جۇمىس ساپارىنا ورتالىق مەملەكەتتىك ورگانداردىڭ, ۇكىمەت اپپاراتىنىڭ, سالالىق ۆەدومستۆولاردىڭ وكىلدەرى, سونداي-اق جەتىسۋ وبلىسىنىڭ اكىمى بەيبىت يساباەۆ قاتىستى. ساپار بارىسىندا ۇكىمەت باسشىسىنىڭ ورىنباسارى قوناقۇي كەشەندەرى, كارىز-تازارتۋ قۇرىلىستارى نىسانى, كوكتۇما اۋىلىنداعى جاعالاۋدى بەكىتۋ ۋچاسكەسى مەن ءۇشارال قالاسىنىڭ اۋەجايىن ارالادى. ءار باعىتتاعى نىساندار مەن جوبالاردىڭ ىسكە اسۋ قارقىنى جونىندە باياندالدى.
وبلىس اكىمدىگى جاعالاۋدى جازعى تۋريستىك ماۋسىمعا دايىنداۋ باعىتىندا اۋقىمدى ءارى جۇيەلى جۇمىس جۇرگىزىپ كەلەدى. بۇل جۇمىستار مەملەكەت باسشىسىنىڭ تاپسىرماسىنا سايكەس جۇزەگە اسىرىلۋدا. پرەزيدەنت بىلتىر دا تۋريستىك ايماقتاردا ءتارتىپ ورناتۋ, ينجەنەرلىك جانە كولىك ينفراقۇرىلىمىن دامىتۋ, سونداي-اق ينۆەستورلار ءۇشىن ناقتى قولايلى جاعداي جاساۋ ماسەلەلەرىنە ەرەكشە نازار اۋدارعان بولاتىن. بۇگىندە بۇل ماسەلە مەملەكەت باسشىسىنىڭ ايرىقشا باقىلاۋىندا. اتاپ ايتقاندا, جالپى ۇزىندىعى 488 شاقىرىمدىق تالدىقورعان – ءۇشارال سونداي-اق ءۇشارال – دوستىق اۆتوموبيل جولدارىن رەكونسترۋكتسيالاۋ اياقتالىپ, جاعالاۋدىڭ كولىك قاتىناسى ەداۋىر جاقسارعان. ءۇشارال اۋەجايىنىڭ ۇشۋ-قونۋ جولاعىن جاڭعىرتۋدان كەيىن ءىرى اۋە كەمەلەرىن قابىلداۋعا مۇمكىندىك جاسالىپ, قوسىمشا تەرمينال سالۋ جوباسى دا ازىرلەنگەن.
تۋريستىك ايماقتىڭ ينجەنەرلىك ينفراقۇرىلىمى دا ەداۋىر نىعايتىلىپ, 57 شاقىرىم ەلەكتر جەلىسى مەن ەكى قوسالقى ستانسا قۇرىلىسى اياقتالدى. بۇل ەنەرگيا قۋاتىنا تاپشىلىقتى جويىپ, الداعى كەزەڭگە قاجەتتى ەلەكتر ەنەرگياسىنىڭ قورىن قالىپتاستىرۋعا مۇمكىندىك بەردى. اقشي اۋىلىندا 69 شاقىرىم كارىز جەلىسىنىڭ قۇرىلىسى اياقتالدى. اقشي مەن كوكتۇمادان شىعاتىن اعىن سۋلاردى تازالاپ, سۋدى تەحنيكالىق ماقساتتا قايتا پايدالانۋعا مۇمكىندىك بەرەتىن تازارتۋ قۇرىلىستارى جوباسىن ىسكە اسىرۋ جالعاسۋدا. نىساندى بيىلعى قازان ايىندا تولىق جابدىقتاپ, ينجەنەرلىك جەلىلەرگە قوسۋ جوسپارلانعان. وسىلايشا, جاعالاۋداعى سانيتارلىق جاعداي, سۋ بۇرۋ جانە ەكولوگيالىق قاۋىپسىزدىك ماسەلەلەرى كەزەڭ-كەزەڭىمەن شەشىمىن تاۋىپ كەلەدى.
جاعالاۋدى بەكىتۋ جۇمىسىنىڭ بارىسىنا دا باسا نازار اۋدارىلدى. جوبا الاكول جاعالاۋىنىڭ 13 شاقىرىم اۋماعىن قامتيدى. تەكسەرۋ بارىسىندا بىرقاتار ۋچاسكەلەردە, سونىڭ ىشىندە جاعالاۋعا جاقىن ورنالاسقان نىساندار ماڭىندا جاعانىڭ شايىلۋ بەلگىلەرى بار ەكەنى تىركەلدى. تۋريستىك نىسان يەلەرىنىڭ ايتۋىنشا, قىس مەزگىلىندە قاتقان ءسىرى مۇزدىڭ كوكتەمدە كوبەسى سوگىلگەندە توپىراقتى شايىپ, جاعاجاي اۋماعىنا زاقىم كەلتىرەدى. سونىڭ سالدارىنان كاسىپكەرلەر ءار ماۋسىم سايىن جاعاجايلاردى قالپىنا كەلتىرىپ, اباتتاندىرۋعا شىعىندانۋعا ءماجبۇر. قازىرگى ۋاقىتتا كوكتۇمادا 960 مەتر, اقشيدە 200 مەتر اۋماقتا جاعالاۋدى بەكىتۋ جۇمىسىى اتقارىلعان. بۇل باعىتتاعى جۇمىس جالعاسۋعا ءتيىس. ويتكەنى اۋماقتىڭ قورعالۋى, نىسانداردىڭ ساقتالۋى جانە جاعالاۋدىڭ ودان ءارى دامۋى سوعان تىكەلەي بايلانىستى.
جاعالاۋدىڭ سانيتارلىق دايىندىعى جونىندە دە جەكە باياندالدى. وسى ماقساتتا كوممۋنالدىق بازا نىعايتىلىپ, سانيتارلىق تازارتۋ جۇمىسىنا قوسىمشا 42 بىرلىك ارنايى تەحنيكا ساتىپ الىنعان. ماۋسىمدىق بريگادالاردىڭ جۇمىسى كۇشەيتىلىپ, قوقىستى جۇيەلى شىعارۋ, قوعامدىق كەڭىستىكتەر مەن جاعاجاي اۋماعىن كۇتىپ ۇستاۋ شارالارى قولعا الىندى.
ماۋسىمنىڭ جاقىنداۋىنا بايلانىستى قاۋىپسىزدىك ماسەلەلەرىنە دە ەرەكشە نازار اۋدارىلدى. جاعالاۋدا قۇتقارۋ بولىمشەلەرى جۇمىس ىستەيدى, جازعى كەزەڭدە ماۋسىمدىق قۇتقارۋشىلار قوسىمشا تارتىلادى, تەحنيكا جانە قۇرال-جابدىقپەن جاراقتاندىرۋ كۇشەيتىلەدى. سونىمەن قاتار بەينەباقىلاۋ, درون ارقىلى مونيتورينگ, قولدانىستاعى شەكتەۋلەر مەن قۇقىقبۇزۋشىلىقتار ءۇشىن جاۋاپكەرشىلىك تۋرالى اقپاراتتىق ەسكەرتپەلەر ورنالاستىرۋ كوزدەلگەن. «تازا قازاقستان», «زاڭ مەن ءتارتىپ» قاعيداتتارى جاعالاۋدىڭ بۇكىل اۋماعىندا ناقتى كورىنىس تابۋعا ءتيىس ەكەنى اتاپ ءوتىلدى. بۇل ەڭ الدىمەن تازالىقتان, تارتىپتەن, بەلگىلەنگەن تالاپتاردىڭ ساقتالۋىنان جانە بارلىق قىزمەتتەردىڭ ۇيلەسىمدى جۇمىسىنان بايقالۋى قاجەت.
كۇن تارتىبىندە تۋريستىك سالاداعى ەڭبەك قاتىناستارى ماسەلەلەرى دە قارالدى. اسىرەسە جاستار مەن ستۋدەنتتەرگە قاتىستى بەيرەسمي جۇمىسپەن قامتۋدىڭ الدىن الۋ قاجەتتىگىنە ەرەكشە ءمان بەرىلدى. بارلىق ەڭبەك قاتىناستارى, ەڭبەكاقى تولەۋ جانە ەڭبەك جاعدايلارى تۇراقتى باقىلاۋدا بولۋعا ءتيىس.
الاكولدىڭ جازعى ماۋسىمعا دايىندىعىمەن قاتار, بالقاش كولىندەگى تۋريستىك ينفراقۇرىلىمدى دامىتۋ باعىتىندا دا جۇمىس جۇرگىزىپ جاتقانى ايتىلدى. جاعالاۋ ايماعىنىڭ باس جوسپارى مەن ەگجەي-تەگجەيلى جوسپارلاۋ جوباسى بەكىتىلگەن, اباتتاندىرۋ جۇمىسى جۇرگىزىلۋدە, جاعاجاي ينفراقۇرىلىمىن اياقتاۋ 15 ماۋسىمعا جوسپارلانعان. سونىمەن قاتار اۋماقتى ودان ءارى دامىتۋعا جانە ينۆەستيتسيا تارتۋعا باعىتتالعان ىلەسپە جوبالار جۇزەگە اسىرىلىپ جاتىر.
ايدا بالاەۆا اتقارىلعان جۇمىس جاعالاۋدىڭ جاڭا ينفراقۇرىلىمدىق نەگىزىن قالىپتاستىرىپ جاتقانىن اتاپ ءوتتى. سونىمەن بىرگە دەمالۋشىلار اعىنىنىڭ ۇلعايۋىن ەسكەرە وتىرىپ, باستى ولشەم ناقتى ناتيجە مەن بارلىق قىزمەتتەردىڭ دايىندىعى بولىپ قالا بەرەتىنىن ايتتى.
جۇمىس ساپارى بارىسىندا پرەمەر-ءمينيستردىڭ ورىنباسارى جاعالاۋدىڭ جازعى ماۋسىمعا تولىق دايىندىعىن قامتاماسىز ەتۋدى, نەگىزگى ينفراقۇرىلىمدىق جوبالاردى بەلگىلەنگەن مەرزىمدە اياقتاۋدى جۇكتەدى. سونىمەن قاتار قاۋىپسىزدىك پەن سانيتارلىق كۇتىپ-ۇستاۋ شارالارىن كۇشەيتۋدى, دەمالۋشىلارعا ارنالعان كورنەكى پروفيلاكتيكالىق ءتۇسىندىرۋ جۇمىسىن جولعا قويۋدى, سونداي-اق تۋريستەر اعىنىنىڭ ءوسۋى مەن ىشكى ءتۋريزمدى دامىتۋدىڭ ۇزاقمەرزىمدى مىندەتتەرىن ەسكەرە وتىرىپ, تۋريستىك ايماقتى جۇيەلى جاڭعىرتۋدى جالعاستىرۋدى تاپسىردى.
