تاريحي تۇلعانىڭ مەرەيتويى اياسىندا وتكىزىلگەن كورمە ۇلتتىق عىلىم اكادەمياسىندا ورنالاسقان ق.ساتباەۆتىڭ مەموريالدى مۋزەيى جانە 1999 جىلى اكادەميك ەسىمىمەن اتالعان Satbayev University تاريحي مۋزەيىمەن بىرلەسىپ ۇيىمداستىرىلدى. اشىلۋ سالتاناتىنا ق.ساتباەۆتىڭ جيەنى, گەولوگيا-مينەرولوگيا عىلىمدارىنىڭ دوكتورى الەكساندر ترەتياكوۆ تا قاتىسىپ, التى جاسىنا دەيىن قاسىندا ەركەلەپ وسكەن اتاسى تۋرالى ەستەلىكتەر تيەگىن اعىتىپ, ومىرلىك ماقساتىن بەلگىلەۋىنە ىقپالى بولعان ۇمىتىلماس تۇلعانى ىقىلاسپەن ەسكە الدى.
ۇلتتىڭ ءبىرتۋار پەرزەنتىنىڭ رۋحىنا تاعزىم جاساپ كەلگەندەر گيپەررەاليست ءمۇسىنشى ايدوس ەسماعامبەتوۆتىڭ «قانىش ساتباەۆ» اتتى سيليكوننان جاساعان تىڭ تۋىندىسىنا بىردەن نازار اۋداردى. اكادەميك قانىش ساتباەۆتىڭ مۇراسى قازاقستاننىڭ عىلىم جانە ءبىلىم تاريحىندا ماڭىزدى ورىن الادى. ەكى ەكسپوزيتسيالىق بولىمنەن تۇراتىن كورمەدە عالىمنىڭ جەكە زاتتارى مەن جەكە مۇراعاتى ۇسىنىلعان. جازۋ ماشىڭكەسى, كىتاپ كارتوتەكاسى, مەملەكەتتىك ناگرادالارى, دومبىراسى, گەولوگ عالىمنىڭ ىزدەنىسىمەن تابىلعان, بىرەگەيلىگىمەن جانە ەرەكشە تۇسىمەن كوز تارتاتىن امەتيست, حولكازين, ۆولفراميت سياقتى تابيعي مينەرال تاستارى, سونداي-اق ق.ساتباەۆتىڭ گەولوگيالىق قازبا جۇمىستارىندا قولدانعان قايلاسى, بالتا, بالعاسى, جەل مەن كۇننىڭ وتىندە ءجۇرىپ اقجەمگە اينالعان قارا بىلعارى كۇرتەسى, ەتىگى, پورتفەلى عىلىم جولىندا جانكەشتى عۇمىر كەشكەن عالىمنىڭ وتكەن ءومىرىن ءبىر ساتكە كوز الدىنا اكەلىپ, تاريحي تۇتاستىقتا باياندايدى.
كورمەگە گەولوگيا جانە مەتاللوگەنيا سالاسىنداعى زەرتتەۋلەرىن قوسا العاندا, وتاندىق عىلىمدى ودان ءارى دامىتۋ ءۇشىن نەگىز بولعان عىلىمي جەتىستىكتەرىنە ارنالعان مۇراعاتتىق فوتوسۋرەتتەر, قۇجاتتار مەن ماقالالارى, عىلىمي ەڭبەكتەرى, باسقا دا ماتەريالدار وتكەن كۇننەن سىر شەرتەدى. ەلىمىزدە گەولوگيا مەن مەتاللۋرگيانى دامىتۋدا شەشۋشى ءرول اتقارعان كورنەكتى عالىم ق.ساتباەۆتىڭ ءومىرى ءھام قىزمەتىمەن, عىلىمي جەتىستىكتەرىمەن جانە وتاندىق عىلىمنىڭ دامۋىنا قوسقان ۇلەسىمەن تانىسۋعا كەڭ مۇمكىندىك بەرەدى.
الماتى
