋدەگى وزگەرىستەردىڭ ماڭىزدىلىعىن ايتا كەتتى.
«ەگەر سالىقتار پلاتفورمالاردا نەمەسە بيۋدجەتكە اۋدارىلسا, ءبارى ايقىن تۇردە تولەنەتىن اشىق جۇيەنى كورەمىز. بۇل ادال باسەكەلەستىكتى تۋدىرىپ, بيزنەستەگى كەدەرگىلەردى جويادى. مۇنى جۇزەگە اسىرۋ ءۇشىن ۇكىمەت دەڭگەيىندەگى باتىل شەشىمدەر قاجەت», دەپ قوستى د.كازانتسەۆ.
ساراپشى ءىس جۇزىندە جۇمىس ىستەيتىن تەتىكتەردى ازىرلەۋ ءۇشىن ۇكىمەتتى بيزنەس قاۋىمداستىعىمەن بەلسەندى ديالوگ قۇرۋعا شاقىرادى.
ء«بىر جىل قالدى. ۇكىمەت كاسىپكەرلەر مەن ساراپشىلاردىڭ ۇسىنىستارىنا نازار اۋدارادى دەپ سەنەمىن. سوندا ءبىز سالىق جيناۋدىڭ ايتارلىقتاي وسۋىنە اكەلەتىن بيۋروكراتيالىق قاراپايىم شەشىمدەردى تەز قابىلداي الامىز», دەپ قورىتىندىلادى دميتري كازانتسەۆ.
Primeminister.kz سايتىنىڭ رەداكتسياسى وتانداستارىمىزدىڭ ءومىر ءسۇرۋ ساپاسىن جاقسارتۋعا جانە ەلىمىزدىڭ ۇزاقمەرزىمدى الەۋمەتتىك-ەكونوميكالىق ماقساتتارىن ىسكە اسىرۋعا باعىتتالعان بيىلعى جىلدىڭ ماڭىزدى باستامالارى مەن جەتىستىكتەرى تۋرالى شولۋلار سەرياسىن جاريالايدى.
2024 جىلدىڭ 1 قىركۇيەگىنەن باستاپ قازاقستاندا ينتەرنەت-پلاتفورمالاردا جۇمىس ىستەيتىن ادامدار ەڭ تومەنگى الەۋمەتتىك كەپىلدىكپەن قامتىلدى. جەكە كاسىپكەرلەر ءۇشىن e-salyqBusiness قوسىمشاسى ارقىلى الەۋمەتتىك تولەم مولشەرلەمەلەرىن 4%-عا دەيىن تومەندەتۋ جانە ينتەرنەت-پلاتفورما وپەراتورلارىن سالىق اگەنتتەرى رەتىندە تانۋ ارقىلى جاعدايلار جەڭىلدەتىلدى. بۇل وپەراتورلارعا جەكە كاسىپكەرلەر اتىنان جەكە تابىس سالىعى مەن الەۋمەتتىك تولەمدەردى تولەۋ مىندەتىن جۇكتەيدى. «ياندەكس.تاكسي» كومپانياسىمەن جۇزەگە اسىرىلعان پيلوتتىق جوبا شەڭبەرىندە اتالعان ءتاسىل سىناقتان وتكىزىلدى.
