مۇنى مەملەكەت باسشىسى دا اتاپ ءوتتى. ياعني ءبىز ەتنوس ۇعىمىنان الدەقايدا جوعارى ۇلت ۇعىمىنا بىرىگەمىز. جاڭا داۋىرگە قادام باسقان قازاقستاننىڭ بولاشاعىن بىرگە قۇرۋىمىز كەرەك. شىن مانىسىندە, اسسامبلەيانىڭ ەڭ باستى ماقساتى – حالىقتىڭ بىرلىگى مەن تاتۋلىعىن قامتاماسىز ەتۋ جانە ءوزارا مادەنيەتارالىق بايلانىستا ۇلت نەگىزدەرىن نىعايتۋ.
اسسامبلەيا – قايتالانباس ەرەكشە ينستيتۋت. ول مەملەكەتتىك نە ەتنوسارالىق قارىم-قاتىناستاردى رەتتەيتىن ۋاكىلەتتى ورگان ەمەس. بۇل – كونسۋلتاتيۆتى ورگان. ياعني اسسامبلەيا ءوزىنىڭ ءىس-ارەكەتتەرى ارقىلى ازاماتتاردىڭ سانا-سەزىمىنە, ولارعا مەملەكەتقۇراۋشى بولمىستى ەنگىزۋگە ىقپالداساتىن بىردەن-ءبىر ورتا.
جيىننىڭ ءبىرىنشى كۇنى بۇل ماسەلەلەر جان-جاقتى تالقىلاندى. مەملەكەتتىك ءتىلدىڭ مارتەبەسى تۋرالى كوپ ايتىلدى. باسقا ەتنوس وكىلدەرى تاراپىنان ء«بىلىم بەرۋ وشاقتارى, اسىرەسە بالاباقشا مەن مەكتەپ قازاق تىلىندە وقىتۋدى جۇيەلەسە» دەگەن تەزيستەر ايتىلدى. دەمەك بۇل ولار ءۇشىن قازاق ءتىلىنىڭ ماڭىزدى ەكەنىن كورسەتەدى.
قوعامدا «اسسامبلەيا تەك باسقا ەتنوسقا كەرەك» دەگەن پىكىرلەر ايتىلىپ قالادى. بۇل – قاتە ۇعىم. اسسامبلەيا بارىمىزگە دە كەرەك. ول تاتۋلىقتى, مادەنيەتارالىق بايلانىستى, ءبىر-ءبىرىمىزدىڭ قۇقىقتارىمىز بەن ەرەكشەلىكتەرىمىزدى قۇرمەتتەۋگە كومەكتەسەدى. كونسۋلتاتيۆتى ورگان ەلىمىزدەگى دياسپورا وكىلدەرىنىڭ قازاق ءتىلىن ۇيرەنۋگە دەگەن ىنتاسىن ارتتىرىپ, ناتيجە شىعارادى. اسسامبلەيانىڭ پرەزيدەنت ايقىنداپ كەتكەن باستى ءبىر باعىتى – بارلىق ەتنوستى قازاق ۇلتىنىڭ اياسىنا ۇيىستىرۋ.
ينديرا رىستينا,
قازاقستان حالقى
اسسامبلەياسى حاتشىلىعى
مەڭگەرۋشىسىنىڭ ورىنباسارى
