فەستيۆالدىڭ اشىلۋ سالتاناتىندا جەتىسۋ وبلىستىق دەنە شىنىقتىرۋ جانە سپورت باسقارماسىنىڭ وليمپيادالىق سپورت تۇرلەرى ءبولىمىنىڭ باسشىسى سايات سارقىتوۆ, Nomad MMA فەدەراتسياسىنىڭ پرەزيدەنتى گادجي گادجيەۆ, «دارا» دارىندىلاردى قولداۋ قورىنىڭ جەتەكشىسى نۇرلان قويانباەۆ ءسوز الىپ, قاتىسۋشىلارعا ساتتىلىك تىلەدى.
ۇمىتكەرلەر جاسى مەن سالماعىنا قاراي 9 ساناتقا ءبولىنىپ, ءوزارا مىقتىنى انىقتادى. دودا قىزىقتى ءارى تارتىستى ءوتتى. جارىس قورىتىندىسى بويىنشا 65 جانە 80 كيلوعا دەيىنگى سالماقتا ونەر كورسەتكەن 38 جاستاعى ماديار بايزاقوۆ پەن 19 جاستاعى نۇرباتىر قۇدايبەرديەۆ كەرمەگە 35 رەت تارتىلىپ, رەكورد جاسادى. سونىمەن قاتار اليشەر سىدىقباەۆ, بەكبەرگەن كەنجەباەۆ, يسلام ۋسمانوۆ, اسقار سەيداحمەت, مەرحات تالعات ۇلى, عالىم جىلقىبەكوۆ, ادىلەت ماقسۇتوۆ ءوز ساناتىندا جەڭىسكە جەتىپ, 200 مىڭ تەڭگەنىڭ سەرتيفيكاتىن ەنشىلەدى.
كۇمىس پەن قولا جۇلدەگەرلەر 100 جانە 50 مىڭ تەڭگەنىڭ سەرتيفيكاتىن يەلەندى. ەڭ كىشى جانە ۇلكەن قاتىسۋشىلار دا ماراپاتتان تىس قالمادى. فەستيۆالدىڭ ەڭ جاس قاتىسۋشىسى – 7 جاسار ەگور گورياەۆ, ەڭ ۇلكەنى – 63 جاستاعى قاتىسۋشى ءابدۋالي تاستانوۆ بولدى. سونداي-اق كەرمەگە 5 رەت تارتىلعان 13 جاستاعى لاشىن مىرزاقۇل مەن 13 رەت تارتىلعان 12 جاستاعى ارينا ۋتكينانى دا ايتا كەتكەنىمىز ءجون.
Tartyl Fest-تە باق سىناعان جىگىتتەر كەرمەگە جالپى سانى 4 731 تارتىلدى. ايتا كەتەيىك, ءار سالماق بويىنشا جەڭىمپاز اتانعاندار قىركۇيەك ايىندا وتەتىن فەستيۆالدىڭ فينالدىق كەزەڭىنە جولداما الدى.
تالدىقورعان
