قۇجاتتا ۇلى ويشىلدىڭ مۇراسىن زەردەلەۋ, ساقتاۋ جانە ناسيحاتتاۋ, سونداي-اق تۇركىستاندى رۋحاني ءتۋريزمنىڭ نەگىزگى ورتالىقتارىنىڭ ءبىرى رەتىندە دامىتۋعا باعىتتالعان 37 ءىس-شارا قاراستىرىلعان.
جوسپاردا ينستيتۋتسيونالدىق جانە قۇقىقتىق بازانى جەتىلدىرۋ, عىلىمي-زەرتتەۋ جانە ءبىلىم بەرۋ ءىسى, مادەني-اعارتۋشىلىق جانە شىعارماشىلىق جوبالار, اقپاراتتىق-يميدجدىك جانە حالىقارالىق ءىس-شارالار, سونداي-اق قالپىنا كەلتىرۋ سياقتى بەس باعىت قامتىلعان.
جاستارمەن جانە مەكتەپ وقۋشىلارىمەن جۇمىس ىستەۋگە ەرەكشە كوڭىل بولىنۋدە. ءىس-شارالاردىڭ باسىم بولىگى تۇركىستان قالاسىندا وتەدى. اتاپ ايتقاندا, قالادا وقۋشىلار اراسىندا ءداستۇرلى «ياساۋيتانۋ» بايقاۋىنىڭ رەسپۋبليكالىق كەزەڭىن وتكىزۋ, ال مۋزەي جانىنان «ياساۋيتانۋ» كلۋبىن اشۋ جوسپارلانىپ وتىر.
جۇمىستىڭ باسىم بولىگى قوجا احمەت ياساۋي شىعارمالارى مەن عىلىمي ەڭبەكتەرىن باسىپ شىعارۋ, ۇلى ويشىلدىڭ مۇراسىن وتاندىق جانە شەتەلدىك عىلىمي ورتالىقتار مەن مۇراعاتتاردا انىقتاۋ, مۇراعات ماتەريالدارى مەن قۇجاتتارى كاتالوگىن ازىرلەۋگە قاتىستى.
ياساۋي مۇراسىن ءارى قاراي ناسيحاتتاۋ ءۇشىن تۋريستەرگە ارنالعان اقپاراتتى, سونىڭ ىشىندە گايدبۋكتاردى, بەينەروليكتەر مەن اۋديو گيدتەردى جاڭارتۋ, شەتەلدىك تۋريستەرگە بەيىمدەلگەن جاڭا تۋريستىك مارشرۋتتار ازىرلەۋ, كەسەنەدە عىلىمي-رەستاۆراتسيالاۋ جانە باسقا دا جۇمىستار جۇرگىزۋ جوسپارلانىپ وتىر.
جوسپاردا يۋنەسكو-نىڭ «الەم جادى» باعدارلاماسى اياسىندا ءياساۋيدىڭ تابىلعان جانە زەرتتەلگەن جازبا مۇراسىن ناسيحاتتاۋ, يۋنەسكو مەن يسەسكو شەڭبەرىندە ياساۋي جىلىن نەمەسە ارنايى مادەني كۇندەردى جاريالاۋ ماسەلەسىن پىسىقتاۋ كوزدەلگەن.
جوسپاردىڭ جۇزەگە اسۋى قوجا احمەت ياساۋي مۇراسىن ساقتاۋ جانە زەردەلەۋ جۇمىستارىن كەڭەيتۋگە, ونىڭ ەل ىشىندە جانە شەتەلدە ناسيحاتتالۋىن كۇشەيتۋگە, سونداي-اق تۇركىستاننىڭ ماڭىزدى رۋحاني, مادەني جانە تۋريستىك ورتالىق رەتىندەگى الەۋەتىن اشۋعا مۇمكىندىك بەرەدى.
