مارتەبەلى مەيماندى قارسى العان ەرلان قوشانوۆ قازاق پەن قىرعىز حالىقتارىن ورتاق تاريح پەن رۋحاني-مادەني قۇندىلىقتار, سونداي-اق عاسىرلار بويعى باۋىرلاستىق بىرىكتىرەتىنىن اتاپ ءوتتى. سوندىقتان بۇگىنگى تاڭدا ەكى ەل اراسىندا بەرىك بايلانىس ورناعان. ءبىزدىڭ حالىقتارىمىزدىڭ بولاشاعىن دا ءبولىپ قاراستىرۋعا بولمايدى.
– پرەزيدەنتتەرىمىز قاسىم-جومارت توقاەۆ پەن سادىر جاپاروۆتىڭ ساياسي ەرىك-جىگەرىنىڭ, سىندارلى ساياساتىنىڭ ارقاسىندا قارىم-قاتىناسىمىز قارقىندى دامىپ كەلەدى. مەملەكەتتەرىمىزدىڭ باسشىلارى دوستىقتى بەكەمدەپ, بىرلەسە دامۋ ءۇشىن قولدان كەلگەننىڭ ءبارىن جاساپ جاتىر. ىنتىماقتاستىقتىڭ وداقتاستىق سيپاتىن جوعارى دەڭگەيدەگى كەزدەسۋلەر ايشىقتاپ وتىر. ءبىز ءوز تاراپىمىزدان مەملەكەتتەرىمىزدىڭ باسشىلارى اراسىنداعى ۋاعدالاستىقتاردى زاڭنامالىق تۇرعىدان قامتاماسىز ەتۋ ءۇشىن پارلامەنتارالىق ىقپالداستىقتى ودان ءارى نىعايتۋعا مۇددەلىمىز, – دەدى ءماجىلىس سپيكەرى.
سونىمەن قاتار ەرلان قوشانوۆ پارلامەنتارالىق ىنتىماقتاستىق كەڭەسىنىڭ ءرولى ەرەكشە ەكەنىنە نازار اۋداردى. وندا پارلامەنتتەر باسشىلارى دەڭگەيىندە ارىپتەستىكتىڭ ماڭىزدى تاقىرىپتارى تۇراقتى تۇردە كوتەرىلىپ ءجۇر. ءماجىلىس توراعاسىنىڭ پىكىرىنشە, ەكى ەل دەپۋتاتتارى تۋىنداعان بارلىق ماسەلەنى دوستىق توپتارى مەن سالالىق كوميتەتتەر دەڭگەيىندە تالقىلاي وتىرىپ, ۋاقتىلى شەشىلۋىنە ەلەۋلى ۇلەس قوسىپ كەلەدى.
اڭگىمە بارىسىندا تاراپتار تمد پارلامەنتارالىق اسسامبلەياسى, ۇقشۇ پارلامەنتتىك اسسامبلەياسى, ەقىۇ پارلامەنتتىك اسسامبلەياسى جانە تۇركپا سياقتى كوپجاقتى پارلامەنتتىك الاڭدارداعى ءتيىمدى ىنتىماقتاستىققا دا توقتالدى.
ەرلان قوشانوۆ قىرعىز ارىپتەسىنە كەيىنگى جىلدارى قازاقستاندا پرەزيدەنت قاسىم-جومارت توقاەۆتىڭ باستاماسىمەن جۇيەلى تۇردە جۇزەگە اسىرىلىپ جاتقان اۋقىمدى ساياسي رەفورمالار تۋرالى مالىمەت بەردى. وسى باعىتتاعى نەگىزگى قادامنىڭ ءبىرى جالپىحالىقتىق رەفەرەندۋمدا جاڭا كونستيتۋتسيانىڭ قابىلدانۋى جانە ونىڭ قاعيداتتارىنىڭ كەيىننەن پارلامەنت قابىلداعان زاڭداردا بەكىتىلۋى بولدى. اتاپ ايتقاندا, جوگوركۋ كەنەش دەپۋتاتتارى «پرەزيدەنت تۋرالى», «قۇرىلتاي جانە ونىڭ دەپۋتاتتارىنىڭ مارتەبەسى تۋرالى», «قازاقستان حالىق كەڭەسى تۋرالى» جانە باسقا دا كونستيتۋتسيالىق زاڭداردىڭ نەگىزگى ەرەجەلەرىمەن تانىستى.
ءوز كەزەگىندە مارلەن ماماتاليەۆ قازاقستاندىق ارىپتەستەرىنە قوناقجايلىعى ءۇشىن العىس ايتىپ, الداعى تامىز ايىنداعى قۇرىلتاي دەپۋتاتتارىنىڭ سايلاۋىنا دايىندىق جۇرگىزۋ جانە وتكىزۋ ىسىنە تابىس تىلەدى.
ساۋدا-ەكونوميكالىق ىنتىماقتاستىقتى ءسوز ەتكەن قىرعىزستان پارلامەنتىنىڭ باسشىسى ەكىجاقتى تاۋار اينالىمىنىڭ قازىرگى سەرپىنىنە قاناعاتتاناتىنىن ايتىپ, يندۋستريالاندىرۋ, اۋىل شارۋاشىلىعى, تۋريزم جانە «جاسىل» ەنەرگەتيكا سالالارىنداعى سەرىكتەستىكتى تەرەڭدەتۋ پەرسپەكتيۆالارىنا توقتالدى.
كەزدەسۋ بارىسىندا تاراپتار زاڭ شىعارۋ سالاسىندا تاجىريبە الماسۋدى جانە ءوڭىر ءۇشىن وزەكتى ماسەلەلەر بويىنشا ديالوگتى جالعاستىرۋعا ۋاعدالاستى. اتاپ ايتقاندا, ازىق-ت ۇلىك قاۋىپسىزدىگى, سۋ جانە ەنەرگەتيكا سالالارىنداعى ىنتىماقتاستىق ماسەلەلەرى قارالدى.
ەكىجاقتى ىنتىماقتاستىقتى نىعايتۋدىڭ تاعى ءبىر ماڭىزدى باعىتى رەتىندە تسيفرلاندىرۋ جانە جاساندى ينتەللەكتىنى دامىتۋ جايى ايقىندالدى. ەرلان قوشانوۆ ول ءۇشىن قازاقستان مەن قىرعىزستاننىڭ قاجەتتى قۇقىقتىق جانە ينستيتۋتسيونالدىق نەگىزى دايىن ەكەنىن اتاپ ءوتتى. ەكى ەلدە دە تسيفرلىق كودەكس قابىلدانىپ, جاساندى ينتەللەكتىگە نەگىزدەلگەن يننوۆاتسيالىق جوبالار مەملەكەتتىك ورگانداردىڭ جۇمىسىنا بەلسەندى تۇردە ەنگىزىلىپ جاتىر. بۇل رەتتە تاراپتار وسى سالادا دا تاجىريبە الماسۋعا كەلىستى.
قىرعىز پارلامەنتى دەلەگاتسياسىنىڭ باعدارلاماسىندا رەسمي كەزدەسۋلەردەن بولەك, «Alem.ai» جاساندى ينتەللەكت ورتالىعىنا, «استانا» حالىقارالىق قارجى ورتالىعىنا بارۋ جانە ەلورداداعى مادەني نىسانداردى ارالاۋ جوسپارلانعان.
