مەملەكەت باسشىسىنىڭ ۇلتتىق قوعامدىق سەنىم كەڭەسىنىڭ VI وتىرىسىندا بەرگەن تاپسىرماسىن ورىنداۋ شەڭبەرىندە ەڭبەك جانە حالىقتى الەۋمەتتىك قورعاۋ مينيسترلىگى ازاماتتاردى جۇمىسقا ورنالاستىرۋ كەزىندە قاعاز قۇجاتتامانى پايدالانۋدى بارىنشا ازايتۋ, سونداي-اق تسيفرلى كادرلىق قۇجاتتامانى دامىتۋ بويىنشا جۇمىس جۇرگىزۋدە.
قويىلعان مىندەتتەردى ورىنداۋ بويىنشا نەگىزگى قۇرالداردىڭ ءبىرى – E-HR جۇيەسى. ول 2018 جىلدان باستاپ جۇمىس ىستەيدى جانە جۇمىس بەرۋشىلەرگە ءوزىنىڭ كادر جۇيەسى نەمەسە ەلەكتروندىق ەڭبەك بيرجاسى ارقىلى ءوز قىزمەتكەرلەرىمەن شارتتاردى تىركەۋگە مۇمكىندىك بەرەدى.
سونىمەن قاتار E-HR جۇيەسى قىزمەتكەرلەردىڭ ەلەكتروندى جەكە ىستەرىن اۆتوماتتى تۇردە قالىپتاستىرادى جانە ازاماتتىڭ كەلىسىمى بويىنشا الەۋەتتى جۇمىس بەرۋشىگە اقپارات بەرەدى.
«اعىمداعى جىلى ءبىزدىڭ الدىمىزدا E-HR جۇيەسىندە ەڭبەك شارتتارىنىڭ كەمىندە 90%-ىن تىركەۋ مىندەتى تۇر. بولاشاقتا, 2023 جىلى بارلىق جۇمىس ىستەيتىن حالىقتى قامتۋدى جوسپارلاپ وتىرمىز», دەدى ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەربول وسپانوۆ.
E-HR جۇيەسىمەن وڭدەلەتىن اقپارات سالالار بولىنىسىندە جالدامالى قىزمەتكەرلەردىڭ سانىن مونيتورينگىلەۋ, جۇمىس بەرۋشىلەردىڭ ءوز قىزمەتكەرلەرىنىڭ پايداسىنا سالىق تولەمدەرى مەن الەۋمەتتىك اۋدارىمداردى جۇزەگە اسىرۋى ءۇشىن پايدالانىلادى. وسىلايشا, ەڭبەك قاتىناستارى اشىق بولا باستايدى, بۇل جۇمىسشىلاردىڭ ەڭبەك قۇقىقتارىن قورعاۋعا ىقپال ەتەدى.
