كەزدەسۋ بارىسىندا قازاقستان-موڭعول ىنتىماقتاستىعىنىڭ پارلامەنتتىك بايلانىس جونىندەگى ارالىق قورىتىندىلارى شىعارىلدى. كەيىنگى جىلدارى ەكى ەل اراسىنداعى ءوزارا ءىس-قيمىل جاڭا دەڭگەيگە كوتەرىلگەنى اتاپ ءوتىلدى. تاراپتار پارلامەنتارالىق ديپلوماتيانىڭ قارقىن الا تۇسكەنىن ايتا كەلىپ, ساياسي ديالوگتىڭ نىعايعانىنا جانە جوعارى دەڭگەيدەگى بايلانىستاردىڭ تۇراقتى سيپاتىنا نازار اۋداردى.
ساۋدا-ەكونوميكالىق جانە مادەني-گۋمانيتارلىق ىنتىماقتاستىقتى دامىتۋ, سونداي-اق ەكى ەلدىڭ پارلامەنتتەرى اراسىنداعى ءوزارا ءىس-قيمىلدى كەڭەيتۋدىڭ ماڭىزدىلى تۋرالى دا ايتىلدى. قاتىسۋشىلار بىرلەسكەن بىرقاتار ءىس-شارانىڭ تابىستى ىسكە اسىپ كەلە جاتقانىنا توقتالدى, حالىقارالىق جانە كوپجاقتى الاڭدار اياسىنداعى ءتيىمدى ىنتىماقتاستىق تۋرالى اڭگىمە ءوربىتتى.
ەلشى ءوزىنىڭ ديپلوماتيالىق ميسسياسى كەزەڭىندە كورسەتكەن قولداۋى ءۇشىن ريزاشىلىعىن ءبىلدىرىپ, قازاقستان مەن موڭعوليا اراسىنداعى دوستىق قارىم-قاتىناس دەڭگەيىنە جوعارى باعا بەردى.
