الەمدەگى ەڭ بەلدى ۇيىمنىڭ جارىسىندا جەرلەستەرىمىزدىڭ اراسىنان العاشقى بولىپ 33 جاستاعى جالعاس جۇماعۇلوۆ (14-6) جەكپە-جەككە شىعادى. 5 ماۋسىمدا ول اقش-تىڭ لاس-ۆەگاس قالاسىندا وتەتىن تۋرنيردە جەرگىلىكتى سپورتشى دجەفف مولينامەن كۇش سىناسادى. 24 جاستاعى امەريكالىق سايىپقىراننىڭ وسى سپورت ءتۇرىن سەرىك ەتكەلى بەس جىلدان استى. سول ارالىقتا 12 كەزدەسۋ وتكىزىپ, 10 رەت جەڭىسكە جەتتى. ءبىر قىزىعى, مولينا العاشقى ءۇش باسەكەنىڭ ەكەۋىندە جەڭىلىستىڭ كەرمەك ءدامىن تاتتى. ەسەسىنە ودان كەيىن قاتارىنان توعىز ايقاستا ءوزىنىڭ مىقتىلىعىن مويىنداتتى. ول برازيليالىق دجيۋ-دجيتسۋدى جاقسى مەڭگەرگەن. وتە جىلدام جانە اياقپەن دە, قولمەن دە جاقسى جۇمىس ىستەي بىلەدى. دجەففتىڭ قانداسىمىزعا قاراعاندا بويى ءبىرشاما ۇزىن. جالعاسپەن جەكپە-جەككە شىعاتىنىن ەستىگەن بەتتە مولينا قاتتى قۋانعان كورىنەدى. ول: «وتە جاقسى بولدى. مەن جۇماعۇلوۆتى زەينەتكە جىبەرەمىن», دەپ مالىمدەپتى.
لاس-ۆەگاستا جالعاسقا جەڭىس اۋاداي قاجەت. سەبەبى اقتوبەنىڭ تۋماسى UFC-دە وتكىزگەن ءتورت كەزدەسۋدىڭ ۇشەۋىندە جەڭىلدى. سوڭعى رەت بىلتىرعى جەلتوقسان ايىندا انگولالىق مانەل كاپەدەن ويسىراي ۇتىلدى. ەگەر وسىلاي جالعاسا بەرەتىن بولسا, امەريكالىق پروموۋشەن جۇماعۇلوۆپەن كەلسىمشارتتى ۇزارتپاۋى دا مۇمكىن.
ءدال سونداي جاعدايدى اقتوبەنىڭ تاعى ءبىر وكىلى سەرگەي موروزوۆ تا باسىنان كەشىرۋدە. بيىل جازدا 33 جاسقا تولعالى وتىرعان ول UFC-دەگى ءۇش باسەكەنىڭ ەكەۋىندە قارسىلاستارىنا ەسە جىبەردى. بيىل قىستا برازيليالىق دۋگلاس سيلۆا دە اندرادە وتانداسىمىزدى قىلقىندىرىپ تاستادى. بۇل جولى موروزوۆ 25 ماۋسىمدا وتەدى دەپ جوسپارلانعان باسەكەدە راۋليان پايۆامەن كۇش سىناسادى. 26 جاستاعى برازيليا وكىلىنىڭ وسىدان ەكى جىل بۇرىن ءبىزدىڭ جالعاس جۇماعۇلوۆتى ۇپاي سانىمەن ۇتقانى ەسىمىزدە. وكتاگونعا بارلىعى 25 مارتە شىققان اندرادە سونىڭ 21-ىندە باسىمدىق تانىتتى. جەتى باسەكەنى مەرزىمىنەن بۇرىن اياقتادى.
26 ماۋسىمدا شاۆقات راحمونوۆ جارتىلاي ورتا سالماقتاعى ۇزدىكتەر تىزىمىندە توعىزىنشى ورىندا تۇرعان اقش-تىڭ بەلدى سپورتشىسى نيل مەگنيمەن ايقاسادى. كەيىنگى ەكى جىل ارالىعىندا التى كەزدەسۋ وتكىزىپ, سونىڭ بەسەۋىندە باسىمدىق تانىتقان 35 جاستاعى برازيليالىق دجيۋ-دجيتسۋ شەبەرىنىڭ مىقتىلىعى ەش كۇمان تۋعىزبايدى. بارلىعى 34 باسەكە وتكىزگەن مەگني 26 مارتە جەڭىس تويىن تويلادى. 10 باسەكەنى مەرزىمىنەن بۇرىن اياقتادى. ەگەر شاۆقات بىلگەنىنەن جاڭىلماي, وسى جولى دا قارسىلاسىن وڭدىرماي ساباسا, وندا قازاقتىڭ قايسار ۇلى ءوز سالماق دارەجەسىندەگى «توپ-10» ساڭلاقتىڭ ساناتىنا قوسىلۋى دا عاجاپ ەمەس. وسىلايشا, ەشكىمنەن جەڭىلىپ كورمەگەن 27 جاستاعى راحمونوۆ بىرتە-بىرتە چەمپيوندىق تۇعىرعا جاقىندايدى. سول ءساتتى كۇللى الاش جۇرتى كوپتەن بەرى تاعاتسىزدانا كۇتۋدە. ازىرگە ول رەيتينگتە 15-ورىندا تۇر. بۇل – قازاقستاننىڭ سپورتشىلارى اراسىنداعى ەڭ ۇزدىك كورسەتكىش.
5 ماۋسىمداعى موۆسار ەۆلوەۆ پەن 19 ماۋسىمداعى دامير يسماعۇلوۆتىڭ جەكپە-جەكتەرىن دە جەرلەستەرىمىز تاعاتسىزدانا كۇتۋدە. بۇل سپورتشىلار رەسەيدىڭ تۋى استىندا ونەر كورسەتىپ جۇرگەنىمەن, ەكەۋىنىڭ دە قازاقستانعا بوتەندىگى جوق. 31 جاستاعى دامير ورىنبوردىڭ قازاعى. 2014 جىلدان بەرى مما-مەن اينالىسىپ جۇرگەن ول 24 كەزدەسۋ وتكىزىپ, 13 مارتە مەرەيى ۇستەم بولدى. 13 باسەكەنى مەرزىمىنەن بۇرىن اياقتادى. يسماعۇلوۆ UFC-دە ءتورت جەكپە-جەك وتكىزىپ, بارلىعىندا باسىمدىق تانىتتى. الايدا ونىڭ رەيتينگتە تىم باياۋ جوعارىلاۋىنىڭ سەبەبى – بەلدى پروموۋشەندەگى ءوز باسەكەلەرىنىڭ بارلىعىن ۇپاي سانىمەن ۇتقاندىعى. سونىمەن قاتار بىلتىر قانداسىمىز سالماق ءليميتىن ساقتاي الماي, سونىڭ سالدارىنان رەسەيلىك ماگومەد مۋستافاەۆپەن جەكپە-جەككە شىقپادى. بۇل جاعداي دا كەرى اسەرىن تيگىزدى. ءبىر قۋانتارلىعى, دامير بارلىق جارىستا وكتاگونعا رەسەيمەن قوسا, قازاقستاننىڭ دا كوك بايراعىن كوتەرىپ شىعادى.
لاس-ۆەگاستا يسماعۇلوۆ گرۋزيادا تۋىپ-ءوسىپ, كەيىننەن شۆەتسياعا قونىس اۋدارعان 30 جاستاعى گۋرام كۋتاتەلادزەمەن كۇش سىناسادى. قارسىلاسىنىڭ رەكوردى – 14 كەزدەسۋ, 12 جەڭىس (8 نوكاۋت), 2 جەڭىلىس. سوڭعى رەت شۆەتسيانىڭ وكىلى 2020 جىلدىڭ 17 قازانىندا ابۋ-دابيدە وتكەن جەكپە-جەكتە پولشالىق ماتەۋش گەمروتتى ۇپاي سانىمەن ۇتتى.
ينگۋشەتيادا دۇنيەگە كەلگەن 28 جاستاعى موۆسار ەۆلوەۆ قازاقستاندىق Arlan MMA Pro Team كلۋبىنىڭ تۋى استىندا ونەر كورسەتۋدە. كەزىندە ونىڭ سەرگەي موروزوۆتى ايقىن ۇتىپ, م-1 ۇيىمىنىڭ التىن بەلبەۋىن ءساتتى قورعاعانى قالىڭ كورەرمەننىڭ ەسىندە. ازىرگە موۆسار ەشكىمنەن جەڭىلگەن ەمەس. لاس-ۆەگاستا ول جەرگىلىكتى سپورتشى دەن يگەمەن (15-5) شەبەرلىك بايقاسادى.
UFC-دەن بولەك, باسقا دا بەلدى ۇيىمدار بىرنەشە جوعارى دەڭگەيدەگى جارىستار وتكىزۋدى كوزدەپ وتىر. ماسەلەن, اسا ۇيىمى جەڭىل سالماقتا كۇش سىناسىپ جۇرگەن ەڭ ۇزدىك سەگىز سپورتشىنىڭ باسىن قوسىپ, گران-پري دوداسىن ۇيىمداستىرماق. جۇلدە قورى 1 ميلليون اقش دوللارىن قۇراپ وتىرعان جارىستا 30 جاستاعى ارتەم رەزنيكوۆ ونەر كورسەتەدى. شىعىس قازاقستان وبلىسىنىڭ ريددەر قالاسىندا تۋىپ-وسكەن وتانداسىمىز – رەسەيلىك پروموۋشەندەگى ەڭ مىقتى فايتەرلەردىڭ ءبىرى. جالپى سانى 28 جەكپە-جەك وتكىزگەن ول سونىڭ 22-سىندە باسىم بولدى. 17 قارسىلاسىن ەسىنەن تاندىردى. ءبىر عاجابى, ارتەم سوڭعى بەس جىل ارالىعىندا سەگىز رەت ايقاس الاڭىنا شىعىپ, بارلىعىندا جەڭىس تويىن تويلادى.
17 ماۋسىمدا سوچيدەگى Red Arena كەشەنىندە وتەتىن ءتۋرنيردىڭ العاشقى اينالىمىنداعى باستى جەكپە-جەگىندە رەزنيكوۆ داۆي راموسپەن ايقاسادى. 35 جاستاعى برازيليانىڭ بەتكەۇستارى كەزىندە UFC مەن Bellator سىندى اتاقتى پروموۋشەندەردە ايقاستى. 14 كەزدەسۋدىڭ 10-ىن جەڭىسپەن اياقتادى. سونىڭ سەگىزىندە ايقىن باسىمدىققا يە بولدى. ءبىر ايتا كەتەتىن جايت, ول ءتورت جەڭىلىستىڭ بارلىعىندا ۇپاي سانىمەن ەسە جىبەردى. سوڭعى ەكى كەزدەسۋىندە رەسەي جۇلدىزدارى – يسلام ماحاچەۆ پەن ارمان تسارۋكيانعا جول بەرگەننەن كەيىن ءوزىنىڭ سپورتتىق مانسابىن اسا-دا جالعاستىرۋدى ءجون كوردى.
داڭقى جەر جارعان حابيب نۋرماگومەدوۆ ىرتەگاسىن قالاۋشى جانە قوجايىنى بولىپ تابىلاتىن Eagle FC ليگاسىندا ءساۋىر ايىندا جالاۋى جەلبىرەيدى دەپ جوسپارلانعان جارىستىڭ كەيىنگە شەگەرىلگەنى بەلگىلى. شاماسى ول مامىردىڭ سوڭى نەمەسە ماۋسىم ايىنىڭ العاشقى جارتىسىندا وتەدى. اتالعان تۋرنيردە قازاقستاننىڭ ەكى تانىمال سپورتشىسى داۋرەن ەرمەكوۆ (15-5) پەن يگور سۆيريد (18-10) سايىسقا تۇسەدى دەپ كۇتىلۋدە. داۋرەن وسى ۇيىمنىڭ چەمپيونى فارۋدين وديلوۆپەن (12-2-2) ايقاسادى. تاجىكستاننىڭ وكىلى وسىدان ءتورت جىل بۇرىن ءبىزدىڭ شاۆقات راحمونوۆپەن كەزدەسىپ, ءۇشىنشى راۋندتا ەسە جىبەرگەن بولاتىن. ال قانداسىمىزدىڭ فارۋديننەن باسقا قارسىلاستارىنىڭ بارلىعىن ءبىرىنشى نەمەسە ەكىنشى كەزەڭدە ۇتقانىن جانكۇيەرلەر جاقسى بىلەدى. وسى جايتتىڭ ءوزى-اق تاجىكتىڭ وسال ەمەستىگىن اڭعارتادى. ال كەزىندە ONE Championship پروموۋشەنىنىڭ چەمپيوندىق بەلبەۋىن يەلەنگەن سۆيريد رەسەيلىك گامزات حيراماگومەدوۆپەن (9-1) جۇدىرىقتاسادى.
