بۇل جارىستار قازاق ەلىنىڭ اتاق-داڭقىن شىعاردى. الىسقا بارماي-اق, شىرايلى شىعىستىڭ باس قالاسى وسكەمەندە ۆولەيبولدان كلۋبتىق كوماندالار اراسىندا قاتارىنان ەكى رەت ازيا چەمپيوناتى ءوتتى. وكىنىشكە قاراي, مەدالعا ءبىر قادام جەتە الماي ەكەۋىندە دە ءتورتىنشى ورىندى قاناعات تۇتقان ەدىك. ال وتكەن جىلى وسكەمەننىڭ «التاي» كومانداسى ايدى اسپانعا شىعارىپ, ازيا چەمپيونى اتاندى. ەندى, مىنە, قىزدار اراسىنداعى ازيا چەمپيوناتى سەمەيگە كەلىپ جەتتى. سەمەيلىكتەردىڭ قۋانىشىندا شەك جوق.
– ءدۇبىردى دوداعا بەس ەلدىڭ ۇزدىك دەگەن التى كومانداسى قاتىسۋدا. ولار: يران مەن تايلاند, وزبەكستان مەن قىرعىزستان وكىلدەرى. ءتۇرلى سەبەپتەرگە بايلانىستى جاپونيا مەن كورەيانىڭ مىقتىلارى سەمەيگە كەلە المادى. اسىرەسە جاپونيا مەن وڭتۇستىك كورەيادا پاندەميا ءورشىپ تۇر. قازاقستاننان ەكى كوماندا – وسكەمەننىڭ «التاي», پەتروپاۆلدىڭ «قۋانىش» كوماندالارى بىزگە قۋانىش سىيلار دەگەن ۇمىتتەمىز. جارىسقا مۇقيات دايىندالدىق. كەلگەن قوناقتارعا جايلى ورىن, بارلىق جاعداي جاسالدى. قوناقۇيدەن جارىس وتەتىن سپورت كەشەنىنە اۆتوبۋس قاتىنايدى, قالا تۇرعىندارىنىڭ الاڭسىز كەشەنگە جەتۋىن سەمەي قالاسىنىڭ اكىمى باقىتجان باياحمەتوۆ ويلاستىردى, – دەدى وسى ءدۇبىرلى دودانى وتكىزۋگە كوپ ەڭبەك سىڭىرگەن وبلىستىق دەنە شىنىقتىرۋ جانە سپورت باسقارماسىنىڭ باسشىسى دوسجان ءۋالحانوۆ.
ازيا چەمپيوناتىنىڭ اشىلۋى بەس مىڭ ادامعا ارنالعان «ارەنا» سپورت كەشەنىندە ءوتىپ, ونى وبلىس اكىمى د.احمەتوۆ اشىپ, جينالعانداردى قۇتتىقتادى. بۇدان كەيىن شىعىستىڭ ءۇمىت كۇتتىرەتىن «التاي» كومانداسى مەن «قۋانىش» كومانداسى ءدۇبىرلى دودانى باستادى. تارتىستى وتكەن كەزدەسۋدە ەلىمىزدىڭ بەس دۇركىن چەمپيونى «التاي» 3:1 ەسەبىمەن جەڭىسكە جەتتى. ال 26 ساۋىردە قىزىلجارلىقتار تايلاندتىڭ مىقتى كومانداسىن 3:1 ەسەبىمەن, كەشكىلىك «التاي» قىرعىز كومانداسىن 3:0 ەسەبىمەن ۇتتى.
ازيا چەمپيوناتى 30 ساۋىردە اياقتالادى.
وڭداسىن ەلۋباي,
«قازاقستاننىڭ قۇرمەتتى سپورت قايراتكەرى»
