بيىل بۇل مەرەكەنىڭ ءمانى ءتىپتى تەرەڭ. ويتكەنى 2026 جىل – قازاق كاسىبي تەاترىنىڭ 100 جىلدىق مەرەيتويىمەن تۇسپا-تۇس كەلىپ وتىر. ءبىر عاسىرلىق تاريح – جاي عانا ۋاقىت ولشەمى ەمەس. 1926 جىلى قازاقتىڭ تۇڭعىش كاسىبي تەاترىنىڭ شىمىلدىعى تۇرىلگەن ساتتەن باستاپ, ساحنا ۇلتتىق ويدىڭ مىنبەرىنە, رۋحتىڭ تىرەگىنە اينالدى. سودان بەرگى ءجۇز جىلدا قازاق تەاترى نەبىر سىندارلى كەزەڭدى باستان كەشىردى. ءار ءداۋىر ءوز ءۇنىن, ءوز تىنىسىن ساحنا تىلىمەن جەتكىزدى.
ساحنادا ءومىر سۇرەتىن اكتەر – ۋاقىتتىڭ كۋاگەرى عانا ەمەس, ونىڭ جاراتۋشىسى. ول ءار وبراز ارقىلى ادام تاعدىرىن, قوعام قايشىلىعىن, ءومىردىڭ ءمانىن قايتادان تۋدىرادى. رەجيسسەر – سول الەمنىڭ ساۋلەتشىسى. ال كورەرمەن – وسى ۇلى شىعارماشىلىقتىڭ اجىراماس بولىگى. تەاتر وسى ۇشەۋىنىڭ توعىسقان تۇسىندا عانا تولىققاندى ونەرگە اينالادى.
عاسىرلىق بەلەسكە جەتكەن قازاق تەاترى بۇگىندە جاڭا ىزدەنىستەرمەن, جاڭا فورمالارمەن تولىعىپ كەلەدى. ءداستۇر مەن جاڭاشىلدىق ۇيلەسىم تاپقان بۇگىنگى ساحنا – وتكەننىڭ تاجىريبەسى مەن بۇگىننىڭ باتىل قادامىنىڭ توعىسى. ەكسپەريمەنتتىك باعىتتار, زاماناۋي دراماتۋرگيا, رەجيسسەرلىك تىڭ شەشىمدەر – مۇنىڭ ءبارى تەاتردىڭ توقتامايتىن تىرشىلىك يەسى ەكەنىن دالەلدەيدى. ال حالىقارالىق تەاتر كۇنى مەن قازاق كاسىبي تەاترىنىڭ 100 جىلدىعى – ءبىر-بىرىمەن استاسقان قوس ۇلكەن مەرەكە. بۇل – وتكەنگە تاعزىم, بۇگىنگە باعا, بولاشاققا باعدار. سەبەبى حالىقارالىق تەاتر كۇنى – مەرەكە عانا ەمەس, بۇل – ويلاناتىن كۇن. تەاتر بىزگە نە بەردى؟ ءبىز تەاترعا نە بەرە الدىق؟ قازىرگى كورەرمەن ساحنادان نە ىزدەيدى؟ وسى سۇراقتار ءاربىر ونەر ادامىنىڭ عانا ەمەس, ءاربىر قوعام مۇشەسىنىڭ الدىندا تۇرۋى ءتيىس. ساحنا شامى سونبەسىن دەسەك, رۋح شىراعىن وشىرمەۋىمىز كەرەك. تەاترعا بارۋ – مادەنيەتكە قۇرمەت, وزىڭە دەگەن جاۋاپكەرشىلىك. ويتكەنى تەاتر – تەك ونەر ەمەس, ول – ادام بولۋدىڭ مەكتەبى.
