«قابدەش ءجۇمادىلوۆ» قوعامدىق قورى توراعاسىنىڭ ورىنباسارى, بەلگىلى جازۋشى عالىم قاليبەك ۇلىنىڭ ايتۋىنشا, بيىكتىگى 14 مەترلىك ەسكەرتكىش-كەسەنەنى سەمەي وڭىرىندەگى ىسكەر ازاماتتار – اسەت ۇلىقپان ۇلى, ەرلان مىرزاحمەت ۇلى, سەزبەك راقىش ۇلى باستاپ قارجى توپتاپ, ءبىر جىلعا جەتپەيتىن ۋاقىتتا سالىپ شىعىپتى. كاسىپكەر جىگىتتەردىڭ ەڭبەگىن ەلەپ-ەسكەرىپ, قور توراعاسى اكادەميك, پروفەسسور ۇلىقپان سىدىقوۆ العىس حاتپەن ماراپاتتاپ, جۇمادىلوۆتەر اۋلەتى اتىنان يىقتارىنا شاپان جاپتى. تاسكەسكەن اۋىلىندا مادەني ءىس-شارا ءوتىپ, 300 ادامعا ارناپ اس بەرىلدى. ەلدىڭ تۇكپىر-تۇكپىرىنەن كەلگەن قادىرلى مەيماندار مەن زيالى قاۋىم وكىلدەرى ەستەلىكتەر ايتىپ, جازۋشىعا دەگەن شىنايى قۇرمەتىن بىلدىرسە, جازۋشىنىڭ جارى ساۋلە اۋكەنقىزى جالپاق جۇرتقا راحمەتىن ايتتى. قابدەش ءجۇمادىلوۆ شىعىس ءوڭىرىنىڭ تۋماسى, تارباعاتاي, زايسان, اياگوز, ءۇرجار اۋداندارىنىڭ قۇرمەتتى ازاماتى بولعان. ءۇرجار اۋدانىنىڭ اكىمى نۇرجان توقسەيىتوۆ ءسوزىن « ۇلى جازۋشى اۋليە كىسى ەكەن, الپىس, جەتپىس جاستاعى مەرەيتويىندا وسى جەرگە جاتاتىنىن وسيەت ەتىپ كەتىپتى. قازىر ءارى وتكەن, بەرى وتكەن جولاۋشى قابەڭنىڭ باسىنا توقتاپ زيارات ەتەتىن قاسيەتتى ورىن بولدى. ءبىزدىڭ ەلگە كيەلى رۋح قوندى» دەپ باستاپ كەسەنە قۇرىلىسىنا اتسالىسقان قاراپايىم ازاماتتارعا العىس حات بەرىپ, قوشامەت كورسەتىپ, جوعارىدا اتتارى اتالعان اسەت, ەرلان, سەزبەك جانە عالىمنىڭ كەۋدەسىنە ءۇرجار اۋدانىنىڭ ەڭ جوعارى ناگراداسى – «ابىروي» مەدالىن تاقتى. ءۇرجار اۋداندىق ءماسليحاتىنىڭ شەشىمىمەن كۇنى كەشەگە دەيىن «92 شاقىرىم» اتالعان جەردىڭ اتى «قابدەش بەكەتى» دەپ وزگەرتىلدى. قور توراعاسىنىڭ ايتۋىنا قاراعاندا, بىلتىر جازۋشى ومىردەن وتە سالا تۇرعان ۇيىنە ەسكەرتكىش تاقتا ورناتىپتى, بيىل مىنە, باسىنا اقشاڭقان كۇمبەز تۇرعىزىپتى, الدا كورنەكتى جازۋشىنىڭ 20 تومدىق شىعارمالار جيناعىن شىعارۋدى قولعا الماق ەكەن.
