فوتو: اقوردا
«مەن شاعىن باياندامامدا ءوز كوزقاراسىمدى جەتكىزدىم. ونى بىلىكتى تاريحشىلار مەن مادەنيەتتانۋشىلاردىڭ, قۇقىقتانۋشىلاردىڭ ەۋرازيا كەڭىستىگىندەگى تاريحي ۇدەرىستەردىڭ ءتۇرلى اسپەكتىسىنە قاتىستى كاسىبي تالقىسىنا سالۋعا بولادى دەپ ويلايمىن. الايدا بۇل اقپاراتتى بۇرا تارتاتىن ساۋاتسىزدارعا قول ەمەس», دەدى پرەزيدەنت.
مەملەكەت باسشىسى ماۋسىم ايىنىڭ العاشقى ونكۇندىگىندە III ارحيۆشىلەر كونگرەسى وتەتىنىن اتاپ ءوتتى.
«بيىلعى باسقوسۋ جاپپاي تسيفرلاندىرۋ مەن جاساندى ينتەللەكت داۋىرىندە تاريحي-مادەني جانە دەرەكتى مۇرانى ساقتاۋ ماسەلەسىنە ارنالادى. ءبىز – مادەنيەتىمىز ءارالۋان, باۋىرمال ءارى كەڭپەيىل حالىقپىز. ەۋرازيا كەڭىستىگىندە ماڭىزدى ورىن الاتىن جانە اتالعان سۋبكونتينەنتتە جان-جاقتى قاۋىپسىزدىك جۇيەسىن قالىپتاستىرۋعا اتسالىسىپ جاتقان پروگرەسسيۆتى, بەيبىتسۇيگىش ەل رەتىندە قازاقستاننىڭ حالىقارالىق بەدەلىن ارتتىرۋ ءۇشىن وسى مادەني ەرەكشەلىكتى جان-جاقتى دارىپتەۋدىڭ ءمانى زور. سونىمەن قاتار جاستارىمىزدى جاڭا گەوساياسي جانە گەوەكونوميكالىق جاعدايداعى قاتاڭ, ءتىپتى, قاتىگەز باسەكەلەس ورتادا بارىنشا تابىسقا جەتۋگە قازىردەن باستاپ دايارلاۋىمىز كەرەك. بۇل – ءبىزدىڭ باستى مىندەتىمىز» دەدى پرەزيدەنت.
ەسكە سالا كەتەيىك, مەملەكەت باسشىسى مادەنيەت جانە ونەر قىزمەتكەرلەرىن ماراپاتتاۋ راسىمىندە ءسوز سويلەپ, «اسىل مۇرا» ۇلتتىق سىيلىعى تاعايىندالاتىنىن ايتتى.
