ماقساتى – قيىلىستا باعدارشامنىڭ «جاسىل» ءتۇستى كۇتىپ تۇرعان قوزعالىسقا قاتىسۋشىلاردىڭ ءبارى ءۇشىن ءبىر مەزەتتە 1 سەكۋندتىق ءۇزىلىس ۇسىنۋ. مامانداردىڭ ايتۋىنشا كۇردەلى قيىلىستاردا وسىنداي ءۇزىلىستىڭ بولۋى كولىك اپاتتارىنىڭ ىقتيمالدىعىن ازايتىپ وتىر.
«ەڭ العاش بۇل جاڭاشىلدىق بوگەنبەي باتىر-رەسپۋبليكا قيىلىسىندا ەنگىزىلدى. تالداۋعا سۇيەنسەك, اتالعان رەجيم باعدارشامدارعا ەنگىزىلگەنگە دەيىن اتالعان قيىلىستا 17 جول-كولىك وقيعاسى تىركەلدى. ال رەجيم ىسكە قوسىلعاننان كەيىن مۇندا ەشقانداي جول-كولىك وقيعاسى تىركەلگەن جوق», دەيدى قالالىق پوليتسيا دەپارتامەنتى اكىمشىلىك پوليتسيا باسقارماسىنىڭ باستىعى ەلجان چۋپەكوۆ.
ايتۋىنشا, بىلتىر «دايىندىق» رەجيمى 12 ۋچاسكەگە ەنگىزىلگەن. ال 2022 جىلدىڭ باسىنان بەرى 10 ۋچاسكەدە وسىنداي رەجيم قولدانىلا باستاعان.
اتاپ ايتساق, قازىر مۇنداي رەجيم بوگەنباي-رەسپۋبليكا قيىلىستارىنان بولەك, جەڭىس داڭعىلى مەن كەنەسارى, ماسكەۋ, مولداعۇلوۆا, التىنسارين, ەسەنبەرلين كوشەلەرىنىڭ قيىلىسىندا, مومىش ۇلى كوشەسى مەن ساتپاەۆ, جۇماباەۆ كوشەلەرىنىڭ, ۇلى دالا كوشەسى مەن ساۋران, اقمەشىت كوشەلەرىنىڭ قيىلىسىندا جۇمىس ىستەپ تۇر.
