قور كونسۋلتاتيۆتىك-دياگنوستيكالىق قىزمەت الۋ مۇمكىندىكتەرى تۋرالى اقپارات ۇسىنادى. بەيىندى مامان-دارىگەرلەردىڭ كونسۋلتاتسيالارى, كت/مرت, رەنتگەن جانە دياگنوستيكالىق قىزمەتتىڭ باسقا دا تۇرلەرى ءمامس جۇيەسىندە ساقتاندىرىلعان ازاماتتارعا ەمدەۋشى دارىگەردىڭ جولداماسى بويىنشا تەگىن كورسەتىلەدى. ولاردان قوسىمشا اقى تالاپ ەتىلمەۋى كەرەك. ەگەر ەمحانا اتالعان قىزمەتتەردى ءوزى ۇسىنا الماسا, وندا ورىنداۋ شارتى بويىنشا پاتسيەنتتىڭ باسقا كلينيكادان الۋىن قامتاماسىز ەتۋگە ءتيىس. مىندەتتى الەۋمەتتىك مەديتسينالىق ساقتاندىرۋ جۇيەسى ەنگىزىلگەلى بەرى دەنساۋلىق ساقتاۋ سالاسىن قارجىلاندىرۋدىڭ ەداۋىر ارتۋى كوپتەگەن سۇرانىسقا يە باعىتتار بويىنشا مەديتسينالىق كومەك كولەمىن ۇلعايتۋعا مۇمكىندىك بەردى.
كەز كەلگەن كونسۋلتاتسيالىق-دياگنوستيكالىق قىزمەتتى پاتسيەنتكە ەمدەۋشى دارىگەر تاعايىندايدى. ول ناۋقاستىڭ جاعدايىن, شاعىمدارىن, اۋرۋدىڭ بەلگىلەرىن زەردەلەيدى. ءتيىستى كورسەتىلىمدەر بولسا دارىگەر كت, مرت نەمەسە باسقا دا زەرتتەۋلەر جۇرگىزۋگە جولداما جازادى. قىزمەتتى جوسپارلى تۇردە الۋ ءۇشىن پاتسيەنت «ساقتاندىرىلعان» مارتەبەسىنە يە بولۋعا ءتيىس, ويتكەنى ەمحانا دەڭگەيىندە بۇل قىزمەتتەر ءمامس اياسىندا كورسەتىلەدى.
تمككك شەڭبەرىندە جانە ءمامس جۇيەسىندە قىزمەت كورسەتەتىن مەديتسينالىق ۇيىم الەۋمەتتىك مەديتسينالىق ساقتاندىرۋ قورىمەن ءتيىستى شارت جاساسادى جانە پاتسيەنتتەرگە وسى قىزمەتتەردى ۇسىنۋ بويىنشا مىندەتتەمەنى ورىنداۋعا ءتيىس.
«قور تۇرعىندارمەن كەرى بايلانىس ورناتىپ, تۇراقتى تۇردە جۇمىس جۇرگىزەدى. 2021 جىلى نۇر-سۇلتان قالاسى بويىنشا 3 301 ءوتىنىش-شاعىم ءتۇستى, ونىڭ 41,4%-ى كونسۋلتاتسيالىق-دياگنوستيكالىق قىزمەت بويىنشا: مىسالى, بەيىندى ماماندارعا, دياگنوستيكالىق قىزمەتتەرگە جەتە الماۋ نەمەسە ونى ۇزاق كۇتۋ, سول سەكىلدى ۋچاسكەلىك قىزمەتتەردى (جالپى پراكتيكا دارىگەرى, تەراپەۆت-دارىگەر, پەدياتر-دارىگەر), جەدەل مەديتسينالىق كومەك بريگاداسىن ۇزاق كۇتۋ, ت.ب. ازاماتتاردان «ەمحانا كورسەتىلىمدەر بولسا دا, وتكىزۋ مۇمكىندىگىنىڭ جوقتىعىنا سىلتەمە جاساي وتىرىپ, كونسۋلتاتسيالىق-دياگنوستيكالىق قىزمەتكە جىبەرۋدەن باس تارتادى» دەگەن وتىنىشتەردى ءجيى الامىز. مۇنداي جاعدايدا, قىزمەت جەتكىزۋشى قور بازاسىندا تۇراتىن مەديتسينالىق ۇيىمدار قاتارىنان بىرلەسىپ ورىنداۋشىنى تارتۋعا مىندەتتى. ەگەر بىرلەسىپ ورىنداۋ شارتى ەشكىممەن جاسالماسا, وندا پاتسيەنتتى وسى قىزمەت ءتۇرى بويىنشا قورمەن كەلىسىمشارتقا وتىرعان مەديتسينا ۇيىمدارىنىڭ بىرىنە جىبەرۋگە ءتيىس, جولداما بويىنشا كورسەتىلگەن قىزمەت قورىتىندىلارى نەگىزىندە شارت اۆتوماتتى تۇردە جاسالادى», دەپ ءتۇسىندىردى «الەۋمەتتىك مەديتسينالىق ساقتاندىرۋ قورى» كەاق نۇر-سۇلتان قالاسى بويىنشا فيليالىنىڭ ديرەكتورى نۇرلىبەك قابدىقاپاروۆ.
الايدا پاتسيەنت ءوز ەمحاناسىنا بارماي, باسقا مەديتسينالىق ورتالىقتارعا تىكەلەي بارىپ, كونسۋلتاتسيالىق-دياگنوستيكالىق قىزمەتتى اقىلى الاتىن جاعدايلار دا كەزدەسەدى.
«كەيدە ءبىز الەۋمەتتىك جەلىلەردەن پاتسيەنتكە جولداما بەرىلمەگەنى جانە ولار اقىلى تۇردە قىزمەت العانى (مىسالى كت) تۋرالى شاعىمداردى كورەمىز. مۇنداي جاعدايلاردا پاتسيەنتتىڭ قۇقىعىن قورعاۋشى رەتىندە قور ىسكە قوسىلادى. بىراق كەيدە تەكسەرۋ ناتيجەسىندە پاتسيەنت ءتىپتى ءوز ەمحاناسىنا جۇگىنبەگەن, بىراق دەرەۋ باسقا جەردە اقىلى تەكسەرۋدەن وتۋگە شەشىم قابىلداعانى انىقتالىپ جاتادى. سوندىقتان ازاماتتاردى تمككك شەڭبەرىندە جانە ءمامس جۇيەسىندە مەديتسينالىق قىزمەتتەردى پايدالانۋعا شاقىرامىز. ەگەر پروبلەمالار تۋىنداسا, الدىمەن ەمحانانىڭ پاتسيەنتتى قولداۋ قىزمەتىنە حابارلاسىپ, ءوز قۇقىقتارىڭىزدى قورعاڭىزدار», دەپ كەڭەس بەرەدى امسق ەلوردا فيليالىنىڭ ديرەكتورى ن.قابدىقاپاروۆ.
الەۋمەتتىك مەديتسينالىق ساقتاندىرۋ قورى اتاپ وتكەندەي, 2022 جىلى حالىققا كورسەتىلەتىن مەديتسينالىق كومەكتى قارجىلاندىرۋعا 2,049 ترلن تەڭگە, ونىڭ ىشىندە تمككك بويىنشا – 1,2 ترلن, ءمامس بويىنشا – 838 ملرد تەڭگە باعىتتاۋ جوسپارلانۋدا.
بۇل رەتتە كونسۋلتاتسيالىق-دياگنوستيكالىق قىزمەتتەردى قارجىلاندىرۋ ەداۋىر ارتادى. وسى ماقساتتارعا 231 ملرد تەڭگەدەن استام, ونىڭ ىشىندە ءمامس بويىنشا – 187,7 ملرد تەڭگەدەن استام قاراجات قاراستىرىلعان. سالىستىرمالى تۇردە قاراساق, ءبىر جىل بۇرىن اتالعان قىزمەتتەرگە 203 ملرد تەڭگە باعىتتالدى, ونىڭ ىشىندە 167 ملرد تەڭگە – ءمامس بويىنشا.
ەگەر سىزدە كونسۋلتاتسيالىق-دياگنوستيكالىق قىزمەتتەردى الۋعا قاتىستى ماسەلە تۋىنداسا نەمەسە اتالعان قىزمەتتەردىڭ كورسەتىلۋىنە قول جەتكىزە الماساڭىز, وندا الدىمەن ءوز ەمحاناڭىزدىڭ پاتسيەنتتى قولداۋ قىزمەتىنە حابارلاسۋىڭىز قاجەت. توموگرافيانى نەمەسە باسقا دا قىزمەتتەردى ۇزاق كۇتىپ, ءوتۋ مۇمكىندىگى بولماعان جاعدايدا, دەنساۋلىق ساقتاۋ باسقارماسىنان جاعدايدى ناقتىلاي الاسىز. ەگەر ماسەلەنى سول جەردە شەشۋ مۇمكىن بولماسا, وندا الەۋمەتتىك مەديتسينالىق ساقتاندىرۋ قورىنا وزىڭىزگە ىڭعايلى تاسىلمەن ءوتىنىش بەرىڭىز: fms.kz رەسمي سايتى, 1406 بايلانىس ورتالىعى, Qoldau 24/7 ءموبيلدى قوسىمشاسى جانە Telegram-داعى SaqtandyryBot.
