«ينتەگراتسيالىق بىرلەستىكتەرمەن جانە ەلدەرمەن جۇيەلى ديالوگتى جالعاستىرۋ ماڭىزدى. سەبەبى ولارمەن ىنتىماقتاستىق ورناتۋعا ەكونوميكالىق تۇرعىدا مۇددەلىمىز. كوميسسيا بىرىككەن اراب امىرلىكتەرىمەن, ۇندىستانمەن, مىسىرمەن, يندونەزيامەن, يزرايلمەن ەركىن ساۋدا ايماعى تۋرالى كەلىسىم جاساۋ جۇمىسىن جەدەل تۇردە اياقتاۋى كەرەك. ءبىز شىۇ, اسەان, مەركوسۋر جانە باسقا دا حالىقارالىق ۇيىمدارمەن اراداعى ءىس-ارەكەتتەردى ساپالى تۇردە كۇشەيتكەنىمىز ءجون», دەدى قاسىم-جومارت توقاەۆ ەۋرازيالىق ەكونوميكالىق وداقتىڭ پلەنارلىق سەسسياسىندا.
ول اتالعان ۇيىمدارمەن ىنتىماقتاستىقتى ارتتىرۋعا بۇكىل تاراپ مۇددەلى ەكەنىنە سەنىم ءبىلدىردى. سونداي-اق وداقتى قۇرۋداعى نەگىزگى ماقساتتىڭ ءبىرى – قۋاتتى, ۇيلەسىمدى ورتاق ۇستانىم نەگىزىندە ءۇشىنشى ەلدەرمەن بارىنشا ءتيىمدى ساۋدا شارتتارىنا قول جەتكىزۋ ەكەنىنە توقتالدى.
قازاقستان باسشىسىنىڭ ايتۋىنشا, قازىرگى گەوەكونوميكالىق جاعدايدا وداقتىڭ الەۋەتىن مەيلىنشە تولىق ءارى ءتيىمدى پايدالانۋ ورتاق باسىمدىققا اينالدى.
«قازىرگى گەوساياسي جاعدايدا قازاقستان, ءوزىنىڭ گەوگرافيالىق ورنالاسۋى مەن مۇمكىندىكتەرىن ەسكەرە وتىرىپ, ەۋرازيالىق ونەركاسىپتىك كووپەراتسيانى دامىتۋ ورتالىعى بولۋعا دايىن. بۇل ەلەكتروموبيل, ماگيسترالدى لوكوموتيۆ, ۆاگون, اۋىل شارۋاشىلىعىنا ارنالعان جانە جەڭىل تەحنيكا قۇراستىراتىن, قۇرىلىس ماتەريالدارى مەن حيميالىق بۇيىمدار وندىرەتىن بىرلەسكەن كاسىپورىندار بولۋى مۇمكىن. اتالعان باعىتتاردىڭ كوبى ءىس جۇزىندە جۇزەگە اسىرىلىپ جاتىر. سونداي-اق ءبىز قارا جانە ءتۇستى مەتالدار كەن ورنىن يگەرىپ, ونى ودان ءارى وڭدەيتىن, دايىن ونىمدەر شىعاراتىن بىرلەسكەن جوبالاردى جۇزەگە اسىرۋعا ءازىرمىز», دەدى ق.توقاەۆ.
ىنتىماقتاستىق ماسەلەسى تالقىلاندى
بەيسەنبى كۇنى ەۋرازيالىق كوشباسشىلار وڭىرلىك ەۋرازيالىق ەكونوميكالىق وداق (ەاەو) اياسىنداعى ىنتىماقتاستىقتى ودان ءارى جانداندىرۋ جولدارىن تالقىلادى.
ماسكەۋدە جوعارى ەۋرازيالىق ەكونوميكالىق كەڭەس وتىرىسىنا توراعالىق ەتكەن رەسەي پرەزيدەنتى ۆلاديمير پۋتين وداقتاعى ىنتىماقتاستىقتى جوعارى باعالادى. ونىڭ قارقىن العانىن, قالىپتاسىپ كەلە جاتقان كوپپوليارلى الەمنىڭ تاۋەلسىز جانە ءوزىن-ءوزى قامتاماسىز ەتەتىن ورتالىقتارىنىڭ ءبىرى رەتىندە ىلگەرىلەپ كەلە جاتقانىن ايتتى.
جوعارى ەۋرازيالىق ەكونوميكالىق كەڭەستىڭ جۇمىسىنا ازەربايجان, قازاقستان, وزبەكستان, قىرعىزستان, تاجىكستان, بەلارۋس پرەزيدەنتتەرى, ارمەنيا پرەمەر-ءمينيسترى قاتىستى.
قازاقستان پرەزيدەنتى قاسىم-جومارت توقاەۆ ءوز سوزىندە بلوكتىڭ جاڭا حالىقارالىق كولىك كۇرە باعىتىن قۇرۋى مۇمكىن ەكەنىن ايتتى. ق.توقاەۆ ءۇندىستان مەن ەۋروپا اراسىنداعى 7 200 شاقىرىمدىق (4 473 ميل) «سولتۇستىك-وڭتۇستىك» حالىقارالىق كولىك ءدالىزىن (INSTC) ترانسكاسپي باعىتىمەن بىرگە دامىتۋ قاجەت ەكەنىنە توقتالدى.
«ەۋرازيالىق ەكونوميكالىق وداقتىڭ ەۋروپا مەن ازيانى, جاھاندىق وڭتۇستىك پەن سولتۇستىكتى بايلانىستىرۋشى توراپقا اينالاتىنىنا سەنىم بىلدىرەمىن. ءبىز رەسەي فەدەراتسياسىنىڭ قىتاي, ءۇندىستان, پاكىستان, يران, تاياۋ شىعىس جانە وڭتۇستىك-شىعىس ازيا ەلدەرىمەن ارادا كولىك دالىزدەرىن اشۋ نيەتىن قۇپتايمىز», دەدى توقاەۆ.
ۇيىمدى سىنعا الدى
قازاقستان پرەزيدەنتى قاسىم-جومارت توقاەۆ ەۋرازيالىق ەكونوميكالىق وداقتى (ەاەو) سىنعا الىپ, ونىڭ مۇشەلەرى اراسىنداعى ساياسي ينتەگراتسياعا قاتىستى پىكىر ءبىلدىردى.
قازاقستان مۇنايعا باي مەملەكەت, ءداستۇرلى تۇردە ماسكەۋدىڭ ورتالىق ازياداعى ەڭ جاقىن وداقتاسى سانالادى.
ماسكەۋدە وتكەن ەاەو پلەنارلىق وتىرىسىندا سويلەگەن سوزىندە پرەزيدەنت قاسىم-جومارت توقاەۆ قازاقستان وداقتى تەك قانا ەكونوميكالىق بلوك رەتىندە قاراستىراتىنىن ايتتى.
