سۋرەتتى تۇسىرگەن – ەرلان ومار, «EQ»
اياجان دانيارقىزى بۇگىندە قانىش ساتباەۆ اتىنداعى قازاق ۇلتتىق زەرتتەۋ ۋنيۆەرسيتەتىنىڭ «كومپيۋتەرلىك عىلىمدار» ماماندىعى بويىنشا 3-كۋرستا ءبىلىم الىپ ءجۇر. اياجاننىڭ ساباقتان تىس ۋاقىتتا قۇسبەگىلىك ونەرمەن اينالىسىپ جۇرگەنىنە 2 جىلداي ۋاقىت بولىپتى.
بۇعان دەيىن ول «سۇلتانسەرى» ەتنوگرافيالىق ورتالىعىنىڭ الەۋمەتتىك جەلىلەرگە جاريالاعان ساداقشى قىزدار كاستينگىنە قاتىسىپ, سول جەردە تالىمگەرى سۇلتانسەرى بەكەت ۇلىنىڭ قۇستارعا قامقورلىعىن كورىپ, قوس قاناتتىلارعا دەگەن قىزىعۋشىلىعى پايدا بولعان. باسىندا جاي عانا ەرمەك قىلىپ جۇرگەن ول كەيىن وسى بۇركىتشىلىك جولدى تاڭدادى. ويتكەنى ونى بۇركىتتىڭ ادامعا دەگەن باۋىرمالدىلىعى, سەنىمدىلىگى, قىراعىلىعى مەن كۇشتىلىگى ەرەكشە تاڭعالدىرىپتى. جاتتىعۋ كەزىندە العاشقى بۇركىتتەردىڭ ءبىرى اياجانعا قاتتى باۋىر باسىپ قالعانى سونشالىق, تەك سونىڭ عانا بۇيرىعىن تىڭداپ, كەيدە ءتىپتى ءوز يەسىنە دە باعىنبايتىن بولعان.
كەيىپكەرىمىز قۇسبەگىلىك ونەر ارقىلى ەلىمىزدە ۇلتتىق سپورتتىڭ وسى ءتۇرىن مىقتاپ قولعا الۋدى جوسپارلاپ وتىر. ءتىپتى ول ءوزىنىڭ بۇل ونەرى تۋرالى ساعاتتاپ اڭگىمەلەۋگە بار. وسى كۇنگە دەيىن اياجان ەكى قۇستى باپتاپ ۇلگەرگەن. جىل بويى بىرنەشە رەت بۇركىتشىلەر سايىسىندا العىرلىعىمەن كوزگە ءتۇسىپ, فينالعا دەيىن جەتتى. قازىر قىران باپتاعان قىز رەسپۋبليكالىق تۋرنيردە جەڭىمپازدار قاتارىنان كورىنۋ ءۇشىن بارىن سالىپ, قىزۋ دايىندالىپ جاتىر.
