فوتو: اشىق دەرەككوز
ۆەدومستۆونىڭ مالىمەتىنشە, گەرمانيا تاراپى ەكستراديتسيادان باس تارتۋ سەبەبىن تۇسىندىرمەگەن. سوعان قاراماستان, دۇيسەنوۆكە قاتىستى حالىقارالىق ىزدەۋ توقتاتىلماعان جانە قىلمىستىق قۋدالاۋ جالعاسىپ جاتىر.
«گەرمانيا تاراپى ونى بەرۋ تۋرالى ءوتىنىشتى قاناعاتتاندىرمادى. الايدا ىزدەۋ شارالارى توقتاتىلعان جوق. قازىرگى ۋاقىتتا ءىس بويىنشا ءمان-جايدى انىقتاۋعا باعىتتالعان جۇمىستار جۇرگىزىلىپ جاتىر, سونىڭ ىشىندە شەتەلدىك قۇزىرلى ورگاندارمەن ءوزارا ءىس-قيمىل جاسالۋدا», دەپ حابارلادى باس پروكۋراتۋرا.
تەرگەۋ مۇددەسىنە بايلانىستى وزگە اقپارات جاريالانبايتىنى ايتىلدى.
ماقسات دۇيسەنوۆ 2018 جىلدىڭ تامىزىنان 2019 جىلدىڭ ساۋىرىنە دەيىن باس كولىك پروكۋرورى قىزمەتىن اتقارعان. ول بىلتىر 29 تامىزدا حالىقارالىق ىزدەۋگە جاريالانعان. كەيىن گەرمانيانىڭ قۇقىق قورعاۋ ورگاندارى ينتەرپول جەلىسى ارقىلى حالىقارالىق ىنتىماقتاستىق اياسىندا قاماۋعا العانى بەلگىلى بولدى.
2025 جىلدىڭ قازان ايىندا دۇيسەنوۆتىڭ گەرمانيادان قازاقستانعا ەكستراديتسيالاناتىنى حابارلانعان ەدى. الايدا كەيبىر بۇقارالىق اقپارات قۇرالدارى ونىڭ ساياسي باسپانا سۇراۋى مۇمكىن ەكەنىن جازعان.
سول كەزدە باس پروكۋروردىڭ ورىنباسارى عالىمجان قويگەلديەۆ ەكستراديتسيا پروتسەسى باستالعانىن مالىمدەگەن بولاتىن.
«ەكستراديتسيا پروتسەسى ىسكە قوسىلدى. گەرمانيا تاراپىنان باس تارتۋ بولعان جوق. قازىرگى ۋاقىتتا ونى ەلگە قايتارۋ باعىتىندا جۇمىس جۇرگىزىلىپ جاتىر», دەگەن ەدى ول.
ايتا كەتەيىك, قازاقستان مەن ماكاو ەكستراديتسيا تۋرالى كەلىسىمگە قول قويدى.
باس پروكۋراتۋرا بىرنەشە مارتە كولىك ساتامىن دەپ حالىقتى الداعان ەل ازاماتىن قىلمىستىق جاۋاپكەرشىلىككە تارتۋ ماقساتىندا رەسەي فەدەراتسياسى اۋماعىنان ەكستراديتسيالادى.
سونداي-اق 230 مىڭ دوللار جىمقىرعان بۋحگالتەر گرەكيادان ەكستراديتسيالاندى.
