سۋرەتتى تۇسىرگەن – جەڭىس ىسقاباي
اقجولتاي حاباردى وبلىس اكىمىنىڭ ءباسپاسوز قىزمەتى حابارلادى. جىل اياعىنا دەيىن تالدىقورعاندا جاڭبىرلاتىپ سۋاراتىن قوندىرعىلار شىعاراتىن ءوندىرىس ورنى اشىلادى. كۇز باسىندا ىسكە قوسىلاتىن كاسىپورىننىڭ قۋاتى جىلىنا مىڭعا جۋىق جاڭبىرلاتقىش ماشينانى قۇراۋعا جەتەدى. بۇل جىل سايىن 30-40 مىڭ گەكتاردى ىلعال ۇنەمدەيتىن تەحنولوگيالارمەن قامتۋعا مۇمكىندىك بەرەدى.
كاسىپورىن تالدىقورعانداعى يندۋستريالدى ايماق اۋماعىندا سالىنادى. «جەتىسۋ اگرو كەشەنى» جشس كومپانياسى ىسكە اسىراتىن جوبانىڭ جالپى قۇنى – 2 ملرد تەڭگە. بولىنگەن جەر ۋچاسكەسىندە ءتيىستى دايىندىق جۇمىستارى ءجۇرىپ جاتىر. كومپانيا ديرەكتورىنىڭ ورىنباسارى قايرات وسپانوۆتىڭ ايتۋىنشا, زاۋىت جىلىنا 960 بىرلىك جاڭبىرلاتقىش ماشينا قۇراستىرۋعا قاۋقارلى.
ءوندىرىس بارىسىندا شيكىزات رەتىندە وتاندىق مەتالل, سول سياقتى داتچيكتەر, بۇرىككىشتەر سەكىلدى قۇرامداس بولىكتەردىڭ امەريكالىق تۇرلەرى پايدالانىلادى. دانەكەرلەۋ مەن لازەرلىك جۇمىستاردى جۇرگىزۋ ءۇشىن وندىرىستىك تسەحتا ورناتىلاتىن ستانوكتار دا امەريكالىق بولماق. سونىمەن قاتار بولاشاقتا تراكتور قۇراستىرۋ تسەحى اشىلىپ, وسى تەحنيكاعا قىزمەت كورسەتەتىن سەرۆيستىك ورتالىق قۇرىلادى. ازىرگە 40 جۇمىس ورنىن اشۋ كوزدەلگەن.
وبلىس اكىمى بەيبىت يساباەۆتىڭ ايتۋىنشا, جوباعا قاجەتتى قولداۋ كورسەتىلەدى. جالپى, بۇل وسى كۇزدە ىسكە قوسىلاتىن جالعىز كاسىپورىن ەمەس. يندۋستريالدى ايماقتا ونەركاسىپتىك اككۋمۋلياتورلار شىعاراتىن زاۋىت سالۋ جۇمىستارى جالعاسىپ جاتىر. «ASMA Industrial» جشس وكىلدەرىنىڭ ايتۋىنشا, قۇرىلىستى جازدىڭ ورتاسىندا اياقتاپ, قىركۇيەك ايىندا ىسكە قوسۋ جوسپارلانعان. جاڭا زاۋىتتىڭ وندىرىستىك قۋاتى جىلىنا 210 مىڭ دانا اككۋمۋلياتور شىعارۋعا جەتەدى, جوباعا 3,2 ملرد تەڭگە ينۆەستيتسيا تارتىلدى. كومپانيانىڭ تەڭ قۇرىلتايشىسى سەرىكباي اجماعانبەتوۆتىڭ سوزىنە سۇيەنسەك, كاسىپورىندا ستاتسيونارلىق يندۋستريالىق باتارەيالاردا, ياعني كۇن جانە جەل ەلەكتر ستانسالارىندا, تەپلوۆوزداردا, جۇك تيەۋ ەلەكتروتەحنيكاسىندا پايدالانىلاتىن ونەركاسىپتىك اككۋمۋلياتورلار شىعارىلادى.
ايتا كەتەيىك, مۇنداي ونىمدەر «قازاقتەلەكوم», «KEGOC» سياقتى كومپانيالار ءۇشىن كەرەك. جالپى العاندا, ونەركاسىپتىك باتارەيالار ەلەكتر ەنەرگياسىن ۇزدىكسىز بەرۋمەن اينالىساتىن كاسىپورىندار مەن ۇيىمداردا قولدانىلادى, ياعني ولار رەزەرۆتىك ەلەكترمەن جابدىقتاۋدى قامتاماسىز ەتۋدە پايدالى. ءوندىرىستى ۇيىمداستىرۋ ءۇشىن وڭتۇستىك كورەيا جابدىقتارى اكەلىنگەن. كومپانيا وكىلدەرىنىڭ ايتۋىنشا, كاسىپورىندا دايىن ءونىمدى وتكىزۋدە قيىندىق تۋمايدى, ويتكەنى قازىر ەكسپورتتى ۇيىمداستىرۋ ءۇشىن ءباا كومپانياسىمەن ىسكەرلىك بايلانىس ورناتۋ جونىندە ۇسىنىستار بار.
كاسىپورىن باسشىلىعىمەن كەزدەسۋ بارىسىندا وبلىس اكىمى ءوڭىردىڭ «جاسىل» ەنەرگەتيكانى ودان ءارى دامىتۋدا الەۋەتى زور ەكەنىن ايتا كەلە, الاكول اۋدانىندا ينۆەستورلار قۋاتى 1 گۆت بولاتىن ەڭ ءىرى جەس سالۋدى جوسپارلاپ وتىرعانىن جەتكىزدى. بۇل دا «ASMA Industrial» جشس ونىمدەرىنىڭ سۇرانىسىن ارتتىراتىنىن ەسكە سالدى. ماسەلەن, بىلتىر وبلىستا ەلەكتر ەنەرگياسىنىڭ 75 پايىزى جاڭارتىلعان ەنەرگيا كوزدەرىنەن ءوندىرىلدى. بۇگىندە وڭىردە بەلگىلەنگەن قۋاتتىلىعى 210,5 مۆت بولاتىن 15 جەك نىسانى جۇمىس ىستەيدى.
كۇنباعىس مايىن وندىرەتىن «جەتىسۋ ماجيكو» اگروكەشەنى» جشس زاۋىتى توقتاپ قالعاننان كەيىنگى كەزەڭدە قايتا ىسكە قوسۋعا دايىن. ديرەكتورى سەنان مۇستافاەۆتىڭ ايتۋىنشا, زاۋىت تەحنيكالىق تەكسەرۋدەن وتكەن. سىناق رەجىمى اياسىندا كۇنباعىس تۇقىمىنان 113 توننا ماي سىعىلعان. شيكىزاتقا قاتىستى دا پروبلەما جوق, ونى رەسەيدەن جەتكىزۋ ءۇشىن كەلىسىمدەر جاسالعان. تەك تەمىرجول ينفراقۇرىلىمىنىڭ جاعدايى, اتاپ ايتقاندا, شپالداردى جوندەۋدى نەمەسە اۋىستىرۋدى قاجەت ەتەتىن شاعىن ۋچاسكەنىڭ ماسەلەسى عانا وزەكتى بولىپ وتىر. بۇل رەتتە ءوڭىر باسشىسى ماسەلەنىڭ بارىنشا قىسقا مەرزىمدە شەشىلەتىن ايتىپ, بۇعان قاتىستى جاۋاپتى تۇلعالارعا ءتيىستى تاپسىرمالار بەرىلدى.
«جۋىق ارادا زاۋىتتى ىسكە قوسۋدىڭ ماڭىزى ۇلكەن. ونىڭ ۇستىنە تەحنيكالىق, تەحنولوگيالىق جاعىنان دايىن بولعاندىقتان, بۇل قيىندىق تۋعىزبايدى. زاۋىت تۇراقتى جۇمىس ىستەسە, جەرگىلىكتى فەرمەرلەردىڭ كۇنباعىس وسىرۋمەن تۇبەگەيلى اينالىسۋىنا مۇمكىندىك تۋادى, ويتكەنى ءونىمىن ناقتى وتكىزەتىن ورنى بولادى. سودان كەيىن شيكىزاتتى كەزەڭ-كەزەڭىمەن سىرتتان اكەلۋدىڭ قاجەتى بولمايدى. سوندا دايىن ءونىمنىڭ قۇنى دا تومەندەيدى دەگەن ءسوز. سونىڭ ناتيجەسىندە بولاشاقتا زاۋىت وسىمدىك مايىن ءوندىرۋدىڭ ماڭىزدى كلاستەرلىك تىزبەگىنە اينالادى», دەدى ب.يساباەۆ.
بۇگىندە كاسىپورىن جىلىنا 50-60 مىڭ توننا شيكىزات وڭدەيدى, ودان ءارى 100 مىڭ تونناعا دەيىن جەتكىزبەك. كاسىپورىن قىزمەتكەرلەرىنىڭ ايتۋىنشا, 100 مىڭ توننا كۇنباعىس تۇقىمىنان شامامەن 40 مىڭ توننا وسىمدىك مايىن, سونداي-اق اۋىل شارۋاشىلىعى قۇستارىن ازىقتاندىرۋ ءۇشىن كەڭىنەن قولدانىلاتىن جەم الۋعا بولادى. زاۋىت تەمىرجول ۋچاسكەسى قالپىنا كەلتىرىلگەن سوڭ 1-2 ايدان كەيىن ءوز جۇمىسىن قايتا باستايدى دەپ مەجەلەنگەن.
ساپار سوڭىندا وبلىس باسشىسى بەيبىت يساباەۆ كەراموگرانيتتى پليتالار وندىرەتىن «الماز-كەراميكس» جشس كاسىپورنىنىڭ جۇمىسىمەن تانىستى. بەلگىلى بولعانداي, كاسىپورىندا پليتالاردىڭ 15 ءتۇرى شىعارىلادى, 260 جۇمىس ورنى قۇرىلعان. وندىرىستە وتاندىق شيكىزات پايدالانىلادى. ال دايىن ونىمدەرى ەل ىشىندە عانا ەمەس, كورشى رەسەيدە دە ساۋداعا شىعادى. كاسىپورىننىڭ وندىرىستىك قۋاتى جىلىنا 2 ملن شارشى مەتر پليتكا شىعارۋعا جەتەدى. الداعى جىلى ودان دا كوبىرەك ماتەريال وندىرۋگە نيەتتى.
جەتىسۋ وبلىسى
