وسكەمەن قالاسىندا جەدەل-ىزدەستىرۋ ءىس-شارالارىنىڭ بارىسىندا اۋىر قىلمىس جاساعانى ءۇشىن ۇزاق ۋاقىت بويى تاجىكستان رەسپۋبليكاسىنىڭ قۇقىق قورعاۋ ورگاندارىنان جاسىرىنىپ جۇرگەن قىلمىسكەر ۇستالدى. 27 جاستاعى جىگىت الاياقتىق جاساعانى ءۇشىن قىلمىستىق قۋدالاۋدان جاسىرىنىپ جۇرگەن.
2021 جىلدىڭ تامىز ايىندا جابىرلەنۋشىگە لاتۆيا رەسپۋبليكاسىنا ۆيزا الىپ, كورسەتىلگەن ەلگە جىبەرەمىن دەگەن جەلەۋمەن سەنىمىنە كىرىپ, قاسكۇنەم ودان الاياقتىق جولمەن 2 325 اقش دوللارىن العان. وعان قاتىستى تاجىكستان رەسپۋبليكاسى ىشكى ىستەر مينيسترلىگىنىڭ سوعدى وبلىسى بويىنشا دەپارتامەنتى تاجىكستان رەسپۋبليكاسى قىلمىستىق كودەكسىنىڭ 247-بابىنىڭ 2-بولىگى بويىنشا بۇلتارتپاۋ شاراسىن تاڭداۋ ارقىلى ىزدەۋ ءىسىن باستادى.
ءبىراز ۋاقىتتان كەيىن ايىپتالۋشىنىڭ قازاقستان اۋماعىندا جۇرگەنى انىقتالدى. بيىلعى جىلدىڭ قاڭتار ايىندا ىزدەۋدە جۇرگەن ازامات ۇستالىپ, تاجىكستان رەسپۋبليكاسىنا دەپورتاتسيالاندى.
