نەبارى 13 جاسار اۆتور بۇگىنگى تاڭدا ادەبيەتتىڭ ايرىقشا سۇرانىسقا يە جانە بارىنشا پايدالى ءتۇرىن قالىپتاستىرۋ باعىتىندا شەبەرلىك ساعاتتارىن وتكىزدى. دانيەل احمەد نۇر-سۇلتان جانە الماتى قالالارىندا بولىپ, ساپار سوڭىندا بۋرابايعا سوققان. ونداعى ماقساتى وسى وڭىردەگى جاستارعا كوميكستەردى قالاي سالۋعا بولاتىنىن ۇيرەتۋ. كوممەرتسيالىق ەمەس قوعامدىق ۇيىمنىڭ قولداۋىمەن ۇيىمداستىرىلعان شىعارماشىلىق ءسات وتە تارتىمدى ءوتتى. ءسوز اراسىندا الەمگە اتى شىققان جاس اۆتورمەن كەزدەسۋ تۋرالى يدەيا گيلديا دەلەگاتسياسىنىڭ بيىل ناۋرىز ايىندا وبلىس اكىمى ەرمەك مارجىقپاەۆپەن كەزدەسۋى كەزىندە تۋىنداعان. بۇل ىندەت قۇرساۋىنان شىعىپ كەلە جاتقاندا جاستاردىڭ جانىن جادىراتاتىن جاعىمدى جاڭالىق بولدى.
تابيعاتى تامىلجىعان بۋراباي باۋرايىندا گيلديا ۇجىمىنىڭ بەلدى وكىلى يۋسۋف كرىكبەسوۆتىڭ قولداۋىمەن وتكىزىلگەن شاراعا 11 مەن 25 جاس ارالىعىنداعى 200-دەن استام جاس قاتىسىپ, كوميكستەردى جاساۋ نەگىزدەرىمەن تانىستى.
– ءبىزدىڭ جولىمىز بولدى. بۋراباي باۋرايىنا دانيەل احمەد كەلدى, – دەيدى يۋسۋف جاعىپار ۇلى, – بالالاردىڭ اعىلشىن تىلىندە سويلەسىپ, پىكىر الماسۋىنىڭ ءوزى كوپ جايدى اڭعارتاتىن ەدى. شىعارماشىلىق قىزمەتتىڭ ەۋروپالىق مودەلدەرى وتە ماڭىزدى.
العاشقى شەبەرلىك سىنىبى جوعارى تەحنولوگيالىق كوللەدجدە باستالدى. بۇل جەردە بولاشاق باعدارلاماشىلار مەن ديزاينەرلەر كوميكستەر جاساۋ تاسىلىمەن تانىستى. مەكتەپ وقۋشىلارى تاراپىنان ۇلكەن قىزىعۋشىلىق تۋىندادى. ءبىلىم وشاعىنىڭ ديرەكتورى قۋانىشبەك شاياحمەتوۆ گيلديا كومانداسىنا العىس ايتا وتىرىپ, باسقا دا جوبالارعا قاتىسقىسى كەلەتىندىكتەرىن جەتكىزدى. ءدال وسىنداي كەزدەسۋ «ارمان» ونەر مەكتەبىندە دە ساباقتاستى. جاس تىڭداۋشىلار كەيىپكەرلەردىڭ بەت-الپەتىن سۋرەتتەۋدىڭ تەحنيكالىق ەگجەي-تەگجەيىنە ءۇڭىلدى. ءبىر ايتا كەتەرلىك جايت, دانيەل شەبەرلىك سىنىپتارىن وتە قىزعىلىقتى وتكىزەدى. №1 گيمنازيا وقۋشىلارى ۇلىبريتانياداعى ءبىلىم بەرۋ مەكەمەلەرىنىڭ تاجىريبەسىن سۇراپ, قىزىعۋشىلىق تانىتتى. قاي جەردە بولسىن شىعارماشىلىق اتموسفەرا كىلكىپ تۇرعان بولاتىن. بالالاردىڭ ىشىندەگى باتىلدارى دانيەلدەن قولتاڭبا دا سۇراپ جاتتى.
جوعارى پەداگوگيكالىق كوللەدجدە دانيەل ستۋدەنت اۋدارماشىلارمەن ءتىل تابىسىپ, ەمىن-ەركىن اڭگىمەلەستى. «Hertfordshire Press» باسپاسىنىڭ نەگىزىن قالاۋشى جانە جەتەكشىسى, ECG (London) ۆيتسە-توراعاسى مارات احمەدجانوۆ دارىندى جاستار قاتىسا الاتىن جوبالاردى, سونداي-اق, كوميكستىڭ ءوزىن جەكە تانىستىرىپ ءوتتى.
– كوبىنەسە مۇعالىمدەر مەن اتا-انالار كۇلكىلى كىتاپتى زياندى دەپ سانايدى, – دەدى مارات احمەدجانوۆ, – ستاتيستيكاعا جۇگىنىپ كورىڭىزشى, 2020 جىلى اقش كوميكستەرىنىڭ بۇكىل يندۋسترياسى شامامەن 800 ملرد تەڭگە تابىس تاپتى. ەندى ويلاڭىز, 1 ملرد دوللاردان ارتىق اقشا تابۋ جامان با؟
2021 جىلى ساتىلىمدار كولەمى 70 پايىزعا وسكەن. ساتىلعان كوميكستەر سانى دا كوپ. قازىر بۇل سالا جاڭا التىن عاسىردى باسىنان وتكەرىپ جاتىر.
الەمنىڭ ءار قيىرىنداعى ۇزدىك جاڭالىق الاش بالاسى ءۇشىن دە جات بولماۋعا ءتيىستى. جاقسى ىسكە ۇمتىلۋ, ۇقساپ باعۋ نەگە جامان بولسىن. ۇزدىككە ەلىكتەۋ ءتۇپتىڭ تۇبىندە جاس قيالعا قانات ءبىتىرىپ, ۇشپاققا شىعارماي ما؟!
اقمولا وبلىسى,
بۋراباي اۋدانى
