فوتو: اشىق دەرەككوز
تەرگەۋ دەرەكتەرىنە سايكەس, ايىپتالۋشى سۇلتان سارسەماليەۆ ءوز ايەلىنىڭ تۋىستارىن – قايىن اتاسىن, قايىن ەنەسىن, سونداي-اق ايەلىنىڭ اعاسى مەن اپكەسىن ءولتىردى دەگەن كۇدىككە ىلىنگەن. ول سوت وتىرىندا قىلمىس جاساۋىنا ۇزاق جىلدار جالعاسقان وتباسىلىق جانجال سەبەپكەر بولعاندىعىن ايتتى.
«مەن سوڭىنا دەيىن وتباسىمدى ساقتاپ قالۋعا تىرىستىم. ايەلىممەن ون جىل بىرگە تۇردىق. ەگەر ارامىزدا سىيلاستىق پەن بايلانىس مۇلدە بولماعاندا, وسىنشا ۋاقىت بىرگە ءومىر سۇرمەس ەدىك. وسى ۋاقىت ىشىندە مەن وتباسىم ءۇشىن ەڭبەك ەتتىم, بالالارىمدى وسىرۋگە, ءۇيدىڭ جاعدايىن جاساۋعا بارىمدى سالدىم. الايدا ۋاقىت وتە كەلە وتباسىمىزعا سىرتتان ارالاسۋلار كوبەيدى. ايەلىمنىڭ تۋىستارى بالالار ارقىلى قوقان-لوقى جاساي باستادى», دەدى كۇدىكتى سوت وتىرىسىندا.
سونداي-اق ول اتا-ەنەسىن قاساقانا ولتىرگەنىن دە مويىنداپ, ءولىم جازاسىنا دا كەلىسەتىندىگىن جەتكىزدى.
«مەن بالالارىمدى اناسىنان دا, اكەسىنەن دە, تۋعان اجەسىنەن دە اجىراتقىم كەلگەن جوق. كەرىسىنشە, ولاردىڭ تولىققاندى وتباسىندا وسكەنىن قالادىم. بىراق سوڭعى ۋاقىتتا بارلىق كۇش-جىگەرىم تاۋسىلىپ, پسيحولوگيالىق تۇرعىدان قاتتى شارشادىم. سوندىقتان ماعان جاسالعان قىلمىستارعا قاساقانا قاستاندىقپەن جاۋاپ بەردىم. وسى جاساعان ارەكەتىم ءۇشىن بارلىق جازا تۇرىنە – ءومىر بويى باس بوستاندىعىنان ايىرۋعا دا, ءولىم جازاسىنا دا دايىنمىن», دەدى س.سارسەماليەۆ.
بۇعان دەيىن كۇدىكتى سۇلتان سارسەماليەۆتىڭ قىلمىستى ءبىر ۋاقىتتا ەمەس, كەزەڭ-كەزەڭىمەن جاساعانىن جازعان ەدىك. ءبىرىنشى وقيعا مامىر ايىندا تىركەلسە, قالعان ءۇش ادام قاراشا ايىندا قازا تاپقان. قىلمىستىڭ اۋىرلىعىنا بايلانىستى كۇدىكتى ءومىر بويى باس بوستاندىعىنان ايىرىلۋى مۇمكىن.
اتىراۋ وبلىسىنداعى وتباسىنىڭ ءولىمى: اقبايانعا قاتىستى قىلمىستىق قۋدالاۋ توقتاتىلدى
