باسقوسۋدا ءسوز العان وبلىس اكىمى قانات بوزىمباەۆ اگروونەركاسىپ سالاسىن ءارى قاراي دامىتۋدا وبلىستىڭ الەۋەتى جوعارى بولعانىمەن الەمدەگى تۇراقسىزدىق ءوز اسەرىن تيگىزىپ وتىرعانىن ايتتى. ماسەلەن, بيىل مينەرالدى تىڭايتقىش, گەربيتسيد, تۇقىم, تەحنيكا جانە وعان قاجەتتى قوسالقى بولشەكتەردىڭ باعاسى وسكەن, سۋارمالى سۋ جەتىسپەۋشىلىگى بايقالادى, سۋ ءتاريفى كوتەرىلدى جانە باسقا دا ماسەلەلەر بار.
اۋىل شارۋاشىلىعى ءمينيسترى ە.قاراشوكەەۆ مەملەكەت باسشىسىنىڭ جولداۋداعى تاپسىرماسىنا سايكەس وتكەن جىلدان باستاپ اگروونەركاسىپتىك كەشەندى سۋبسيديالاۋ تەتىگىن جەتىلدىرۋ جۇمىستارى باستالعانىنا توقتالدى. جالپى, وسى سالانى قولداۋعا بيىل 309 ملرد تەڭگە سۋبسيديا ءبولىندى, ونىڭ ىشىندە 79,7 ملرد تەڭگە – وسىمدىك شارۋاشىلىعىنا, 100 ملرد تەڭگە – مال شارۋاشىلىعىنا, 8,4 ملرد تەڭگە – ءونىم وڭدەۋگە جانە 120,4 ملرد تەڭگە قارجى قۇرالدارىنا قاراستىرىلىپ وتىر. سونداي-اق وتاندىق اگروونەركاسىپتىك كەشەننىڭ ورنىقتىلىعىن ساقتاپ قالۋ ءۇشىن قوسىمشا 388,2 ملرد تەڭگە بولىنبەك. سول سياقتى بۇرىن كۇشى جويىلعان جۇمىرتقانى سۋبسيديالاۋ باعدارلاماسى جالعاستىرىلادى, ال جۇمىرتقا باعىتىنداعى قۇس شارۋاشىلىعىنىڭ بارلىق سۋبەكتىسى ءۇشىن سۋبسيديالاۋ نورماتيۆتەرى بىردەي بولادى جانە 2 ەسەدەن جوعارىلاتىلادى. بۇل ماقساتقا 7,5 ملرد تەڭگە قارجى بولىنەدى. قاراقۇمىق پەن مايلى داقىلدار قۇنىن ارزانداتۋعا قوسىمشا 5,6 ملرد تەڭگە قاراستىرىلادى. سونداي-اق اۋىل شارۋاشىلىعى ءمينيسترى الداعى ۋاقىتتا ءىرى تاۋارلى ءسۇت فەرمالارىنىڭ قۇرىلىسىن جانە كوكونىس قويمالارىن سالۋ مەن قايتا جاڭارتۋدى قارجىلاندىرۋعا, ەت باعىتىنداعى قۇس فابريكالارىن سالۋ مەن جاڭعىرتۋعا, جىلىجاي شارۋاشىلىقتارى جەلىسىن ۇيىمداستىرۋعا, سۋارۋ جۇيەلەرىن جاڭعىرتۋعا, تامشىلاتىپ سۋارۋ تەحنولوگيالارى نەگىزىندە جەمىس-كوكونىس ونىمدەرىن ءتيىمدى ءوندىرۋدى ۇيىمداستىرۋعا باسىمدىق بەرىلەتىنىن دە ايتتى.
وسى جيىندا ەكولوگيا, گەولوگيا جانە تابيعي رەسۋرستار ءمينيسترىنىڭ ورىنباسارى سەرىك قوجانيازوۆ يرريگاتسيا جۇيەلەرىن جاڭعىرتۋ, اۋىسپالى ەگىس ءادىسىن ساقتاۋ, سۋدى ۇنەمدەۋ, سۋدى كوپ قاجەت ەتەتىن داقىلداردىڭ كولەمىن ازايتۋ سياقتى شارالارعا كەڭىنەن توقتالدى. سونىڭ ىشىندە الماتى وبلىسىندا اتقارىلعان مۇنداي جۇمىستار سۋلاندىرۋعا وڭ ىقپال ەتۋگە ءتيىس.
– كوكتەمگى دالا جۇمىستارىنا تەحنيكانىڭ دايىندىعىن, جانار-جاعارماي, تىڭايتقىش قورلارىن جيناقتاۋى كەرەك. اۋا رايىنىڭ قولايسىزدىعىنا بەيىمدەلگەن جوعارى ساپالى تۇقىممەن ءوندىرىستى قامتۋعا ءتيىسپىز. يسلام دامۋ بانكى ارقىلى ەسكەلدى جانە اقسۋ اۋداندارىنىڭ يرريگاتسيالىق جۇيەلەرى قالپىنا كەلتىرىلۋدە. دەسەك تە ۋاقتىلى قارجىلاندىرۋ بولماعاندىقتان كوپتەگەن جوبا تۇزەتۋدى قاجەت ەتەدى. سۋ ۇنەمدەۋ تەحنولوگياسى الاڭى بيىل 27 مىڭ گەكتارعا جەتكىزىلۋگە ءتيىس. مال ازىعىن دايارلاۋ باقىلاۋدان تىس قالماۋى كەرەك. ول ءۇشىن ازىقتىق داقىلداردىڭ ەگىس كولەمىن ۇلعايتىپ, مەملەكەتتىك ورمان قورى, تابيعي ۇلتتىق پاركتەر, جەر قورىنداعى شابىندىقتاردى ءتيىمدى پايدالانۋ قاجەت. جالپى, اگروونەركاسىپ كەشەنىن دامىتۋداعى نەگىزگى باسىمدىق ىشكى نارىقتاعى يمپورتتى الماستىرۋعا بەرىلەدى, – دەدى ق.بوزىمباەۆ.
الماتى وبلىسى
