وڭىردە جەدەل رەسپيراتورلى ۆيرۋستىق ينفەكتسيالار (جرۆي) جانە تۇماۋ بويىنشا احۋال تۇراقتى دەپ ەسەپتەلەدى. بىلتىر ءدال وسى كەزەڭدە اۋىرعانداردىڭ سانى مىڭنان اسىپ كەتسە, بيىلعى كورسەتكىش ءسال ازىراق. ءارى جرۆي دياگنوزى ازىرشە ەشكىمگە قويىلماعان. پاۆلودار وبلىستىق دەنساۋلىق ساقتاۋ باسقارماسىنىڭ باستاپقى مەديتسينالىق-سانيتارلىق كومەك كورسەتۋ جانە ەمدەۋ جۇمىسى ءبولىمىنىڭ باسشىسى ايگۇل مۇقىشەۆا جەدەل رەسپيراتورلىق اۋرۋلار بويىنشا الاڭداتارلىق جاعداي جوق ەكەنىن ايتادى.
– نەگىزى تۇماۋ ۇلتتىق ساراپتاما ورتالىعىنىڭ ۆيرۋسولوگيا زەرتحاناسىنىڭ زەرتتەۋىنەن سوڭ عانا ايقىندالادى, ال ونى ناقتىلاۋ شاراسى ەلورداداعى زەرتحانادا جۇرگىزىلەدى. بىلتىر ەپيدەميالىق كەزەڭدە وڭىردە 13 تۇماۋ جاعدايى اتالعان زەرتحانالارمەن راستالدى. الداعى ۋاقىتتا, ناقتى تۇردە جەلتوقسان ايىنىڭ باسىندا وڭىردە ۆيرۋستىق ينفەكتسيالار كوبەيىپ, تۇماۋ بوي كورسەتەتىنى انىق. سەبەبى كۇن سۋىتقاندا ونىڭ تارالاتىن كەزەڭى باستالادى. سوندىقتان دەنساۋلىق ساقتاۋ جۇيەسى تۇماۋ مەن تۇماۋ تارىزدەس اۋرۋلاردىڭ الدىن الۋعا كوڭىل بولۋدە. جىلداعىداي كوپشىلىكتى ۆاكتسينالاۋدان وتكىزۋ جانە بۇل شاراعا ايماقتاعى مەديتسينا ۇيىمدارىن دايارلاۋ جۇمىستارى پىسىقتالىپ قويدى, – دەيدى ا.مۇقىشەۆا.
قازىرگى كۇنى وبلىستا تۇماۋعا قارسى ەكپە سالۋ باستالىپ كەتتى. بيىل ءبىزدىڭ وڭىرگە 90 مىڭ دوزا ۆاكتسينا ءبولىنىپتى. وڭىرلىك سانيتارلىق-ەپيدەميولوگيالىق باقىلاۋ دەپارتامەنتى پارازيتارلى جانە ينفەكتسيالىق اۋرۋلاردى ەپيدەميولوگيالىق باقىلاۋ ءبولىمىنىڭ باسشىسى گۇلميرا قۇلماعامبەتوۆانىڭ سوزىنە سۇيەنسەك, بارلىق اۋدان-قالاداعى ەمدەۋ مەكەمەلەرىندە مەديتسينالىق كابينەتتەر ازىرلەنگەن. تۇرعىندار جۇمىس كۇندەرى قالاعان ۋاقىتىندا كەلىپ ەكپە سالدىرا الادى. جىلداعىداي رەسەيلىك وندىرىستەن شىققان «گريپپول پليۋس» ۆاكتسيناسى ەگىلەدى. بۇل ەكپەدەن سوڭ ادام بويىندا بەلگىلى ءبىر اۋرۋلاردىڭ قوزۋىنا قاتىستى دەرەكتەر تىركەلمەگەن, ال پرەپاراتتىڭ تيىمدىلىگى جوعارى, دەيدى مامان.
ەمحانالارعا ءوز ەركىمەن تۇماۋعا قارسى ەكپە سالدىرۋعا كەلەتىندەردىڭ باسىم بولىگى زەينەتكەرلەر ەكەن. يممۋندىق جۇيەسىندە كىناراتى بار ەگدە جاستاعى ەمدەلۋشىلەرگە ەلدىڭ الدى بولىپ ۆاكتسينا سالىنادى. اسىرەسە ونكولوگيالىق, قانت ديابەتى, تىنىس الۋ جولدارى جانە قان اينالىم جۇيەسى اۋرۋلارىنا شالدىققاندارعا زور كوڭىل بولىنەدى.
پاۆلودار قالاسىنىڭ №5 ەمحاناسىندا تۇماۋعا قارسى ەگۋ شارالارى قىركۇيەك ايىنان باستالىپ كەتتى. باس دارىگەردىڭ مەديتسينا قىزمەتى ساپاسىن باقىلاۋ جونىندەگى ورىنباسارى ايگۇل ابىلحاسان بۇگىندە 1 مىڭ ادامعا ۆاكتسينا سالىنعانىن جەتكىزدى. بۇل ەمدەۋ ۇيىمىنا جالپى سانى 55 919 ادام بەكىسە, مۇندا بولىنگەن ۆاكتسينا سانى – 7 372 دوزا. نەگىزىنەن تەگىن ەكپەنى مەديتسينا قىزمەتكەرلەرى, ديسپانسەرلىك ەسەپتە تۇرعان بالالار, 60 جاستان اسقان قاريالار, جۇكتى ايەلدەر, قارتتار ۇيلەرىن مەكەندەۋشىلەر مەن مۇگەدەكتەر, بالالار ۇيلەرىنىڭ تاربيەلەنۋشىلەرى قابىلداۋدا.
– ال شاھارداعى 51 750 ەمدەلۋشىسى بار №3 ەمحانادا قازىردىڭ وزىندە 2 023 ادامعا سالىنىپ ۇلگەرگەن. جىل سوڭىنا دەيىن جالپى سانى 5 677 ادامدى ەكپەمەن قامتىماق جوسپارىمىز بار, – دەپ حابارلادى مەكەمەدەگى ەپيدەميولوگ كومەكشىسى اقبوتا اسىلحانوۆا. – 2021 جىلى مۇندا 10 مىڭ ادام تۇماۋعا قارسى ۆاكتسينالاۋدان وتكەن. ەكپە العاندار اراسىندا تۇماۋمەن اۋىرۋ دياگنوزى تىركەلمەگەن.
ماماندار تۇماۋدىڭ جۇقپالى اۋرۋ ەكەنىن ەسكەرتەدى. ونىمەن ۇلكەن دە, كىشى دە اۋىرادى. ادامدار كوپ جينالاتىن جەرلەردە, ۇلكەن قالالار مەن ەلدى مەكەندەردە تەز تارايدى. بۇل جۇقپالى دەرتتىڭ مۇرىن مەن تاماقتان وزگە وكپەگە زاقىم كەلتىرەتىن تۇرلەرى دە بولادى. اسقىنعان جاعدايدا قۇلاق ينفەكتسياسىنا نەمەسە باكتەريالىق پنەۆمونياعا سوقتىرۋى مۇمكىن.
پاۆلودار وبلىسى
