سۋرەتتى تۇسىرگەن – ەرلان ومار, «EQ»
ۇل بالانى ەرتەڭگى وتباسىنىڭ تىرەگى, قورعاۋشىسى, اسىراۋشىسى, قارتايعان شاقتا اكە-شەشەسىنىڭ قامقورشىسى دەپ, ال قىز بالانى بولاشاق انا, يناباتتى كەلىن, ادال جار, وتباسىنىڭ ۇيىتقىسى دەپ تاربيەلەگەن. وسىنداي ۇلتتىق تاربيە ءمانىن اتا-اجەلەرىمىز «ۇلعا وتىز ۇيدەن, قىزعا قىرىق ۇيدەن تىيىم» دەگەن ءبىر ماقالمەن تۇيىندەگەن.
مەملەكەت باسشىسى قاسىم-جومارت توقاەۆ ۇلتتىق قۇرىلتاي وتىرىسىندا بولاشاققا سەنىممەن قادام باسۋ ءۇشىن ء«تول تاريحىمىزدىڭ اۋقىمى كەڭ ەكەنىن تولىق سەزىنىپ, مادەني مۇرامىزدى ساقتاپ, ونى دارىپتەۋىمىز قاجەت», دەپ اتاپ وتكەن ەدى. ەلىمىزدىڭ وتكەنى, بۇگىنى مەن بولاشاعى ونىڭ تاريحي مۇراسىمەن, ۇلتتىق قۇندىلىقپەن, سالت-داستۇرىمىزبەن تىعىز استاسىپ جاتقانى اقيقات. بۇل ويدى پرەزيدەنتىمىز بيىلعى جولداۋىندا دا تارقاتا ايتتى. «ازاماتتارى, اسىرەسە جاستارى مادەنيەتتى, جاڭاشىل ءارى جاسامپاز ۇلتتىڭ ۇپايى تۇگەل. سوندىقتان ءبىز وركەنيەتتى ەل بولۋعا كەدەرگى جاسايتىن جاعىمسىز ادەتتەردەن ارىلۋىمىز كەرەك», دەدى مەملەكەت باسشىسى.
وسى ماقسات جولىندا 30 جىلدان اسا قىزمەت ەتىپ جۇرگەن «نۇر-انا الەمى» قوعامدىق بىرلەستىگى ءبىرتالاي شارۋا اتقاردى دەسەم, ارتىق بولماس. ءبىزدىڭ بىرلەستىك قۇرامىندا ارداگەر ۇستازدار, مادەنيەت سالاسىنىڭ ماماندارى, كوپبالالى انالار, نەمەرە-شوبەرە سۇيگەن اجەلەر بار. اتاپ ايتساق, اجەلەرىمىز بالاباقشالار, مەكتەپتەر, جوعارى, تەحنيكالىق جانە كاسىپتىك ءبىلىم بەرۋ, مادەنيەت سالاسىنىڭ, بالالار تاربيەلەنەتىن الەۋمەتتىك مەكەمەلەرمەن ۇدايى تىعىز بايلانىستا. بىرلەستىك اجەلەرى جىل بويى «اجەمنىڭ ەرتەگىسى» جوباسى اياسىندا بالاباقشا بالدىرعاندارىن قازاق حالقىنىڭ ەرتەگىلەرى ارقىلى وتانسۇيگىشتىككە, شىندىققا, ەڭبەكقورلىققا تاربيەلەيدى. اجەسىنىڭ ءالديىن, ەرتەگىسىن تىڭداعان بالا مەيىرىمدى, ۇلكەنگە قۇرمەت پەن قامقورلىق كورسەتەتىن بالا بولاتىنىنا سەنەمىز. سوندىقتان دا وتباسىندا اجەلەر نەمەرەلەرىن ۇلتتىق قۇندىلىقتار مەن سالت-ءداستۇر نەگىزىندە تاربيەلەسە, ۇرپاق جامان قىلىقتاردان اۋلاق بولىپ, جاقسىلىققا ۇمتىلادى.
جىل سايىن دوستىق ۇيىندە «نۇر-انا الەمى» قوعامدىق بىرلەستىگىنىڭ اجەلەرى, ءدىن سالاسىنىڭ ماماندارى, مەكتەپ ۇستازدارى جانە وقۋشىلاردىڭ قاتىسۋىمەن وتەتىن ء«دىن مەن ءداستۇر» كونفەرەنتسياسى – بالالارىمىزدى يماندىلىققا, پاراساتتىلىققا تاربيەلەيتىن, ۇلتتىق قۇندىلىقتاردى قالىپتاستىرۋعا جانە ناسيحاتتاۋعا باعىتتالعان شارا. بۇعان قوسا «قورجىن», «قايىرىمدىلىق», «مەكتەپكە جول» اكتسيالارى شەڭبەرىندە مۇمكىندىكتەرى كەلگەنشە كومەككە مۇقتاج, جەتىم-جەسىر وتباسىلارىنا ءاردايىم قول ۇشىن بەرىپ كەلەدى. قازاقستان حالقى اسسامبلەياسى شەشىمدەرى نەگىزىندە ءتۇسىندىرۋ جۇمىسىن جۇرگىزۋ, بەلسەندى مۇشەلەردى ماراپاتتاۋ, مەرەكەلىك كونتسەرت كورسەتۋ, ەرەكشە شارالارعا ۇيىتقى بولۋ – وسىنىڭ بارلىعى اجەلەردىڭ قوعامدىق قىزمەتى.
مەملەكەت باسشىسى جولداۋىندا: «حالقىمىز قاشان دا كەڭ پەيىلىمەن, تولەرانتتىلىعىمەن ەرەكشەلەنگەن. ەلىمىزدىڭ باستى قۇندىلىعى – بىرلىك پەن كەلىسىم ەڭ الدىمەن وسى قاسيەتتەردىڭ ارقاسىندا ساقتالىپ وتىر», دەپ اتاپ كورسەتتى. بۇل تۇرعىدا ءبىزدىڭ ۇيىمنىڭ جۇرگىزىپ وتىرعان شارۋالارى دا بارشىلىق. جىل باسىنان پاۆلودار وبلىسىنداعى قازاقستان حالقى اسسامبلەياسىنىڭ انالار كەڭەسى, «نۇر-انا الەمى» قب, «قوعامدىق كەلىسىم» كمم جانە پاۆلودار قالاسى ءبىلىم مەكەمەلەرى «وتباسى – تاربيە ىرگەتاسى» جوباسىن ىسكە اسىرىپ كەلەدى. وسى ورايدا ۇيىمدارمەن 46 مەموراندۋم بەكىتىلدى. جوبا اياسىنداعى فەستيۆالعا 30-عا جۋىق مەكتەپ قاتىسىپ, قازاق حالقىنىڭ ادەت-عۇرپىن, وتباسىلىق داستۇرلەر مەن ۇلتتىق ويىندارىن, ەجەلگى زاماننان قالىپتاسقان تۇرمىس-تىرشىلىگىن, جالپى ۇلتتىڭ مادەني-گەنەتيكالىق بولمىسىن كورسەتە ءبىلدى.
جاڭا وقۋ جىلىندا بۇل جۇمىس «كۇشىمىز – بىرلىكتە» باعىتىنداعى ومىرشەڭ جوبامەن جالعاسىن تابادى. جوبا پاۆلودار وڭىرىندە تۇراتىن ەتنوس وكىلدەرى سالت-ءداستۇرى مەن قازاق ۇلتتىق سالت-ءداستۇرىنىڭ ينتەگراتسيا ارقىلى بىتە قايناسقانىن كورسەتۋدى كوزدەپ وتىر.
ۇرپاق تاربيەسى – ۇلت بولاشاعى. بولاشاعىمىز جارقىن بولسىن دەسەك, كەلەشەك قوعام يەلەرىن جان-جاقتى جەتىلگەن, اقىل-پاراساتى مول, مادەني, عىلىمي ءورىسى وزىق ەتىپ تاربيەلەۋ – ءسىز بەن ءبىزدىڭ كەزەك كۇتتىرمەيتىن مىندەتىمىز.
باقىتجامال ماكسيلوۆا,
پاۆلودار وبلىسى قازاقستان حالقى اسسامبلەياسى انالار كەڭەسىنىڭ جانە «نۇر-انا الەمى» قوعامدىق بىرلەستىگىنىڭ توراعاسى
