كەيىنگى جىلدارى قۇرىلىسى قارقىندى ءجۇرىپ جاتقان «اقجايىق» شاعىن اۋدانى شاعان وزەنىنىڭ سىرتىندا ورنالاسقان. زاچاگان كەنتىندە قازىر 80 مىڭعا جۋىق حالىق تۇرادى. بولاشاق دامۋ جوسپارى بويىنشا تەك «اقجايىق» شاعىن اۋدانىنىڭ وزىندە 70 مىڭداي تۇرعىن قونىستانباق. شاعان وزەنىنەن وتەتىن ەسكى كوپىردە قازىردىڭ وزىندە تاڭەرتەڭ, كەشكە كولىك كەپتەلىسى بولىپ, تۇرعىنداردىڭ ءارى-بەرى قاتىناۋىنا كەدەرگى كەلىپ جۇرگەن ەدى. وسىعان بايلانىستى جاڭا كوپىردىڭ قاجەتتىگى انىق بايقالعان.
«اقجايىق» شاعىن اۋدانىندا بۇگىندە 3 مىڭنان استام تۇرعىن بار. 450 گەكتار اۋماققا ورنالاسقان بۇل شاعىن اۋداننىڭ دامۋ جوسپارى ادام قىزىعارلىق. مۇندا كەزەڭ-كەزەڭىمەن 76 كوپقاباتتى تۇرعىن ءۇي سالىنباق. الەۋمەتتىك ينفراقۇرىلىمعا كەلسەك, ارقايسىسى 1 500 ورىندىق 3 مەكتەپ, ارقايسىسى 500 ورىندىق 4 بالاباقشا, بارلىعى 60 الەۋمەتتىك نىسان بوي كوتەرەدى. ازىرشە جۇزەگە اسقان جوبالار قاتارىندا 1 044 پاتەرلى 10 تۇرعىن ءۇي مەن 150 ورىندىق وڭالتۋ ورتالىعى بار. ال قازىر 416 پاتەرلىك ەكى تۇرعىن ءۇيدىڭ قۇرىلىسى ءجۇرىپ جاتىر. ينفراقۇرىلىم بويىنشا 26 شاقىرىمدىق ىشكى جولدار, 45 كم تروتۋار مەن ۆەلوجولدار سالىنعان.
وبلىس ورتالىعىندا باستالعان ايتۋلى قۇرىلىستىڭ باسىنا باتىس قازاقستان وبلىسىنىڭ اكىمى ناريمان تورەعاليەۆ, جوبانىڭ باس ينۆەستورى, «BI Group» كومپانياسىنىڭ اكتسيونەرى باۋىرجان يساباەۆ, مەردىگەر كومپانيا وكىلدەرى كەلىپ, ەستەلىك كاپسۋلا ورناتتى.
– ءبىز «اقجايىق» شاعىن اۋدانىنىڭ قۇرىلىسىن 2023 جىلدان باستاپ قولعا العان ەدىك. قازىر وسى اۋداندا بولاشاق 70 مىڭ تۇرعىنعا ارنالعان بارلىق ينفراقۇرىلىم تارتىلىپ بولدى. تابيعي گاز, ەلەكتر جارىعى, سۋ مەن كارىز جۇيەسى تولىق ىسكە قوسىلدى. ءتىپتى كوشەدەگى سۋاعار ارىق جۇيەسىن دە جاسادىق. ءبىز بۇل جەردە تۇرعىن ۇيلەرمەن قاتار الەۋمەتتىك نىساندار دا سالامىز. سونىڭ ىشىندە ەڭ ۇلكەن نىساندار – اۋرۋحانا, پەريناتالدىق ورتالىق پەن ەمحانا. سونداي-اق وسى جەردە 12 مىڭ ادامعا ارنالعان ۇلكەن ستاديون بولادى. ال بۇگىن قاداسى قاعىلعان جاڭا كوپىرگە كەلەتىن بولساق, ونىڭ قۇرىلىسىن «BI Group» كومپانياسى تۇرعىزادى. بيىل دايىندىق جۇمىستارى جۇرگىزىلەدى, جوبالىق-سمەتالىق قۇجاتتار جاسالادى. بۇل جەردە ۇزىندىعى ءتورت شاقىرىمدىق ءتورت جولاقتى كوپىر بولادى. قۇنى 36 ملرد تەڭگەگە باعالانعان كوپىر قۇرىلىسى 2028 جىلى اياقتالادى, – دەيدى وبلىس اكىمى ناريمان تورەعاليەۆ.
ءوڭىر باسشىسىنىڭ ايتۋىنشا, بۇل – تاۋەلسىزدىك جىلدارى باتىس قازاقستان وبلىسىندا باستان-اياق جوبالانىپ, سالىنعالى وتىرعان تۇڭعىش كوپىر بولماق. ىشكى كۆارتالدىق جولدار مەن كوپىر وتكەلىن سالۋ قۇرىلىسى جوباسىنا قاراعاندا جاڭادان سالىناتىن 4 جولاقتى, 4 شاقىرىمدىق جول مەن كوپىردى سالىپ ءبىتىرۋ ءۇشىن 36 اي كەتپەك.
باتىس قازاقستان وبلىسى
