فوتو: Tengrinews.kz/تۇرار قازانعاپوۆ
Qazaqstan media پورتالىنىڭ جازۋىنشا, سولتۇستىك قازاقستان وبلىسى قىزىلجار اۋدانى ولشانكا اۋىلىنداعى كولونيادان 38 جاستاعى سوتتالۋشى قاشىپ كەتكەن.
سوتتالۋشى كولىك ۇرلاۋ جانە ۇرلىق ءۇشىن ءۇش رەت ءىستى بولعان, ول ەكىنشى رەت جازاسىن قاتاڭ تارتىپتەگى قىلمىستىق-اتقارۋ جۇيەسى مەكەمەسىندە وتەگەن. 2022 جىلدىڭ ماۋسىم ايىندا ءشوپ شاباتىن تراكتوردى, سونىمەن قاتار اۋىل تۇرعىندارىنىڭ ءتۇرلى مەتالل بۇيىمدارى مەن جۇك كولىگىن ۇرلاعانى ءۇشىن 4,5 جىلعا سوتتالدى. وسى جىلدىڭ 8 ساۋىرىنە دەيىن جازاسىن قاتاڭ تارتىپتەگى قىلمىستىق-اتقارۋ جۇيەسى مەكەمەسىندە وتەپ, كەيىن ەڭ تومەنگى رەجيمدەگى كولونياعا اۋىستىرىلعان كورىنەدى.
دەپارتامەنت وكىلدەرى ەڭ تومەنگى قاۋىپسىزدىك مەكەمەلەرىندە جازاسىن وتەپ جاتقاندار كولونيادان تىس جەردە جۇمىس ىستەپ, جۇمىس ۋاقىتى بىتكەندە قايتىپ كەلەتىنىن ءتۇسىندىردى.
«سوتتالۋشى كولونياعا جۇمىس ورنىنان ورالماعان, ونى ىزدەۋگە مەكەمە مەن قىلمىستىق اتقارۋ جۇيەسىنىڭ قىزمەتكەرلەرى جۇمىلدىرىلدى. تۇتقىن كورسەتىلگەن باعىتتان اۋىتقىپ كەتتى, ول ءۇشىن قىلمىستىق كودەكستە جاۋاپكەرشىلىك كوزدەلگەن. وعان زاڭناماعا سايكەس ءتيىستى شارالار قولدانىلادى», دەپ حابارلادى ۆەدومستۆونىڭ ءباسپاسوز قىزمەتى.
قىلمىستىك كودەكستىڭ 427-بابىنا سايكەس, باس بوستاندىعىنان ايىرۋ ورنىنان تىسقارى جەرگە قىسقا مەرزiمگە شىعۋعا رۇقسات ەتiلگەن سوتتالۋشىنىڭ شىعۋ مەرزiمi بiتكەننەن كەيiن, جازاسىن وتەۋدەن جالتارۋ ماقساتىندا تۇزەتۋ مەكەمەسiنە قايتىپ ورالماۋى – ەكى جىلعا دەيىنگى مەرزىمگە باس بوستاندىعىنان ايىرۋ جازاسىن كوزدەيدى.
قىرمىزى جۇماعاليقىزى,
ەۇۋ ستۋدەنتى
