– سەرىك راحمەتوللا ۇلى, جاقىندا پارتيا سەزى وتەتىنىنەن حاباردارمىز. اتالعان جيىندا قانداي ماسەلەنى قاراستىرۋدى جوسپارلاپ وتىرسىزدار؟
– مەملەكەت باسشىسى قاسىم-جومارت توقاەۆتىڭ باستاماسىمەن قازاقستاندا ءىرى ساياسي, الەۋمەتتىك جانە ەكونوميكالىق رەفورمالار جۇرگىزىلىپ جاتىر. «حالىق ۇنىنە قۇلاق اساتىن ۇكىمەت» قاعيداسى, جاڭا, ادىلەتتى قازاقستان ۇستانىمدارى ءىس جۇزىندە قولدانىسقا ەنگىزىلدى ءارى ول ەش ناۋقانشىلدىقسىز, دايەكتىلىكپەن, تاباندىلىقپەن, جان-جاقتى ويلاستىرىلىپ جۇزەگە اسىرىلىپ جاتىر.
رەفورمالار بارىسىندا «سايلاۋ تۋرالى» جانە «ساياسي پارتيالار تۋرالى» زاڭعا ماڭىزدى وزگەرىستەر مەن تولىقتىرۋلار ەنگىزىلدى. اتاپ ايتقاندا, ساياسي پارتيالاردىڭ مەملەكەتتىك تىركەۋدەن وتۋگە قاجەتتى ساندىق شەگى 40 مىڭنان 5 مىڭ ادامعا دەيىن تومەندەتىلىپ, ايەلدەرگە, جاستارعا جانە مۇگەدەكتىگى بار جاندارعا ارنالعان 30%-دىق كۆوتا ەنگىزىلدى. پارتيالاردىڭ پارلامەنت ماجىلىسىنە ءوتۋ ءۇشىن سايلاۋشىلار داۋسىن جيناۋ مەجەسىنىڭ 7%-دان 5%-عا دەيىن شەگەرىلۋىنىڭ دە ماڭىزى زور بولدى. ناتيجەسىندە, ەل پارلامەنتىندەگى ساياسي پارتيالار سانى ەكى ەسەگە ارتىپ, 3-تەن 6-عا جەتتى.
2022 جىلعى ماۋسىمدا ەل كونستيتۋتسياسىنا «باسقارۋدىڭ سۋپەرپرەزيدەنتتىك فورماسىنان ىقپالدى پارلامەنتى مەن ەسەپ بەرەتىن ۇكىمەتى بار پرەزيدەنتتىك رەسپۋبليكاعا» ءوتۋ ۇدەرىسىن باستاعان وزگەرتۋلەر مەن تولىقتىرۋلار ەنگىزۋ جونىندەگى رەسپۋبليكالىق رەفەرەندۋم وتكىزىلدى. «اۋىل» پارتياسى مەملەكەت باسشىسىنىڭ رەفورمالارى مەن بارلىق اكتيۆتىڭ زور ۇيىمداستىرۋشىلىق-يدەولوگيالىق جۇمىسى ارقاسىندا كەيىنگى جىلدارى ەلدەگى بەدەلدى ءارى ىقپالدى قوعامدىق-ساياسي كۇشكە اينالدى.
2022 جىلعى قاراشاداعى ەل پرەزيدەنتىنىڭ سايلاۋىندا «اۋىل» پارتياسى اتىنان ساياسي دوداعا تۇسكەن بۇقاراعا تانىمال كانديدات جيگۋلي دايراباەۆ ساياسي ۇيىمنىڭ تۋىن ءوز دەڭگەيىندە كوتەرە ءبىلدى. 2023 جىلعى ناۋرىزدا وتكەن پارلامەنت ءماجىلىسى مەن بارلىق دەڭگەيدەگى ءماسليحاتتار دەپۋتاتتارىن كەزەكتەن تىس سايلاۋ قورىتىندىسى بويىنشا ءبىزدىڭ پارتيا ماجىلىستەگى فراكتسيا سانى جاعىنان ەكىنشى ورىندى جانە ماسليحاتتارداعى دەپۋتاتتىقتىڭ 228 مانداتىن يەمدەندى. پارتيا وكىلدەرى اۋىلدىق وكرۋگتەر, اۋداندىق ماڭىزعا يە قالالار, اۋداندار اكىمدىكتەرىندە دە اكىم بولىپ سايلاندى. بۇل سايلاۋشىلاردىڭ ءبىزدىڭ پارتياعا جوعارى سەنىممەن قارايتىنىن ايعاقتايدى, سونىمەن بىرگە پارتياعا سايلاۋشىلار الدىندا ۇلكەن جاۋاپكەرشىلىك جۇكتەيدى.
وسىنداي ترەندتەر ناتيجەسىندە پارتيانىڭ قىزمەتىن قايتا قۇرۋ, جاڭعىرتۋ ماسەلەسى بوي كوتەردى. بۇل پارتيانىڭ باعدارلامالىق قۇجاتتارىن – ونىڭ جارعىسى مەن باعدارلاماسىن بارىنشا جاڭارتۋ قاجەت ەكەنىن كورسەتتى. سوندىقتان الدا وتەتىن سەزدىڭ كۇن تارتىبىنە پارتيا ورگاندارىنىڭ ءداستۇرلى ەسەپتەرىن تىڭداۋ مەن ولاردىڭ جاڭا قۇرامىن سايلاۋمەن قاتار پارتيا جارعىسى مەن باعدارلاماسىنا وزگەرتۋلەر مەن تولىقتىرۋلار ەنگىزۋ جوسپارلانعان.
– مۇنى پارتيانىڭ تولىق ترانسفورماتسياسى دەپ ايتۋعا بولا ما؟
– ارينە. ەلىمىزدە كەيىنگى جىلدارى بولعان تۇبەگەيلى جۇيەلىك وزگەرىستەر قوعامنىڭ تولىق ترانسفورماتسيالانۋىنا الىپ كەلدى. ۇلتتىڭ ساياسي مىنەز-قۇلقى وزگەردى, ازاماتتىق ۇستانىم كۇشەيدى. ءبىز دە پارتيا رەتىندە قوعاممەن بىرگە ءوز قاتارىمىزدا دا, ستراتەگيالىق ماقساتتار مەن مىندەتتەردە دە وزگەرىستەردى وتكەرىپ جاتىرمىز. بۇگىندە «اۋىل» – ءجۇز مىڭداعان ازامات ءوز داۋسىن سەنىپ تاپسىرعان ساياسي برەند. ءبىز سايلاۋشىلار الدىنداعى بۇل جاۋاپكەرشىلىكتى سەزىنەمىز جانە ءوز قىزمەتىمىزدى شىنايى ىسپەن ءارى تىڭ باستامالارمەن نىقتاي تۇسكىمىز كەلەدى.
– «اۋىل» پارتياسىنىڭ ستۋدەنتتەردىڭ قۇرىلىس جاساقتارىن قايتا جاڭعىرتقانىن بىلەمىز. ساياسي ۇيىمنىڭ وسى باستاماسى تۋرالى كەڭىرەك ايتىپ بەرسەڭىز.
– مۇنداي باستاما كوتەرۋىمىزگە كوكتەمدەگى سۋ تاسقىنى ىقپال ەتتى. نەگىزىنەن اۋىل تۇرعىندارىن شاشەتەكتەن شىعىنعا باتىرعان ءتىلسىز جاۋ ءبىزدى جۇدىرىقتاي جۇمىلىپ, شۇعىل شەشىم قابىلداۋىمىزعا نەگىز بولدى. پارتيا مۇشەلەرى وسىناۋ سىن ساعاتتا حالىقپەن تىعىز بايلانىستا بولدى. ءبىزدىڭ بەلسەندى اگرارلىق قىزمەتكەرلەر, شارۋالار ۋاقىت وزدىرماستان ءار وڭىردەگى كوميسسيالار قۇرامىندا سۋ تاسقىنى سالدارىن جويۋ بويىنشا جۇمىسقا كىرىسىپ كەتتى, زاڭگەرلەر تۇرعىندار ءۇشىن شىعىننىڭ ورنىن تولتىرۋ ءتارتىبى بويىنشا كونسۋلتاتسيالار ۇيىمداستىردى. ورتالىق اپپاراتتا تاۋلىك بويعى رەجىمدە گۋمانيتارلىق كومەك جيناۋ جانە جونەلتۋ بويىنشا شتاب جۇمىسى جولعا قويىلدى. جاستار قاناتىنىڭ بەلسەندىلەرى مەن ەرىكتىلەرى قارعىن سۋ كوتەرىلگەن ءبىرىنشى كۇننەن باستاپ وڭىرلەرگە بارىپ بوگەندەر كوتەرۋگە, توعاندار سالۋعا, گۋمانيتارلىق كومەكتەردى تۇسىرۋگە كومەكتەستى.
پرەزيدەنتتىڭ سۋ تاسقىنى كەزىندە حالىققا جولداعان ۇندەۋى پارتيالاستارىمىز تاراپىنان ەرەكشە قولداۋ تاپتى. مەملەكەت باسشىسى قوعامدى بىرلىككە, اپات سالدارىمەن جۇمىلا كۋرەسۋگە شاقىردى. پارتيا اكتيۆىنىڭ مەملەكەت باسشىسىن قۇرعاق سوزبەن ەمەس, ناقتى ىسپەن قولداۋعا دەگەن ىقىلاسى ستۋدەنتتەردىڭ قۇرىلىس جاساقتارىن قۇرۋ يدەياسىنىڭ ومىرگە كەلۋىنە سەبەپ بولدى. ستۋدەنتتەردىڭ قۇرىلىس جاساعىن پارتيا بەلسەندىلەرى, ناقتى ايتقاندا, جاستار قاناتى بار بولعانى ءبىر اي ىشىندە جينادى. بۇگىندە ولار سولتۇستىك قازاقستان, باتىس قازاقستان وبلىسىنداعى جوندەۋ-قالپىنا كەلتىرۋ جۇمىسىنا كىرىسىپ كەتكەن. ال ەندى ءبىز قۇرىلىس جاساقتارىن اقمولا مەن اتىراۋ وبلىسىندا قۇرۋدى جوسپارلاپ وتىرمىز. بۇل باستامانىڭ وتانداستارىمىزعا قىسقا مەرزىم ىشىندە باسپانالارىن قالپىنا كەلتىرۋگە كومەك بولاتىنىنا, ال جاستارىمىزدىڭ تاجىريبە جيناقتاۋمەن قاتار قارجىلىق مۇمكىندىگىن دە ءبىرشاما جاقسارتاتىنىنا سەنىمدىمىن. بۇدان بولەك, پارتياعا قۇرىلىس جاساعىن قۇرعاننان كەيىن سول سياقتى سانيتارلىق (ۆەتەريناريا, زووتەحنيك ماماندىعىن وقيتىن ستۋدەنتتەرگە), سەرۆيستىك (تۋريزم, قوناقۇي جانە مەيرامحانا بيزنەسى فاكۋلتەتىنىڭ ستۋدەنتتەرىنە), مەحانيكالاندىرىلعان, ەكولوگيالىق, كلينينگتىك, سونىمەن قاتار جولسەرىكتەر وتريادىن جاساقتاۋ جونىندەگى ۇسىنىستار تۇسە باستادى. ءبىز, ارينە, بۇل باستامالاردى قولدايمىز. بۇل جوبالار ستۋدەنتتەردىڭ جاز ايلارىندا قارجى تابۋعا, وندىرىستىك تاجىريبە جيناقتاۋىنا جاعداي جاسار ەدى. ۇيىمداستىرۋ جۇمىستارىمەن بەتپە-بەت كەلگەندە ءبىز قۇرىلىس كومپانيالارىنىڭ قۇرىلىسقا جاقىن شەتەل ازاماتتارىن تارتۋعا ابدەن ادەتتەنىپ العانىن بايقادىق. بۇل ادەت كەيبىر قۇرىلىس كومپانيالارىنىڭ بيزنەس-ۇدەرىستىڭ ءبىر بولىگىنە اينالىپ كەتكەن سىڭايلى. ولار ءتىپتى ىشكى رەسۋرستاردى ىزدەمەيدى دە. ايتاتىندارى «جەرگىلىكتى حالىق جالقاۋ, جۇمىس ىستەگىسى كەلمەيدى». ال ءبىز كەرىسىنشە, اسىرەسە جاستاردىڭ جۇمىس ىستەگىسى كەلەتىنىن جانە جاڭا ماماندىقتى يگەرۋ ءۇشىن ىنتا-نيەتتەرى جوعارى ەكەنىن بايقادىق. ءبىر سوزبەن ايتقاندا, «جاستار قۇرىلىس جاساقتارى» سياقتى جوبالار ارقىلى تەك الەۋمەتتىك قانا ەمەس, ەكونوميكالىق تيىمدىلىككە دە قول جەتكىزۋگە بولادى دەپ ويلايمىن.
– بۇگىندە «اۋىل» پارتياسى قانداي باعىتقا باسا نازار اۋدارىپ وتىر؟
– پارتيا قىزمەتىندە اۋىلدىڭ, اگروونەركاسىپتىك كەشەننىڭ پروبلەمالارى, اۋىل تۇرعىندارىن الەۋمەتتىك قامتاماسىز ەتۋ ماسەلەسى باسىمدىققا يە بولعان جانە سولاي بولىپ قالا بەرەدى. حالىقتىڭ 38%-ى, ياعني 8 ميلليون ادام اۋىلدىق جەرلەردە ءومىر سۇرەدى. سوندىقتان اۋىل مەن اگروونەركاسىپتىك كەشەن ەلدى تولىق كولەمدە مودەرنيزاتسيالاۋ ماسەلەسىن جۇزەگە اسىرۋدا ءاردايىم باسىمدىققا يە بولادى. «اۋىل» پارتياسىنىڭ پارلامەنتتەگى دەپۋتاتتىق فراكتسياسى ەكى زاڭ جوباسىنا – «اگروبانك تۋرالى» جانە «ازىق-ت ۇلىك قاۋىپسىزدىگى تۋرالى» زاڭ جوباسىنا باستاماشى بولىپ, ونى ازىرلەدى. ءبىز سايلاۋالدى باعدارلامامىزدا سايلاۋشىلارعا «مۇنى ىستەيمىز» دەپ ۋادە بەرگەنبىز. اتالعان زاڭ جوباسى بويىنشا فراكتسيا دەپۋتاتتارى جۇيەلى جۇمىس ىستەۋدە: زاڭ جوباسى پارلامەنت سەناتى مەن ءماجىلىسى دەپۋتاتتىق كورپۋسىنىڭ 80%-ىنىڭ قولداۋىنا يە بولدى, اگروبانكتىڭ قارجىلىق ۇلگىسى ازىرلەندى, پارلامەنتاريزم ينستيتۋتىنىڭ قورىتىندىسى الىندى. قازىر ورتالىق مەملەكەتتىك ورگانداردىڭ ماقۇلداۋىنا جىبەرۋ مەن پارلامەنتكە ەنگىزۋ ءۇشىن قۇجاتتار دايىندالىپ جاتىر.
«اۋىل» فراكتسياسى جۇمىس ىستەگەن 1 جىل ىشىندە بارىنشا بەلسەندىلىك تانىتىپ, جوعارى بىلىكتىلىگىن كورسەتتى. ءبىز ۇكىمەتكە ءوز اتىمىزدان 61, قوسالقى اۆتورلىقتا 591 دەپۋتاتتىق ساۋال جولدادىق. ولاردىڭ ءبارى حالىقپەن كەزدەسۋ ناتيجەسى بويىنشا ءتۇزىلدى. بىلتىردىڭ تەك 8 ايىندا دەپۋتاتتار 111 ەلدى مەكەندە 3000-نان استام ادامدى قامتىعان كەزدەسۋ وتكىزدى.
– پارلامەنتتە 2023 جىلعى بيۋدجەتتىڭ ورىندالۋى تۋرالى ۇكىمەت پەن جوعارى اۋديتورلىق پالاتا ەسەبىن تىڭداۋ كەزىندە مەملەكەتتەن بولىنەتىن قارجى تولىق كولەمدە جەتپەيتىن فەرمەرلەر مەن شارۋا قوجالىقتارىنىڭ تالاي جىلدان بەرگى ارمان-تىلەگىن جەتكىزگەن ەدىڭىز. ءسىزدىڭ ويىڭىزشا, اگروونەركاسىپ كەشەنىنىڭ دامۋىنا نە كەدەرگى بولىپ وتىر؟
ء–تيىمسىز مەنەدجمەنت پەن اوك سالاسىنداعى مەملەكەتتىك ساياساتتى جۇزەگە اسىرۋ جولىنداعى ءوزارا ساباقتاستىقتى ۇزەتىن اۋىل شارۋاشىلىعى مينيسترلەرىنىڭ ءجيى اۋىسۋى. قاسىم-جومارت كەمەل ۇلى ەل ۇكىمەتىنە «اۋىل شارۋاشىلىعى سالاسىندا قارجىنىڭ ءتيىمدى پايدالانۋى باقىلانسىن» دەپ ناقتى تاپسىرما بەردى. بۇگىندە اوك جۇيەسىندە اگرارلى كرەديتتىك كورپوراتسيا مەن «قازاگروقارجى» سىندى ەكى ءىرى قارجى ۇيىمى جۇمىس ىستەيدى. ەكەۋى دە «بايتەرەك» ۇلتتىق حولدينگى قۇرامىنا كىرەدى, بىراق ولار اۋىل شارۋاشىلىعى مينيسترلىگىنە باعىنبايدى. ال ناتيجە ءۇشىن اۋىل شارۋاشىلىعى مينيسترلىگى جاۋاپ بەرەدى. اتالعان قارجى ۇيىمدارى اقشانى كوبىنە ءىرى كورپوراتسيالارعا بولەدى. ناتيجەسىندە, مەملەكەت بولەتىن قارجىنىڭ 95%-ن 5% اسا ءىرى اۋىل شارۋاشىلىعى قۇرىلىمدارى عانا الاتىن بولىپ شىقتى. اۋىل شارۋاشىلىعىن باسقارۋعا كەلگەن ءار مينيستر ءوز باعدارلاماسىن ەنگىزۋگە تىرىسادى, بىراق ولاردىڭ ەشقايسىسى كۇتىلگەن ناتيجەگە دەيىن جەتكىزىلگەن ەمەس. وعان تاريح كۋا.
اوك سالاسىنىڭ ءتيىمسىز باسقارىلعانى تۋرالى ءبىر عانا مىسال كەلتىرەيىن. 2003-2005 جىلدارى اوك-ءتى دامىتۋ جونىندەگى مەملەكەتتىك باعدارلاما ىسكە اسىرىلدى. بيۋدجەتتەن بۇكىل سالاعا 3,5 ملرد تەڭگە سۋبسيديا ءبولىندى. ناتيجەسىندە, اۋىل شارۋاشىلىعى ونىمدەرىنىڭ جالپى كولەمى 700 ملرد تەڭگە بولدى. باسقاشا ايتقاندا, بيۋدجەت قاراجاتىنىڭ ءار 1 تەڭگەسىنە 200 تەڭگەلىك اۋىل شارۋاشىلىعى ءونىمى ءوندىرىلدى. بۇگىندە 20 جىل وتكەن سوڭ ءبىز اوك-كە سول كەزدەگىدەن 140 ەسە كوپ قارجى – 500 ملرد تەڭگە سالامىز دا جالپى كولەمى 10 ترلن تەڭگەگە جەتپەيتىن ءونىم الامىز, ياعني بيۋدجەتتەن بولىنگەن سۋبسيديانىڭ 1 تەڭگەسىنە قازىر بار بولعان 20 تەڭگەنىڭ اۋىلشارۋاشىلىق ءونىمى وندىرىلەدى. بۇل اوك ءوندىرىسىنىڭ تيىمدىلىگى 20 جىلدا 10 ەسەگە تومەندەگەنىن كورسەتەدى. پارتيا سوندىقتان دا اگروبانك قۇرۋ ماسەلەسىنە باستاماشى بولدى. بۇل ماسەلە قازىرگى جاعدايدا بۇرىنعىدان دا وزەكتى. ونىڭ جارقىن مىسالى رەتىندە تۇرعىن ءۇي نارىعىنداعى جاعدايدى تۇراقتاندىرعان «وتباسى بانكىن» الۋعا بولادى.
– پارتيانىڭ اۋىل كاسىپكەرلىگىن ينۆەستيتسيالاۋعا قالتالى ازاماتتاردى تارتۋ تاجىريبەسى تۋرالى كەڭىرەك ايتىپ بەرسەڭىز.
– ءبىز بۇل باستامانى سايلاۋالدى باعدارلامامىزدا ۇسىنعان بولاتىنبىز. بەلسەندىلەر بيىل «قۇس ەتى: اۋلادان داستارقانعا» قاناتقاقتى جوباسىن ىسكە قوستى. بۇل – «قالاي جەكە اۋلا شارۋاشىلىعىن دامىتۋعا جانە اۋىلدىقتارعا كومەكتەسۋگە بولادى؟» دەگەن سۇراقتىڭ جاقسى جاۋابى. مىسالى, وسى كوكتەمدە ءبىز پارتيا مۇشەلەرىنىڭ جەكە قارجىسىنا 600 تاۋىق, 800 قاز بالاپانىن, سونىمەن قاتار ولارعا قاجەت جەم ساتىپ الدىق. ولاردى جوباعا قاتىسۋشىلار اقمولا وبلىسى, اقكول اۋدانىندا تۇراتىن, قۇس وسىرۋمەن اينالىسقىسى كەلەتىن اۋىلدىقتارعا تاراتىپ بەردى. ءبىزدىڭ ماماندار جوبا بارىسىندا قاتىسۋشىلارعا قۇس ءوسىرۋدىڭ بارلىق قىر-سىرىن ۇيرەتەدى. بۇل جوبا اۋىل تۇرعىندارىنىڭ قۇس وسىرۋدە تاجىريبە جيناقتاۋىنا, سونىمەن قاتار ىسكەرلىك بەلسەندىلىگىن ارتتىرۋىنا مۇمكىندىك بەرەدى. ال قارجىسىن بالاپاندارعا سالعان دەمەۋشىلەر كۇزدە ەكولوگيالىق تازا جانە نارىق باعاسىنان 30% تومەن باعادا ءونىم الادى.
پارتيانىڭ ساراپتاما ءبولىمى قىزىق جۇمىس جۇرگىزىپ جاتىر. گرانت الۋدا تاجىريبەسى بار قىزمەتكەرلەر گرانتتىق باعدارلامالارعا قاتىسۋشىلارعا ادىستەمەلىك قولداۋ كورسەتەدى. قازىر بىزدە ءۇش وڭ ناتيجە بار: اقمولا, الماتى, قىزىلوردا وبلىسىنداعى ءبىزدىڭ قاتىسۋشىلار الەۋمەتتىك باعىتتاعى گرانتتارعا يە بولدى.
پارتيا سونىمەن قاتار بارلىق وڭىردە الەۋمەتتىك مانگە يە «مەن دونورمىن», «كىتاپقا ەكىنشى ءومىر سىيلا», «كومپيۋتەرگە ەكىنشى ءومىر سىيلا» اكتسياسىن بەلسەنە جۇزەگە اسىرىپ جاتىر. اۋىلدىقتار ەل پرەزيدەنتى باستاعان «تازا قازاقستان» ەكولوگيالىق اكتسياسىن دا بەلسەندى تۇردە قولدادى. ءتىپتى ەڭ شالعاي جاتقان اۋىلداردا تازالىق جۇمىستارى جۇرگىزىلدى. بۇل اكتسيالاردىڭ بارلىعىنا پارتيانىڭ «اۋىل جاستارى» جاستار قاناتىنىڭ بەلسەندىلەرى جۇمىلدىرىلدى.
اۋىل تاقىرىبىن فوتوسۋرەتشىلەر جۇمىسىندا دارىپتەۋ ماقساتىندا ءبىز «اۋىل ناقىشتارى» فوتوبايقاۋىن وتكىزدىك. قازىر ەلىمىزدىڭ بارلىق وڭىرىندە ەڭ كوركەم فوتوسۋرەتتەر جيناقتالعان كوشپەلى كورمە وتكىزىلىپ جاتىر. اۋزى دۋالى اقساقالدار اراسىندا وتكىزىلگەن «باتامەنەن ەل كوگەرەر» اتتى بايقاۋ دا قىزىقتى جوبا بولدى. «اۋىل» پارتياسى جانىندا بۇدان باسقا ەكى كوميسسيا – ايەلدەر, بالالار جانە وتباسى جونىندەگى, سونىمەن قاتار مۇگەدەكتىگى بار ادامدار قۇقىعىن قورعاۋ جونىندەگى كوميسسيا جۇمىس ىستەيدى. اتالعان كوميسسيالاردىڭ فيليالدارى بارلىق وڭىردە قۇرىلعان ءارى ولاردىڭ جۇمىسى جولعا قويىلعان.
– قازىر ۋاقىتتىڭ ىڭعايىنا قاراي قوعام دا تەز جاڭارىپ, جەدەل وزگەرىپ وتىر. وسىنداي كەزەڭدە «اۋىل» پارتياسى دا كوشتەن قالماي, زامان اعىمىنا ىلەسۋ ءۇشىن الدىنا قانداي ماقسات قويىپ وتىر؟
– ارينە, ءبىز ساياسي كۇشتەر اراسىنداعى كۇرەس جىل وتكەن سايىن كۇشەيە تۇسەتىنىن جاقسى بىلەمىز. سەبەبى سايلانبالى لاۋازىم ءۇشىن بەلگىلى ءبىر پارتيا مۇشەلەرىمەن قاتار جەرلەستەرى اراسىندا بەدەلگە يە ءوزىن-ءوزى ۇسىنۋشىلار دا كۇرەسەتىن بولادى. سەزد دەلەگاتتارىنا جەتكىزگىمىز كەلگەن ءبىزدىڭ باستى ويىمىز – ءتيىمدى كادرلىق رەزەرۆ قالىپتاستىرۋ جولىندا جۇمىس ىستەۋ. بارلىق پارتيانىڭ, ونىڭ ىشىندە ءبىزدىڭ دە ومىرشەڭدىگىمىز, كۇشىمىز, بەدەلىمىز مۇشەلەرىمىزگە بايلانىستى ەكەنى ايدان انىق. ءبىزدىڭ ماقسات – ەلىمىزدىڭ ءار وڭىرىندە, ءار اۋىلدىق وكرۋگىندە حالىقپەن بىرگە بولۋ.
پرەزيدەنت قاسىم-جومارت توقاەۆ VIII شاقىرىلىمداعى پارلامەنتتىڭ ءبىرىنشى سەسسياسىنىڭ اشىلۋىندا «اۋىل شارۋاشىلىعى سالاسىنداعى رەفورمالار ءۇشىن ساپالى زاڭدار قاجەت. مەن ماجىلىسكە وتكەن «اۋىل» پارتياسى وسى جۇمىسقا ءوز ۇلەسىن قوساتىنىنا سەنىمدىمىن», دەدى. مەملەكەت باسشىسىنىڭ وسى ايتقانى, سونىمەن قاتار سايلاۋشىلارىمىزدىڭ بىزگە ارتقان سەنىمى پارتيامىزدىڭ نەگىزگى تەمىرقازىعى.
اڭگىمەلەسكەن –
قۋات اۋەسباي,
«Egemen Qazaqstan»
