كىرىس ارتىپ, ينفلياتسيا تومەندەدى

جەدەل دەرەكتەرگە سايكەس بيىلعى 1 توقسانداعى مەملەكەت­تىك بيۋدجەت كىرىسىنىڭ اتقارىلۋى (ترانسفەرتتەردى ەسەپتەمەگەندە) 104,4%-دى قۇرادى. جوسپارداعى      6 176,2 ملرد تەڭگەنىڭ ورنىنا بيۋدجەتكە 6 444,9 ملرد تەڭگە تۇسكەن. اسىرا ورىنداۋ – 268,7 ملرد تەڭگە.

وتكەن جىلعى ۇقساس كەزەڭمەن سالىستىرعاندا مەملەكەتتىك بيۋدجەت كىرىسى 930,6 ملرد تەڭگەگە نەمەسە 16,9% ۇلعايدى. كىرىس جوسپارىنىڭ اسىرا ورىندالۋى رەسپۋبليكالىقتا, جەرگىلىكتى بيۋدجەتتەردە دە تىركەلدى. ايتا كەتۋ كەرەك, بيىلعا ار­نال­عان سالىق تۇسىمدەرىنەن رەسپۋب­ليكالىق بيۋدجەتتىڭ كىرىسى 18,886 ترلن تەڭگە سوماسىندا جوسپارلانىپ وتىر. بۇل بىلتىرعى ناقتى تۇسىمنەن 4,4 ترلن تەڭگە جوعارى.

اتاپ ايتقاندا, رەسپۋبليكا­لىق بيۋدجەتتىڭ كىرىسى 101,8% ورىندالدى. جوسپارداعى 4 085,6 ملرد تەڭگەنىڭ ورنىنا 4 159,4 ملرد تەڭگە ءتۇستى. وتكەن جىلعى ءوسىم – 26,1%. بۇل كوبىنە الەمدىك نارىقتارداعى ەلىمىزدىڭ نەگىزگى ەكسپورتتىق تاۋارلارىنا باعانىڭ وسۋىنە, بىلتىرعى 4 توقساندا ەشف جۇيەسىندە تىركەلگەن تاۋارلار مەن قىز­مەتتەردى وتكىزۋ كولەمىنىڭ ارتۋى­نا, سونداي-اق سالىقتىق, كەدەندىك اكىمشىلەندىرۋ ناتيجەسىنە بايلانىستى.

رەسپۋبليكالىق بيۋدجەت كىرىسى­نىڭ نەگىزگى بولىگىن قۇرايتىن سالىق­تىق تۇسىمدەر (98%) 101,6% ورىن­دالدى. جوسپارداعى 4 012,8 ملرد تەڭگەنىڭ ورنىنا 4 077,6 ملرد تەڭ­گە ءتۇستى. بىلتىرعى سايكەس كەزەڭ­مەن سالىستىرعاندا ءوسىم 31,5%-دى قۇرادى. بۇل رەتتە بىلتىرعى IV توقسانعا (2026 جىلعى 25 اقپانعا دەيىن) ققس تولەۋ مەرزىمى بيىلعى قاڭتار-ناۋرىزعا كەلگەنىن ەسكەرۋ قاجەت. تيىسىنشە, ققس-تىڭ سالىق مىندەتتەمەلەرى 12% مولشەرلەمەگە سايكەس جۇرگىزىلدى.

بىلتىرعى ۇقساس كەزەڭمەن سالىستىرعاندا ءوسىم يمپورتتالاتىن تاۋارلارعا كتس (+16,9%), ققس (16% مولشەرلەمەمەن ەسەپتەلگەن) (+24,2%), پايدالى قازبالاردى وندىرۋگە سالىناتىن سالىق (+35,7%) سياقتى ءىرى سالىقتار ەسەبىنەن قامتاماسىز ەتىلدى. جەرگىلىكتى بيۋدجەتتەردىڭ كىرىسى 109,3% ورىندالدى. جوسپارداعى 2 090,6 ملرد تەڭگەنىڭ ورنىنا 2 285,5 ملرد تەڭگە ءتۇستى. وتكەن جىلعى ءوسىم – 3,1% (+68,8 ملرد تەڭگە).

جىل باسىنان بەرى ءوزىن-ءوزى جۇ­مىسپەن قامتىعاندارعا ارنالعان ار­نايى سالىق رەجىمىندە 392 مىڭ جەكە تۇلعا تىركەلگەن. ققس تولەۋ­شىلەر سانى 10 مىڭ سۋبەكتىگە ارتتى.

ءبىرىنشى توقساننىڭ قورى­تىن­دىسىندا ينفلياتسيانى تومەن­دەتۋدىڭ تۇراقتى ءۇردىسى ساقتالىپ وتىر. ناۋرىزدا ينفلياتسيا قار­قىنى قاڭتار-اقپانداعى 1,0-1,1%-بەن سالىستىرعاندا 0,6%-عا دەيىن باياۋلادى. ۇلتتىق ەكونوميكا مينيسترلىگىنىڭ بولجاۋىنشا, 2027 جىلدىڭ باسىندا ينفلياتسيانىڭ ءبىر ءماندى دەڭگەيىنە شىعۋ ىقتيمالدىعى جوعارى.