تسيفرلى تەحنولوگيالاردى ەنگىزەتىن كاسىپورىنداردىڭ شىعىنى وتەلەدى

«ونەركاسىپتى تسيفرلى ترانسفورماتسيالاۋ» سەسسياسى شەڭبەرىندە يندۋستريا 4.0 ەلەمەنتتەرىنە بايلانىستى كورسەتىلەتىن مەملەكەتتىك قولداۋ مەن رەتتەۋ جولدارى، سونداي-اق ءوندىرىس ورىندارىندا تسيفرلى جوبالاردى دامىتىپ، ەنگىزۋ كەزىندە تۋىندايتىن وزەكتى ماسەلەلەر تالقىلاندى.

فورۋم بارىسىندا قازاقستان مەن شەتەلدىك كومپانيالاردىڭ ماماندارى وسى باعىت بويىنشا ءوز ويلارىن ورتاعا سالدى. اتاپ ايتقاندا، «الليۋر» كومپانيالار توبى» اق، Tesla، Faceplate، CEO Geometry سىندى ءىرى كومپانيالارىنىڭ وكىلدەرى ونەركاسىپتى زاماناۋي تۇرعىدا ىلگەرىلەتۋ جونىندەگى تاجىريبەلەرىمەن ءبولىستى.

اشىق ديالوگ الاڭىندا يدم باسشىسىنىڭ ورىنباسارى تسيفرلى تەحنولوگيالاردى ونەركاسىپكە ەنگىزەتىن كاسىپورىنداردى ىنتالاندىرۋعا بايلانىستى مينيسترلىك ءتيىستى زاڭ اكتىلەرىنە وزگەرىستەر مەن تولىقتىرۋلار ەنگىزىلگەنىن، سونداي-اق IT-شەشىمدەردى ازىرلەپ، ەنگىزەتىن ءوندىرىس ورىندارى شامامەن 60 ملن تەڭگەگە دەيىنگى سومادا جۇمسالاتىن شىعىنداردىڭ 40%-دان 50%-عا وتەي الاتىنىن جەتكىزدى.

بۇل رەتتە، Digital Almaty – ەلىمىزدىڭ وڭتۇستىگىندە ورنالاسقان مەگاپوليستە جىل سايىن وتكىزىلىپ تۇراتىن جانە بيزنەس وكىلدەرىنىڭ، حالىقارالىق ساراپشىلاردىڭ، IT-قاۋىمداستىق پەن مەملەكەتتىك ورگاندار مەن باق وكىلدەرىنىڭ باسىن قوساتىن ءىرى تەحنولوگيالىق ءىس-شاراعا اينالعانىن ايتا كەتەيىك.