اباي شىعارمالارىندا حاۋاس ءسوزى ءۇش جەردە, ءۇش تۇردە كەزىگەدى: حاۋاسي حامسا زاھيري, حاۋاس ءساليم, حاۋاس. حاۋاسي حامسا زاھيري – سىرتقى بەس سەزىم مۇشەسى. كورۋ, ەستۋ, ۇستاپ ءبىلۋ, ءدامىن تاتۋ, ءيىس ارقىلى سەزۋ. حاۋاس ءساليم – وسى سەزىمنىڭ بىلعانباعان, تابيعي تازا ءتۇرى.
حاۋاستىڭ ءبىرىنشى ماعىناسى – ىشكى بەس سەزىم مەن سىرتقى بەس سەزىمنىڭ قوسىندىسى, ەكىنشى ماعىناسى – اللانىڭ سەگىز سيپاتىنىڭ قوسىندىسى, ءۇشىنشىسى – حاۋاس دەپ حاكىم جاراتۋشىنىڭ ءوزىن ايتادى», دەيدى ابايتانۋشى مەكەمتاس مىرزاحمەت.
ياعني بۇل ەكى قاتار ارقىلى جاراتۋشىنى اقىلمەن ەمەس, جۇرەكپەن سەزىنۋ ارقىلى تەرەڭ بىلە الاتىنىمىزدى مەڭزەيدى. سودان دا ءبىر ولەڭىندە:
«اقىلمەن ويلاپ بىلگەن ءسوز,
بويعا جۇقپاس سىرعانار,
ىنتالى جۇرەك سەزگەن ءسوز,
بار تامىردى قۋالار»,
دەيدى.
شىن مانىندە, ءبىز كەڭەستىك سانا جادىمىزعا ەنگىزگەن ەۋروتسەنتريستىك, زاتشىلدىق ۇعىمداردان, دۇنيەنىڭ كورىنگەن سىرلارىنا بايگە جاريالاۋدان ءالى كۇنگە ارىلا الماي كەلەمىز. وتكەن عاسىردا شىعىستىق تانىم جابىلىپ, شىعىس اقىندارىنىڭ اۋدارماسىن «كوپ ۇيىقتاما, ايتپەسە شاشىڭ ۇيپا-تۇيپا بولادى» دەگەن سىڭايلى كۇلكىلى ديداكتيكامەن اۋدارىلعانى ءمالىم. «ابايدىڭ باتىسىنان شىعىسى باسىم» دەگەن اقيقات ءسوزى ءۇشىن مۇحتار اۋەزوۆ قاتاڭ تسەنزۋراعا ىلىككەن بولاتىن. اقىرى زاڭعار جازۋشى «شىعىس دەپ, ورىستىڭ قارت كلاسسيكتەرىن ايتىپ وتىرمىن» دەپ مانەۆر جاساپ قۇتىلۋعا ءماجبۇر بولدى. ەگەر ءبىز ابايدى تانىعىمىز كەلسە, الدىمەن شىعىسىنا, ءال-فارابيگە كوبىرەك ۇڭىلگەنىمىز ءجون.
ابىز ءابىش ايتقانداي, شىعارماشىلىق دەگەنىمىز – ۇزدىكسىز اشۋدان تۇرسا كەرەك. ال قازاق بالاسى ءۇشىن ەندىگى اشىلار ءزاۋلىم قۇرلىق – شىعىس بولسا كەرەك.
