سپورت جاڭالىقتارى

ءبىر ماتچتا – جەتى گول

كەشە ۋەفا چەمپيوندار ليگاسىنىڭ العاشقى جارتىلاي فينالدىق ماتچىندا «مانچەستەر سيتي» ءوز الاڭىندا ءمادريدتىڭ «رەالىن» قابىلدادى.

تورەشى بەلگى بەرگەن بەتتە بىردەن العا ۇمتىلعان اعىلشىندار ەكىنشى مينۋتتا ەسەپ اشتى. رياد مارەزدىڭ بەرگەن دوبىن كەۆين دە بريۋينە باسپەن ۇرىپ, قاقپاعا سىلق ەتكىزدى – 1:0. ارادا تۋرا توعىز مينۋت وتكەن سوڭ گابريەل جەزۋس وڭ جاق بۇرىشتى ءدال كوزدەدى – 2:0. تەك ءبىرىنشى كەزەڭ بەل ورتادان اسقاننان كەيىن عانا قوناقتار ەستەرىن جيا باستادى. 33-مينۋتتا فەرلان مەنديدىڭ بەرگەن دوبىن كارىم بەنزەما قاقىراتا تەۋىپ, نىساناعا ءدال ءتۇسىردى – 2:1.

ەكىنشى كەزەڭ دە «مانچەستەر ءسيتيدىڭ» دامىلسىز شابۋىلىمەن باستالدى. 53-مينۋتتا فيل فودەن مەرگەندىك تانىتتى – 3:1. الايدا مادريدتىكتەر ەش ساسقان جوق. كوزدى اشىپ-جۇمعانشا بىرنەشە قورعاۋشىنىڭ اراسىنان سىتىلىپ شىققان ۆينيسيۋس جۋنيور ەسەپ ايىرماشىلىعىن قىسقارتتى – 3:2. 74-مينۋتتا بەرناردۋ سيلۆا كەرەمەت گول سوقتى – 4:2. 81-مينۋتتا «رەالدىڭ» شابۋىلىنان كەيىن دوپ ايمەريك لاپورتتىڭ قولىنا ءتيدى. تورەشى ەش ويلانباستان 11 مەترلىك نۇكتەنى مەڭزەدى. بەنزەمانىڭ سوققىسىنا تيبو كۋرتۋا توسقاۋىل بولا المادى – 4:3. ەندى قارىمتا ماتچ 5 مامىردا مادريدتە وتەدى. 

شيرەك فينالعا شىقتى

بۇل كۇندەرى نيۋ-دەليدە 14 جاسقا دەيىنگى تەننيسشىلەر اراسىنداعى الەم چەم­پيوناتىنىڭ ازيا جانە تىنىق مۇحيت ايماعى بويىنشا ىرىكتەۋ ءتۋرنيرى وتۋدە.

D توبىندا ونەر كورسەتكەن قازاقستان قۇراماسى قاتارىنان ەكى كەزدەسۋدە جەڭىسكە جەتىپ, كوزدەگەن ماقساتىنا قول جەتكىزدى. تۇساۋكەسەر ويىنىن يندونەزيامەن وتكىزگەن جەرلەستەرىمىز ولاردى ويسىراتا ۇتتى. كەلەسى كۇنى شري-لانكامەن شەبەرلىك بايقاستى. العا­شىندا دانيەل تازابەكوۆ كادەر باسحيتكە باس كوتەرتپەدى – 6:2, 6:1. ودان كەيىن Tennis Europe (TE) رەيتينگىندە كوش باستاپ تۇرعان زاڭعار نۇرلان ۇلى ليتۋ دجاباندۋدىڭ تاس-تالقانىن شىعاردى – 6:2, 6:0. جۇپتىق سايىستا قازاق ەلى نامىسىن زاڭعارمەن بىرگە دامير جالعاسباي قورعادى. بۇل باسەكەدە دە جاس ورەندەرىمىزدىڭ ۇستەمدىگى ەش كۇمان تۋعىزعان جوق.

كەشە وتانداستارىمىز پاكىستانمەن كۇش سىناستى. بۇل ويىن بىزگە اسا ماڭىزدى ەمەس. ويتكەنى يندونەزيا مەن شري-لانكانى شاڭ قاپتىرعاننان كەيىن-اق, قازاقستاندىقتار پلەي-وفف جولداماسىنا يەلىك ەتتى. 

«ورداباسى» كوش باستادى

فۋتبولدان قازاقستان پرەمەر-ليگا­سىنىڭ سەگىزىنشى تۋرى ءوز مارەسىنە جەت­تى. وسى كەزەڭدەگى العاشقى ەكى كەزدەسۋ شىمكەنت پەن قوستاناي قالالا­رىندا ءوتتى.

قاجىمۇقان مۇڭايتپاسوۆ اتىنداعى ستاديوندا «ورداباسى» «قايراتتى» قابىلدادى. 11-مينۋتتا قوناقتاردىڭ قاقپاسىنا 11 مەتر­لىك ايىپ دوبى بەلگىلەندى. نۇكتەگە كەلگەن ەلحان استانوۆ نىسانانى ءدال كوزدەدى. 30-مي­نۋتتا ارتۋر شۋشەناچەۆ تارازى باسىن تەڭەستىرسە, 52-مينۋتتا سەرج نيۋادزي كەزدە­سۋدىڭ سوڭعى نۇكتەسىن قويدى – 2:1. وسى جە­ڭىستىڭ ارقاسىندا ۇپاي سانىن 14-كە جەتكىزگەن «ورداباسى» جارىس كەستەسىندە ءبىرىنشى ورىنعا شىقتى.

«توبىل» مەن «استانا» اراسىنداعى باسە­كە دە وتە تارتىستى ءوتتى. الاڭ يەلەرىنىڭ سا­پىنداعى چەرنوگوريالىق لەگيونەر جاركو توماشەۆيچ ءبىرىنشى كەزەڭدە ەسەپ اشتى. ۇزى­لىسكە ساناۋلى سەكۋندتار قالعاندا قوستا­نايلىقتاردىڭ ەكىنشى گولدى سوعۋىنا تاماشا مۇمكىندىگى بولدى. بىراق يگور سەرگەەۆ 11 مەتر­لىك نۇكتەدەن ءمۇلت كەتتى. ەسەسىنە استا­نالىق­تار 55-مينۋتتا ەسەپتى تەڭەستىردى – 1:1. بۇل گولدىڭ اۆتورى – پەدرۋ ەۋجەنيو.