فوتو: اقوردا
پرەزيدەنتتىڭ ايتۋىنشا, كىتاپ وقۋ – وركەنيەتتى قوعام قۇرىپ, وزىق ويلى ۇلت بولۋدىڭ ەڭ توتە جولى. سوندىقتان ەل ىشىندە, اسىرەسە, جاستار اراسىندا كىتاپ وقۋ مادەنيەتىن كەڭىنەن دارىپتەۋ كەرەك.
«مەن وتكەن اپتادا كىتاپ وقۋ مادەنيەتىن دامىتۋ جانە زەردەلى ۇلت قالىپتاستىرۋ جونىندەگى شارالار تۋرالى ارنايى جارلىققا قول قويدىم. وسى ماڭىزدى قۇجاتتىڭ نەگىزگى ماقساتى – ۇلت ساپاسىن ارتتىرۋ, ياعني, ادام كاپيتالىن دامىتۋ, قوعامنىڭ زياتكەرلىك جانە مادەني الەۋەتىن نىعايتۋ. ۇكىمەتكە وسى باعىتتار بويىنشا ناقتى شارالاردى ىسكە اسىرۋدى, سونىڭ ىشىندە كىتاپحانا جانە كىتاپ شىعارۋ ءىسىن زاڭ تۇرعىسىنان قامتاماسىز ەتۋدى تاپسىرامىن. سونىمەن قاتار «زەردەلى ۇلت» تۇجىرىمداماسى بەكىتىلەدى, «جىلدىڭ ون وقىرمانى» رەسپۋبليكالىق جوباسى وتكىزىلەتىن بولادى. بارشاعا قولجەتىمدى ۇلتتىق تسيفرلىق كىتاپحانا پلاتفورماسى ىسكە قوسىلادى», دەدى مەملەكەت باسشىسى.
پرەزيدەنتتىڭ سوزىنشە, باسقا دا تىڭ باستامالار جۇزەگە اسادى.
«بۇل جۇمىسقا تۇتاس قوعاممەن بىرگە مادەنيەت سالاسىنىڭ قىزمەتكەرلەرى, اسىرەسە, كىتاپحاناشىلار, باسپاگەرلەر بەلسەنە اتسالىسادى دەپ ويلايمىن. سونىمەن بىرگە مەن جاقىندا ەلىمىزدىڭ ورتا ءبىلىم بەرۋ جۇيەسىنە جاساندى ينتەللەكتىنى ەندىرۋ جونىندەگى شارالار تۋرالى جارلىققا قول قويدىم. مەنىڭشە, بۇل – شىن مانىندە اسا وزەكتى جانە قاجەتتى قادام. قازىرگى تەحنولوگيا ءداۋىرىنىڭ قارقىنى وتە جىلدام. سوندىقتان مۇنداي ماڭىزدى شەشىمدى دەر كەزىندە قابىلداماساق, جاستارىمىز دامۋدىڭ داڭعىل جولىنا تۇسە الماي, ارتتا قالىپ قويۋى مۇمكىن. ال بۇل مەملەكەتىمىزدىڭ كەلەشەگى ءۇشىن اسا قاۋىپتى ەكەنى ايتپاسا دا تۇسىنىكتى. ءبىز, ارينە, وندايعا جول بەرمەيمىز», دەدى قاسىم-جومارت توقاەۆ.
بۇگىنگى ماراپاتتاۋ راسىمىندە ونەرپازدارعا بەرىلەتىن مەملەكەتتىك ستيپەنديا ەكى ەسە وسەتىنى ايتىلدى.
