مادەنيەت كوميتەتى توراعاسىنىڭ ورىنباسارى ءسابيت بارلىباەۆتىڭ ايتۋىنشا, ناۋرىزناما ونكۇندىگى جىل سايىن 14-23 ناۋرىز ارالىعىندا وتەدى. ناۋرىزدىڭ بىرەگەي لوگوتيپى بەكىتىلىپ, ەلىمىزدىڭ بارلىق ايماعىنا جىبەرىلدى.
- تاريحتا ناۋرىزدى تويلاۋ 8-9 كۇنگە جالعاسقان. ونى "ناۋرىزناما" دەپ اتاعان. بۇل تۋرالى دەرەكتەر ۇلى فيلوسوف-جازۋشىلارىمىز ماحمۇد قاشعاريدىڭ, ءماشھۇر ءجۇسىپ كوپەي ۇلىنىڭ, اباي قۇنانباي ۇلىنىڭ, مۇحتار اۋەزوۆتىڭ ەڭبەكتەرىندە جازىلعان, - دەدى ءسابيت بارلىباەۆ.
ول مەرەكە كۇنى ۇيىمداستىرىلاتىن ءىس-شارالار جوسپارىن ءبولىستى.
14 ناۋرىز - كورىسۋ كۇنى - امال مەرەكەسى. بۇل ءداستۇر نەگىزىندە ەلىمىزدىڭ باتىس وڭىرلەرىندە ساقتالعان. قازىر بۇل مەرەكەنى بارلىق ايماقتا تويلاۋ ۇسىنىلدى.
15 ناۋرىز - قايىرىمدىلىق كۇنى. بۇل كۇندى ەل بويىنشا قايىرىمدىلىققا, مەيىرىم مەن تاتۋ كورشىلىككە ارنايمىز.
16 ناۋرىز - مادەنيەت جانە ۇلتتىق سالت-ءداستۇر كۇنى. بۇل كۇن مادەنيەتىمىزدى, ونەرىمىز بەن ۇلتتىق قۇندىلىقتارىمىزدى ناسيحاتتاۋعا ارنالىپ, رەسپۋبليكا بويىنشا ءتۇرلى ءىس-شارالاردى وتكىزۋ جوسپارلانىپ جاتىر.
17 ناۋرىز - "شاڭىراق كۇنى". وسى كۇنى وتباسىلىق قۇندىلىقتاردى دارىپتەۋگە, ونەگەلى ۇرپاق تاربيەلەگەن ۇلگىلى وتباسىلارعا ارنالعان مادەني ءىس-شارالار وتەدى.
18 ناۋرىز - ۇلتتىق كيىمدەر كۇنى. ناۋرىزنامانىڭ ونكۇندىگىندە ەلىمىزدىڭ بارلىق وڭىرىندە ۇلتتىق كيىمدەردى ناسيحاتتاۋعا باعىتتالعان ءتۇرلى ءىس-شارا وتكىزۋ ۇسىنىلىپ وتىر.
19 ناۋرىز - جاڭارۋ كۇنى. وسى كۇنى كوكتەمگى اعاش ەگۋ ءداستۇرىن جالعاستىرۋ ۇسىنىلدى.
20 ناۋرىز - ۇلتتىق سپورت كۇنى. بۇل كۇنى ەلدىڭ بارلىق ايماعىندا ۇلتتىق سپورتتان ءتۇرلى جارىستار ۇيىمداستىرىلادى.
21 ناۋرىزدى - ىنتىماق كۇنى. ونىڭ باستى ماقساتى - جالپى حالىق اراسىندا ءبىر-بىرىنە دەگەن سىي-قۇرمەتتى ارتتىرىپ, تاتۋلىق پەن بىرلىكتى ناسيحاتتاۋ.
22 ناۋرىز - جىل باسى. بۇل كۇنى ەلىمىزدىڭ بارلىق وڭىرىندە جالپىحالىقتىق مادەني-سپورتتىق ءىس-شارالار وتكىزىلىپ, ءستيلدى ەتنواۋىلدار مەن ءتۇرلى جارمەڭكە ۇيىمداستىرىلادى. 14-23 ناۋرىز ارالىعىندا "ناۋرىز-بازارلىق" ماۋسىمى جاريالانادى. بۇل كۇندەرى ساۋدا ورىندارىندا جاپپاي ساتىلىمدار وتەدى.
23 ناۋرىز - تازارۋ كۇنى. ناۋرىزنامانىڭ قورىتىندى كۇنى, جاڭا جىلدى تۇتاس ەل بولىپ, جاڭا ماقسات, جاڭا ۇمىتپەن قارسى الۋدىڭ سيمۆولى رەتىندە ەتىپ جاريالانادى. بۇل كۇنى قازاقستاننىڭ بارلىق ايماقتارىندا جالپىۇلتتىق ەكولوگيالىق اكتسيا وتەدى.
سونىمەن قاتار, مادەنيەت جانە اقپارات مينيسترلىگى ناۋرىز مەرەكەسىن تويلاۋعا ارنالعان جالپى رەسپۋبليكالىق جوسپار ازىرلەدى. قۇجاتتا بارلىق فورماتتاعى ءىس-شارالار قامتىلعان.
جالپى رەسپۋبليكا بويىنشا 10 مىڭنان اسا ءىس-شارا وتكىزىلەدى. ال باستى مەرەكە 21 ناۋرىزدا استاناداعى ەكسپو كورمەسىنىڭ اۋماعىندا وتەدى. بۇل مەرەكە اياسىندا كيىز ۇيلەر قۇرىلىپ, ءتۇرلى مادەني-سپورتتىق ءىس-شارالار ۇيىمداستىرىلادى. قازىر مەرەكەنىڭ تۇجىرىمداماسى بەكىتىلىپ, دايىندىق جۇرگىزىلىپ جاتىر.
