«مەملەكەت باسشىسىنىڭ 2026 جىلعى 30 ناۋرىزدا قاۋىپسىزدىك كەڭەسىنىڭ وتىرىسىندا بەرگەن تاپسىرماسىنا سايكەس ءىىم الماتى قالاسىنداعى رەزونانستىق جول-كولىك وقيعاسىنىڭ ءمان-جايىن جان-جاقتى ءارى وبەكتيۆتى تەرگەپ-تەكسەرۋ جانە كىنالىلەردىڭ جازادان جالتارماۋىن قامتاماسىز ەتۋ بويىنشا شارالار قابىلداۋدا. اتالعان جول اپاتى فاكتىسى بويىنشا قىلمىستىق ءىس قوزعالدى. ZEEKR اۆتوكولىگىنىڭ جۇرگىزۋشىسىن سوت شەشىمىمەن قاماۋعا الۋ شاراسى قابىلداندى. انىقتالعانداي, ول اپات كەزىندە الكوگولدىك ماساڭ كۇيدە بولعان. سونىمەن قاتار بۇرىنعى پوليتسيا قىزمەتكەرىنىڭ ارەكەتسىزدىگى جانە مەملەكەتتىك نومىرلىك بەلگىلەردىڭ زاڭسىز بەرىلۋى فاكتىلەرى بويىنشا دا قىلمىستىق ىستەر قوزعالدى. تەرگەۋدى ءىىم-ءنىڭ وزىندىك قاۋىپسىزدىك دەپارتامەنتى جۇرگىزۋدە. قوعامدا تارالعان بارلىق مالىمەتتەر تەكسەرىلىپ جاتىر», دەدى ە.سادەنوۆ.
ول قىزمەتتە جىبەرىلگەن كەمشىلىكتەر ءۇشىن الماتى قالالىق پوليتسيا دەپارتامەنتى باستىعىنىڭ ورىنباسارى, سونداي-اق اكىمشىلىك پوليتسيا جانە قوعامدىق قاۋىپسىزدىك باسقارمالارىنىڭ باسشىلارى قىزمەتتەرىنەن بوساتىلعانىن ەسكە سالدى. قازىرگى ۋاقىتتا قىزمەتتىك ءتارتىپتى كۇشەيتۋ جانە زاڭدىلىقتى قامتاماسىز ەتۋ بويىنشا قوسىمشا شارالار قابىلدانىپ جاتىر.
«قالاعا باسقا وڭىرلەردەن پوليتسيا جاساقتارى جىبەرىلدى. كەڭ اۋقىمدى تەكسەرۋ جانە رەيدتىك ءىس-شارالار جۇرگىزىلۋدە. العاشقى كۇندەردىڭ وزىندە 4,8 مىڭنان استام جول ءجۇرىسى قاعيدالارىن بۇزۋ دەرەگىنىڭ جولى كەسىلدى. ونىڭ ىشىندە ماس كۇيىندە كولىك باسقارۋ, قارسى جولاققا شىعۋ, جالعان ءنومىر قولدانۋ جانە جۇرگىزۋ قۇقىعىنسىز كولىك باسقارۋ فاكتىلەرى بار. 2 مىڭنان استام كولىك ايىپپۇل تۇراعىنا قويىلدى.وسىنداي كۇشەيتىلگەن ءىس-شارالار بۇكىل ەل بويىنشا جۇرگىزىلۋدە», دەدى مينيستر.
ەرجان سادەنوۆ تەرگەۋ بارىسى ءوزىنىڭ جەكە باقىلاۋىندا ەكەنىن ايتتى.
«بارلىق كىنالىلەر زاڭ تالاپتارىنا سايكەس جاۋاپكەرشىلىككە تارتىلادى. ەشكىم دە مارتەبەسىنە, لاۋازىمىنا جانە بايلانىستارىنا قاراماستان, جاۋاپكەرشىلىكتەن جالتارا المايدى. بارلىعى زاڭ الدىندا تەڭ. زاڭ مەن ءتارتىپ - قوعامداعى قاۋىپسىزدىك پەن ادىلدىكتىڭ نەگىزى», دەدى ول.
ەسكە سالايىق, 24 ناۋرىزدا الماتى قالاسىنىڭ ءال-فارابي داڭعىلىندا جول اپاتى بولدى. وقيعا سالدارىنان 3 ادام قازا تاپتى.
