«وسكەمەن تيتان-ماگني كومبيناتى» اق – شيكىزات وندىرۋدەن باستاپ دايىن ءونىم شىعارۋعا دەيىنگى تولىق وندىرىستىك تسيكلدى قامتيتىن الەمدەگى ەڭ ءىرى تىگىنەن ينتەگراتسيالانعان تيتان وندىرۋشىلەردىڭ ءبىرى. 2025 جىلدىڭ قورىتىندىسىندا شامامەن 87 ملرد تەڭگەگە 12 مىڭ توننا تيتان ساتىلدى. بيىل تيتان قۇيمالارى مەن قورىتپالارى ءوندىرىسى 7%-عا وسپەك. كاسىپورىن ونىمدەرى اەروعارىش سالاسىندا, مۇناي-حيميا جانە اتوم ونەركاسىبىندە, مەديتسينا مەن كەمە جاساۋ وندىرىسىندە قولدانىلادى. وتاندىق تيتاننىڭ اەروعارىش سالاسىنىڭ جاھاندىق نارىعىنداعى ۇلەسى شامامەن 20%-دى قۇرايدى. وسكەمەن تيتان-ماگني كومبيناتى – «Boeing», «Airbus», «Safran», «Rolls-Royce», «TIMET», «Howmet Aerospace», «Dynamet», «PCC» جانە «POSCO» سياقتى جەتەكشى حالىقارالىق ونەركاسىپتىك كورپوراتسيالاردىڭ بەكىتىلگەن جەتكىزۋشىسى.
وتمك-ءنىڭ 2033 جىلعا دەيىنگى ينۆەستيتسيالىق باعدارلاماسىنا نازار اۋدارىلدى. وعان جالپى سوماسى 255,5 ملرد تەڭگە بولاتىن 25 جوبا كىرەدى. ولاردىڭ ىشىندە, كاسىپورىننىڭ جوبالىق قۋاتىن جىلىنا 10 مىڭ تونناعا ۇلعايتا وتىرىپ, كەۋەكتى تيتان ءوندىرۋ بويىنشا جاڭا تسەح سالۋ, گاز تازارتۋ جابدىعىن جاڭعىرتۋ, بىرىڭعاي ونەركاسىپتىك MES-جۇيەسىن ەنگىزۋ, سونداي-اق وندىرىستىك دەرەكتەردى, ەنەرگيانى تۇتىنۋدى, تەحنولوگيالىق باقىلاۋدى جانە ونەركاسىپتىك قاۋىپسىزدىكتى تالداۋ ءۇشىن جاساندى ينتەللەكتى مەن تالداۋ پلاتفورماسىن ىسكە قوسۋ بار. وسى جوبالاردى جۇزەگە اسىرۋ ءونىمنىڭ وزىندىك قۇنىن تومەندەتۋگە, ەنەرگيا تيىمدىلىگىن ارتتىرۋعا جانە كاسىپورىننىڭ وندىرىستىك قۋاتىن كەڭەيتۋگە مۇمكىندىك بەرەدى.
بۇعان قوسا شيكىزات بازاسىن قامتاماسىز ەتۋ, حالىقارالىق ونەركاسىپتىك كووپەراتسيانى دامىتۋ, ەكسپورتتىق الەۋەتتى ساقتاۋ جانە سىرتقى نارىقتاردا تيتان ونىمدەرىنىڭ باسەكەگە قابىلەتتىلىگىن ارتتىرۋ ماسەلەلەرى قارالدى.
ولجاس بەكتەنوۆ وتمك-ءنى دامىتۋ مەملەكەت باسشىسىنىڭ وڭدەۋ ونەركاسىبىن نىعايتۋ, جوعارى قايتا ءبولۋ ونىمدەرىن شىعارۋ جانە قازاقستاندى جاھاندىق وندىرىستىك تىزبەكتەرگە ەنگىزۋ بويىنشا قويعان مىندەتتەرىنە سايكەس كەلەتىنىن اتاپ ءوتتى.
