بەرلين, نيۋ-يورك جانە الماتى قالالارىندا الما-كەزەك ءومىر ءسۇرىپ, ءۇش ەلدىڭ اراسىندا جۇمىس ىستەيتىن الماتىلىق سۋرەتشى ءۇشىن ونىڭ جاڭا تۋىندىلارى 2016 جىلعى «مەن كوشپەندىمىن» كورمەسىندە ۇسىنىلعان مۋلتيمەديالىق ينستاللياتسيالارىنىڭ يدەياسىمەن وزەكتەس. شىندىقتى ىشكى تۇيسىكپەن قابىلداۋدان جانە ونىڭ تۇجىرىمدامالىق تالداۋىنان باسقا, نارگيس ءوزىنىڭ جاڭا جۇمىستارىندا ماتەماتيكا مەن مۋزىكا سالاسىنداعى زاماناۋي زەرتتەۋلەردى بىرىكتىرەدى. ونىڭ شىعىس ويۋ-ورنەكتەرىنىڭ گەومەتريالىق قۇرىلىمدارىنىڭ قاينار كوزىن, ولاردىڭ تەرەڭ ماعىناسىن ىزدەپ, شىعارماشىلىعىنا ارقاۋ ەتۋى – سۋرەت ونەرىندەگى تىڭ ءتاسىل. سۋرەتشىنىڭ بۇل ىزدەنىسى ءداستۇرلى ويۋ-ورنەكتەرگە وزگەشە رەڭك بەرىپ, كوشپەلىلەردىڭ ەجەلگى مادەنيەتىنەن شابىتتانعان ونەر تۋىندىلارىندا جاڭا كەيىپپەن جالعاسىن تاۋىپ, ىشتەي ساباقتاسىپ جاتىر. مىڭجىلدىقتار ءداۋىرىن باستان كەشكەن قازاقتىڭ ءداستۇرلى ويۋ-ورنەگى مەن تاڭبالارىنان قازىنا, تۇسپال, كود, شيفر ىزدەگەن سۋرەتشى ۇلتتىق ۇعىمدى تەرەڭدەتىپ, قىلقالام قۇدىرەتىمەن ونىڭ ادام ومىرىنە اسەرىن باياندايدى.
تۇتاس قابىرعانىڭ جارتىسىنا ىلىنگەن «گەومەتريا دىبىستارى» توپتاماسىنا جاتاتىن شىعارمالارى تاماشالاعان جاندى از-كەم ايالداتادى. سۋرەتتەردە اۆتور اككوردتار مەن دىبىس رەتتىلىگىنىڭ اراقاتىناسىن سيپاتتايدى. ءىرى نۇكتەلەرمەن كومكەرىلگەن «كەنەپ» كارتيناسى بيدايدىڭ توگىلگەن التىن ءدانىن ەسكە سالادى. ال «مەن – داۋىسپىن» اتتى تۋىندىسى مورزەنىڭ الىپپەسى سەكىلدى, بىراق زاماناۋي كومپيۋتەر باعدارلاماسىنىڭ مازمۇنىن اشقان تسيفرلار سەكىلدى بەلگىلى ءبىر ورنەكتىڭ نەگىزىن ساندار تىزبەگىمەن ايقىندايدى.
«بۇل كورمەدە نارگيس ءوزىنىڭ «originem» – تسيفرلىق جاڭا تۋىندىلار سەرياسىن ۇسىنا وتىرىپ, پاراللەل جۇرگىزىپ, ەجەلگى ويۋ-ورنەكتەر ماعىناسىنىڭ تەرەڭدىگىنە سۇڭگىتىپ, ءوز اۋديتورياسىنا ولاردىڭ ۇعىمىن قايتا بەزبەندەۋدى ۇسىنادى. «Evigilatio» ونەردىڭ مازمۇنىن بوگدە ادامداردىڭ ارالاسۋىنسىز اشىپ, كورەرمەندى جۇمباق قۇبىلىستاردىڭ قۇپياسىنا بويلاتىپ, بۇگىنگى قالىپتاسقان تۇسىنىكتەر ءمانىنىڭ مۇلدە باسقادا ەكەنىن مەڭزەيدى» دەيدى كورمەنىڭ كۋراتورى گ.جۇبانوۆا.
الماتى
