«قاراعاندى وبلىسىنداعى ي.ا. كوستەنكو اتىنداعى شاحتادا بولعان اپات سالدارىنان ادامداردىڭ قازا بولۋىنا بايلانىستى قازاقستان رەسپۋبليكاسىندا 2023 جىلعى 29 قازاندا جالپىۇلتتىق ازا تۇتۋ جاريالانسىن», دەلىنگەن پرەزيدەنت قاسىم-جومارت توقاەۆتىڭ وكىمىندە.
29 قازان كۇنگى ساعات 09:00-دە كەلىپ تۇسكەن اقپاراتقا سايكەس, كوستەنكو شاحتاسىندا كوز جۇمعاندار سانى 35-كە جەتتى.
ەسكە سالا كەتسەك, «ارسەلورميتتال تەمىرتاۋ» اق-عا قاراستى كوستەنكو شاحتاسىنان ءورت شىقتى.
پرەزيدەنت ۇكىمەتكە «ارسەلورميتتالتەمىرتاۋ» كومپانياسىمەن ينۆەستيتسيالىق ىنتىماقتاستىقتى توقتاتۋدى تاپسىردى.
باس پروكۋراتۋرا اتالعان ىسكە قاتىستى سوتقا دەيىنگى تەرگەپ-تەكسەرۋدى باستادى. مەملەكەت باسشىسىنىڭ تاپسىرماسىنا سايكەس پرەمەر-مينيستر ءاليحان سمايىلوۆتىڭ توراعالىعىمەن قاراعاندى وبلىسىندا «ارسەلورميتتال تەمىرتاۋ» اق-نىڭ كوستەنكو اتىنداعى شاحتاسىندا بولعان اپاتتىڭ سەبەپتەرىن تەرگەۋ جانە ونىڭ سالدارىن جويۋ جونىندەگى ۇكىمەتتىك كوميسسيا قۇرىلدى.
سونداي-اق مەملەكەت باسشىسى قاسىم-جومارت توقاەۆ اپاتتىڭ ءمان-جايىن انىقتاپ, ءتيىستى شەشىم قابىلداۋ ءۇشىن قاراعاندى وبلىسىنا باردى.
29 قازان ەلىمىزدە جالپىۇلتتىق ازا تۇتۋ كۇنى دەپ جاريالاندى.
