كوپ قالامگەرلەر ادەتتە وتىرىپ جازۋعا داعدىلانعان. ال عابەڭ جاسى ۇلعايعان شاعىندا ۇنەمى وتىرىپ جازۋدان شارشايتىن بولعاندىقتان, تۇرەگەپ تۇرىپ وقۋعا, جازۋعا ىڭعايلى ۇستەل جاساتقان. تورگە كورپە توسەتىپ, ءوزى ەتپەتىنەن جاتىپ الىپ شىعارمالارىن جازۋدى ءجون كورگەن جازۋشى دا بولعان ەكەن. ماسەلەن, د.دوسجانوۆ سولاي جازعان دەسەدى. وعان قاراعاندا, تۇرەگەپ تۇرىپ جازۋ الدەقايدا قولايلى سياقتى.
ع.مۇسىرەپوۆتىڭ 100 جىلدىق مەرەيتويى قارساڭىندا سولتۇستىك قازاقستان وبلىستىق تاريحي-ولكەتانۋ مۋزەيى وسى ۇستەلدىڭ كوشىرمەسىن جاساتۋ ءۇشىن ارنايى تاپسىرىسپەن ولشەمدەرىن سۇراتىپ العان.
ع.مۇسىرەپوۆتىڭ پروزاداعى ۇلكەن كوركەمدىك بەلەسى – «ويانعان ولكە», «جات قولىندا» روماندارى بولىپ تابىلادى. ەكى كىتاپتان تۇراتىن وسىناۋ رومان-ەپوپەيادا ءحىح عاسىردىڭ ەكىنشى جارتىسى مەن حح عاسىردىڭ باستاپقى مەرزىمىندەگى قازاق حالقىنىڭ الەۋمەتتىك-ەكونوميكالىق حال-احۋالى, بارشا تۇرمىس-تىرشىلىگى, قوعامدىق جاعدايى كەڭىنەن قامتىلىپ, جان-جاقتى تەرەڭ سۋرەتتەلەدى. 1953 جىلى «ويانعان ولكە» رومانى جەكە كىتاپ بولىپ شىعادى. ال روماننىڭ ەكىنشى كىتابى «جات قولىندا» ارادا وتىز ءبىر جىل وتكەن سوڭ, 1984 جىلى جارىق كورەدى. وسى رومانى جازۋشىنىڭ جۇمىس بولمەسىندەگى تۇرەگەپ تۇرىپ جازۋعا ارنالعان بيىك ۇستەلىندە جازىلعان شىعارمالارىنىڭ ءبىرى. قازىر مۋزەي قورىندا مارجانداي تىزىلگەن اراب ارىپتەرىمەن جازىلعان روماننىڭ تۇپنۇسقاسى ساقتالعان. سونىڭ ءبىر-ەكى پاراعى جازۋ ۇستەلىنىڭ ۇستىندە جاتىر. مۋزەيگە كەلۋشىلەردىڭ: «سوندا جازۋشى تۇرەگەپ تۇرىپ جازعان با؟ اراب ارىپىمەن جازعان با؟ بۇل قاي شىعارماسىنىڭ قولجازباسى؟» – دەپ جارىسا دا, تاڭىرقاي دا سۇراقتارىن قويىپ, قىزىعۋشىلىق ءبىلدىرىپ جاتادى.
انار كوشەرباەۆا,
مۋزەي قىزمەتكەرى
الماتى
