ءال-فارابي اتىنداعى وقۋشىلار سارايىندا جاس اقىن ابزال ماقاشتىڭ «كاتارسيس» قويىلىمى ءوتتى. احمەت بايتۇرسىن ۇلىنىڭ «قىرىق مىسال» ەڭبەگىنىڭ نەگىزىندە جازىلعان ساحنالىق قويىلىمدا ادامشىلىق ارنالارى, جان ىشىندەگى ارپالىس, مىنەز دەرتتەرى, تازارۋ, تاۋبەگە كەلۋ سىندى ىرگەلى رۋحاني دىڭگەكتەر قامتىلادى.
– وقيعا جانۋارلار قالاسىنىڭ باس سۋدياسى تۇلكىجان الداپسوعاروۆتىڭ ءوز قىلمىسىن جاسىراتىن كەزىنەن باستالادى. كۇندەردىڭ كۇنىندە جانۋارلار قالاسىندا قاۋىپتى جۇقپالى ىندەت تاراپ كەتەدى. بولعان ناۋبەتتى «قۇدايدىڭ جازاسى» دەپ قابىلداعان ءبىرشاما ءدىندار قاۋىم زورلىق-زومبىلىقتان تىيىلىپ, قۇلشىلىق-عيباداتتارىن مولايتادى. قاسقىرلار ورازا ۇستاپ, ساۋىسقاندار ساداقا بەرىپ كەتەدى. الايدا ولاردىڭ ءبارى تۇلكىجان الداپسوعاروۆتىڭ قالا باسشىسى ارىستان اقىرعان ۇلىنىڭ ورنىن كوزدەپ جۇرگەنىنەن مۇلدەم بەيحابار, – دەيدى جاس اقىن.
پەسانىڭ قويۋشى رەجيسسەرى – «جاس قالامگەر» ۇيىمىنىڭ جەتەكشىسى, پەداگوگ ءناريا اقباباقىزى. قويىلىمدى سومداعان بالالار ارقىلى ءباسى بيىك, تىنىسى كەڭ تاقىرىپتار اق زالدىڭ ءار تۇكپىرىنە جەتتى. شىن مانىندە, تەك جاس ەمەس, ەرەسەك ادامداردىڭ اقىل-ويىنا سالماق سالاتىن قوردالى تۋىندى ايتۋلى ساحنالاردان ناسيحاتتالسا قۇبا-قۇپ بولارى داۋسىز.
