سۋرەتتى تۇسىرگەن – دميتري ەروفەەۆ
وبلىس ورتالىعىندا ءبىر ساتتە 50 ءسابيدىڭ تۇساۋى بىردەي كەسىلدى. ءوڭىر اكىمى ءباسپاسوز قىزمەتىنىڭ مالىمەتىنە سۇيەنسەك, سابيلەردىڭ تۇساۋىن وڭىردەگى ارداگەرلەر, مادەنيەت, ونەر, ادەبيەت جانە جۋرناليستيكا سالاسىنىڭ قايراتكەرلەرى, اتاقتى سپورتشىلار, بىلىكتى دارىگەرلەر مەن ۇستازدار, مەملەكەتتىك قىزمەتشىلەر, ت.ب كوپكە تانىمال بەدەلدى ازاماتتار كەسكەن. بۇل اۋقىمدى جيىن ەلىمىزدە العاش رەت وتكىزىلىپ وتىرعاندىقتان, قازاقستاننىڭ رەكوردتار كىتابىنا ەنگىزىلدى. تۇساۋ كەسۋ راسىمىنە وبلىس اكىمى بەيبىت يساباەۆ قاتىسىپ, ءتاي-ءتاي باسقان بۇلدىرشىندەردىڭ قادامىنا قۇت تىلەدى.
رۋحاني ءىس-شارا شىمىلدىعى بۇلدىرشىندەرگە باتا بەرۋ سالتاناتىمەن ءتۇرىلدى. وسى راسىمگە ارنايى كەلگەن «كينەس» رەكوردتاردى تىركەۋ دەپارتامەنتىنىڭ ديرەكتورى باقىتجان تاستۇلەكوۆ تاڭدانىسىن جاسىرمادى.
«ەلىمىزدە وسىنداي اۋقىمداعى تۇساۋكەسەر العاش رەت وتكىزىلىپ وتىر. بۇل كۇن – ەلىمىز ءۇشىن ايشىقتى ءساتتىڭ ءبىرى. سوندىقتان 50 بالانىڭ ءبىر مەزەتتە بىردەي تۇساۋكەسەرى وتكىزىلگەنى جايلى فاكتىنىڭ قازاقستاننىڭ رەكوردتار كىتابىنا ەنگىزىلگەنىن راستايتىن سەرتيفيكات تابىستايمىن. بالالاردىڭ جولى اشىق, ءار قادامى ىزگىلىككە تولسىن», دەدى ب.تاستۇلەكوۆ.
تۇساۋكەسەر راسىمىنەن كەيىن اتالعان دەپارتامەنت باسشىسى وبلىستىق قوعامدىق دامۋ باسقارماسىنا ارنايى سەرتيفيكات تابىستادى. سونىمەن قاتار قازاقستاننىڭ رەكوردتار كىتابىنىڭ سوڭعى شىعارىلىمىن سىيعا تارتتى. وسى كۇنى العاشقى ءتاي-ءتاي قادامىن جاساعان بالالاردىڭ ىشىندە تالدىقورعاندىق ۇستازدار وتباسى نۇرجان قاميەۆ پەن گۇلنۇر داۋرەنبەكوۆانىڭ دا كەنجەلەرى بار.
ء«بىر جاسار بالامىزدى وسى ايتۋلى ءىس-شاراعا ارنايى الىپ كەلدىك. ەكى قىزدان كەيىن دۇنيەگە كەلگەن ۇلىمىزعا مۇراگەر دەپ ات قويعانبىز. مۇراگەرىمىز تالدىقورعان قالاسىنداعى №14 بالاباقشانىڭ «بالاپان» توبىنا بارىپ ءجۇر. ناۋرىزدىڭ ونكۇندىگى اياسىندا وسى ۇلكەن اۋقىمداعى تۇساۋكەسەردە ءسابيىمىزدىڭ ومىرگە العاش قادام جاساعانىن جاقسى ىرىمعا بالايمىز. ۇلىمىزدىڭ الداعى جولى اشىق, بولاشاعى جارقىن بولادى دەپ سەنەمىز. ناۋرىزدى وسىلاي ون كۇن بويى ۇلتتىق مازمۇندا اتاپ ءوتۋ باستاماسىن قولدايمىز», دەدى قۋانىشتان تولقىعان اتا-انا.
جەتىسۋ وبلىسى
