مەديتسينالىق پويىز – جەتىسۋ وبلىسىندا

بۇعان دەيىن 20-29 ماۋسىم ارالىعىندا مەديتسينالىق پويىز الماتى وبلىسىنىڭ 6 ستانساسىنىڭ تۇرعىندارىنا دارىگەرلەر تەگىن كونسۋلتاتسيالار وتكىزىپ، دياگنوس­تيكا، ەمدىك پرو­تسەدۋرالار، سونداي-اق العاشقى مەديتسي­نالىق كومەك كورسەتتى. كونسۋلتا­تسيالىق-دياگ­نوستيكالىق پويىزدىڭ ماماندارى 853 تۇرعىندى، ونىڭ ىشىندە 115 بالا، 738 ەرەسەكتى تەكسەردى، ال دارىگەرگە قارالعانداردىڭ جالپى سانى – 853.

مەديتسينا قىزمەتكەرلەرى مۇمكىندىگىنشە كوپ پاتسيەنت قابىلداۋعا، ولاردى تەكسەرۋگە ءارى ەمدەۋگە جانە قاجەت بولعان جاعدايدا اۋداندىق نەمەسە وبلىستىق اۋرۋحانالارعا جىبەرۋگە تىرىسادى. سونىمەن ەڭ كوپ ءوتىنىش جپد، تەراپەۆت دارىگەرىنە كەلىپ ءتۇستى: 636 پاتسيەنت، بۇدان ءارى وفتالمولوگ جانە قۇلاق دارىگەرىنە – 585 پاتسيەنت، سونداي-اق حيرۋرگكە – 296 پاتسيەنت. مەديتسينالىق پويىزدىڭ كابينەتتەرىندە بارلىعى 395 ەكگ، 432 ۋدز جانە 224 فليۋوروگرافيا پروتسەدۋرالارى جۇرگىزىلدى. سونداي-اق 111 كىشىگىرىم حيرۋرگيالىق وپەراتسيا جاسالدى.

جوعارى ساناتتى وفتالمولوگ دارىگەر ساكەن كاكپەنوۆ جوباعا بىرنەشە جىلدان بەرى قاتىسىپ كەلەدى. «2019 جىلى مەنى «جاردەم» مەديتسينالىق پويىزىنىڭ دارىگەرلەرى قۇرامىندا ءبىر توپ بولىپ جۇمىس ىستەۋگە ارىپتەستەرىم شاقىردى. سول كەزدە ءبىز قازاقستاننىڭ وڭتۇستىك وڭىرلەرىن ءجۇرىپ وتتىك. مەن وندا كورۋ قابىلەتىن جاقسارتۋعا ءتيىس قانشاما ادامدى قاراپ، سونىڭ ناتيجەسىندە ءبىرازىنا كومەكتەسكەننەن ۇمىتىلماس اسەر الدىم. بۇل ساپاردان ءبىز گلاۋكوما جانە كاتاراكتا سياقتى اۋرۋلاردى ەرتە كەزەڭدەردە انىقتاپ، حيرۋرگيالىق جولمەن ەمدەۋ جانە كورۋ قابىلەتىن جاقسارتۋدىڭ ماڭىزدىلىعىن تۇسىندىك. ماعان مەديتسينالىق پويىزداعى جۇمىس تاجىريبەسى ۇنايدى. ويتكەنى بۇل وفتال­مولوگياداعى كوپتەگەن زياندى اۋرۋدىڭ الدىن الىپ، ونى ەمدەۋدە ۇلكەن پايدا اكەلەدى. ەكىنشىدەن، ءبىز، ياعني دارىگەرلەر ءۇشىن بۇل جۇمىسپەن ۇيلەسەتىن تازا اۋاداعى ەرەكشە دەمالىس»، دەپ مەديتسينالىق پويىزداعى جۇمىسىنان العان اسەرىمەن ءبولىستى.

الماتى وبلىسىنىڭ تۇرعىندارى مەديتسي­نالىق پويىزدىڭ قىزمەتكەرلەرىنە تەگىن كومەك كورسەتكەنى ءۇشىن العىس ءبىلدىردى. «ادامدارعا كومەكتەسەتىن وسىنداي جوبا ءۇشىن كوپ راحمەت. مەن كورشىلەرىمنەن مەديتسينالىق پويىزدىڭ كەلگەنىن جانە دەنساۋلىعىمدى تەكسەرتۋگە مۇمكىندىك بار ەكەنىن ەستىدىم. مەديتسينالىق پويىزدا ءوز زەرتحاناسى مەن جۇرەكتىڭ ۋدز-سى، ياعني ءبىز ءۇشىن ەڭ قاجەتتىنىڭ ءبارى بار ەكەن»، دەدى بايسەركە اۋىلىنىڭ تۇرعىنى ورالحان سامەنساليەۆ.

«سالاماتتى قازاقستان» مەديتسينالىق پويىز­ى جەتىسۋ وبلىسىنان كەيىن شىعىس قازاق­ستان، اباي، پاۆلودار، اقمولا، سولتۇستىك قازاق­ستان، قوستاناي، قاراعاندى جانە ۇلىتاۋ وبلىس­تارىنىڭ ستانسالارى بويىنشا باعىتىن جالعاستىرادى.

«جاردەم» مەديتسينالىق پويىزى 23 مامىردا جولعا شىعىپ، الدىمەن ماڭعىستاۋ وبلىسىنا بارعان بولاتىن. قازىرگى ۋاقىتتا پويىز اقتوبە وبلىسىندا، وندا 22 شىلدەگە دەيىن تۇرادى. جالپى، «سالاماتتى قازاقستان» مەديتسينالىق پويىزىمەن بىرگە ولار ەلىمىزدىڭ شالعاي اۋداندارىنداعى 147 ستانسانى قامتيدى.