فوتو: اقوردا
قاسىم-جومارت توقاەۆ كونستيتۋتسيادا تاريحي-مادەني مۇرامىزدى ساقتاۋ ماسەلەسىنە دە باسا نازار اۋدارىلعانىن جەتكىزدى.
«ەندى مادەنيەت سالاسىن قولداۋ – مەملەكەتتىڭ كونستيتۋتسيالىق مىندەتى. قازىر بۇل باعىتتا اۋقىمدى شارۋا جاسالىپ جاتىر. مەن مەملەكەت باسشىسى رەتىندە ۇلت رۋحانياتىنا ادال قىزمەت ەتىپ جۇرگەن مامانداردىڭ الەۋمەتتىك جاعدايىن جاقسارتۋعا ەرەكشە ءمان بەرىپ وتىرمىن. ماسەلەن, سوڭعى بەس جىلدا ولاردىڭ جالاقىسى ەكى ەسە ۇلعايدى. بيىلدان باستاپ ونەرپازدارعا بەرىلەتىن مەملەكەتتىك ستيپەنديا كولەمى ەكى ەسە وسەدى. تەك بىلتىردىڭ وزىندە ەلىمىزدە 61 مادەنيەت نىسانى سالىندى. 250-دەن استام مەكەمەگە جوندەۋ جۇمىستارى جۇرگىزىلدى. وتكەن جىلى پرەزيدەنت جارلىعىمەن ءۇش بىردەي مۇراجايعا «ۇلتتىق» مارتەبە بەرىلدى. بۇل جۇمىس بيىل دا جالعاسىن تابادى. مەنىڭشە, ماكسيم گوركي اتىنداعى مەملەكەتتىك اكادەميالىق ورىس دراما تەاترىنا جانە ەركەعالي راحماديەۆ اتىنداعى مەملەكەتتىك اكادەميالىق فيلارمونياعا «ۇلتتىق» مارتەبە بەرىلسە, ورىندى بولار ەدى. سونداي-اق ءسابيت مۇقانوۆ اتىنداعى وبلىستىق قازاق مۋزىكالىق-دراما تەاترىنا «اكادەميالىق» مارتەبە بەرۋ كەرەك دەپ ەسەپتەيمىن. اتالعان ونەر ۇجىمدارى تۇتاس ەلىمىزدىڭ رۋحاني مۇراسىن بايىتۋعا ولشەۋسىز ۇلەس قوسىپ كەلەدى», دەدى پرەزيدەنت.
قاسىم-جومارت توقاەۆ: قازاق – ونەردىڭ كيەسىن ۇعاتىن, ونەرپازدىڭ قادىرىن بىلەتىن جۇرت
