بۇل – شىندىق. مۇنىڭ سەبەبىن مەكتەپتەگى جانە جوعارى وقۋ ورنىنداعى مۇعالىمدەر مەن وقىتۋشىلاردىڭ ساپالىق قۇرامىنىڭ تومەندەپ كەۋىنەن ىزدەۋ كەرەك شىعار. ءوز باسىم عىلىمي جۇمىسپەن اينالاسا ءجۇرىپ مەكتەپتەن قول ۇزگەن ەمەسپىن. جاسىراتىنى جوق, وسىدان 20-25 جىل بۇرىنعى ءبىلىم بەرۋدىڭ ساپا دەڭگەيىنە جەتە الماي وتىرمىز. سەبەبى قازىر ساپا ەمەس, سان قۋىپ, وتىرىك اقپارات بەرۋ بەلەڭ الىپ كەتتى. بۇعان قوسا مەكتەپ تە, جوعارى وقۋ ورىندارى دا قاعازباستىلىقتان كوز اشپاي كەلەدى. اسىرەسە باستاۋىش ءبىلىم بەرۋ جۇيەسى سىن كوتەرمەيدى. بىرىنشىدەن, جوعارى وقۋ ورىندارىندا باستاۋىش سىنىپ مۇعالىمدەرى ساپاسىز دايارلانادى. ءبىلىمنىڭ نەگىزى – باستاۋىش سىنىپتا. ەكىنشىدەن, مەكتەپ وقۋلىقتارىندا ولقىلىق كوپ. وكىنىشتىسى, وقۋلىقتاردى جازۋشىلار مەكتەپتە جۇمىس ىستەپ كورمەگەن, وقۋشىلاردىڭ جاس جانە پسيحولوگيالىق ەرەكشەلىكتەرىن بىلە بەرمەيدى. ۇشىنشىدەن, بۇگىنگى تاڭدا كوپتەگەن مەكتەپتە وقۋ ورداسىنىڭ باسشىلارى مەن مەڭگەرۋشىلەرى ءوز پاندەرى بويىنشا ساباق بەرە المايدى. ەندەشە, ولار مۇعالىمدەردەن قالاي ءبىلىم ساپاسىن تالاپ ەتە الادى؟!
مەملەكەت باسشىسىنىڭ «مۇعالىم تاپشىلىعىن جەلەۋ ەتىپ, مەكتەپكە كەز كەلگەن ادامدى جۇمىسقا الا بەرۋگە بولمايدى. مۇنداي ارەكەت ۇستازداردىڭ بىلىكتىلىك دەڭگەيىن كۇرت تومەندەتەدى. سول سەبەپتى مۇعالىم دايارلاۋ ءىسىن جەتىلدىرۋ ءۇشىن ناقتى ءىس-شارالار قابىلداۋ قاجەت. بۇل – وسكەلەڭ ۇرپاقتىڭ بولاشاعىنا بايلانىستى وتە ماڭىزدى مىندەت» دەگەن پىكىرى دە وتە ورىندى. ول ءۇشىن ەڭ الدىمەن جوعارى وقۋ ورنىنا تۇسەتىن مامانداردى ونەر, جۋرناليستيكا سالاسىنداعى تارتىپپەن قابىلداۋ قاجەت. ياعني مۇعالىمدىك ماماندىقتى تاڭداعان تالاپكەردىڭ تىم قۇرىعاندا سول ماماندىققا يكەمدىلىگى, ساۋاتتى سويلەۋ, ساۋاتتى جازا ءبىلۋ داعدىسى بولۋى قاجەت.
سونىمەن قاتار قاسىم-جومارت توقاەۆتىڭ مىنا ءبىر پىكىرى اسا قۇپتارلىق: «بىزدە پرەزيدەنتتىك جاستار كادر رەزەرۆى بار. ءدال سول سياقتى ءبىلىم سالاسىنا وزگەرىس اكەلەتىن 1 مىڭ مامان ارنايى دايىندىقتان وتەتىن بولادى. وسىعان وراي ءتيىستى باعدارلاما قابىلدانادى. كادر ماسەلەسى جوعارى ءبىلىم بەرۋ جۇيەسى ءۇشىن دە وتە وزەكتى». قورىتا ايتقاندا, پرەزيدەنت ايتقان پىكىرلەردىڭ ۇدەسىنەن شىعۋ جاس ۇرپاققا ءبىلىم بەرەتىن ءاربىر مۇعالىمنىڭ جادىندا بولۋعا ءتيىستى تۇششىمدى ويلار.
نۇرشا ورازاحىنوۆا,
پەداگوگيكا عىلىمدارىنىڭ دوكتورى, پروفەسسور
