فوتو: اشىق دەرەككوز
تۇرعىن ءۇي ماقساتىندا تەك زەينەتاقىنىڭ «ارتىق» بولىگى عانا پايدالانىلادى. بۇل – جەتكىلىكتىلىك شەگىنەن اساتىن سوما, ياعني بولاشاق زەينەتاقى ءۇشىن مىندەتتى تۇردە شوتتا قالۋى ءتيىس قاراجاتتان ارتىلعان اقشا. ءار جاس توبى ءۇشىن جەكە شەك بەلگىلەنگەن.
قازىر ەلىمىزدە جەتكىلىكتىلىك شەگىن ەسەپتەۋ ءادىسىن قايتا قاراستىرۋدى جوسپارلاپ وتىر. ەڭبەك مينيسترلىگىنىڭ مالىمەتىنشە, شەكتەر 2026 جىلدىڭ مامىرىندا قايتا قارالۋى مۇمكىن. وسى وزگەرىس كۇشىنە ەنسە, زەينەتاقىدان الىناتىن قاراجات كولەمى ازايادى. سول سەبەپتى ازاماتتار قولدانىستاعى مۇمكىندىك اياسىندا اقشالارىن ەرتەرەك شەشىپ الۋعا تىرىسىپ جاتىر.
بجزق دەرەكتەرىنە سايكەس, 2026 جىلدىڭ قاڭتار – ناۋرىز ايلارىندا زەينەتاقى جيناعىن تۇرعىن ءۇي ماقساتىندا پايدالانۋ بويىنشا ەڭ كوپ قاراجات كەلەسى باعىتتارعا جۇمسالعان:
- تۇرعىن ءۇي ساتىپ الۋ جانە تولىق ەسەپ ايىرىسۋ – 50,2 ملرد تەڭگە;
- «وتباسى بانك» دەپوزيتىن تولىقتىرۋ – 43,8 ملرد تەڭگە;
- بۆۋ يپوتەكاسىن ءىشىنارا وتەۋ – 14,4 ملرد تەڭگە;
- «وتباسى بانك» يپوتەكاسىن ءىشىنارا وتەۋ – 12,1 ملرد تەڭگە;
- يپوتەكا بويىنشا باستاپقى جارنا – 3,9 ملرد تەڭگە.
ءساۋىر ايىندا بۇل ءۇردىس كۇشەيگەن. تۇرعىن ءۇي ساتىپ الۋعا شەشىپ الىنعان قاراجات 66,8 ملرد تەڭگەگە جەتىپ, ناۋرىز ايىمەن سالىستىرعاندا 33%-عا ارتقان. سونىمەن قاتار «وتباسى بانك» دەپوزيتتەرىن تولىقتىرۋ دا كوبەيگەن.
ايتا كەتەيىك, بۇعان دەيىن زەينەتاقى شەگىن كوتەرۋ جوباسى قوعامدىق تالقىلاۋدا قولداۋ تاپپاعانىن جازعان بولاتىنبىز.
