سونداي-اق كونگو استاناسى كينشاسادا يتۋري پروۆينتسياسىنان ورالعان ءبىر ادامنان ۆيرۋس انىقتالعان.
ددۇ دەرەگىنشە, بۇل – 1976 جىلى العاش انىقتالعاننان بەرى تىركەلىپ وتىرعان ەبولا ىندەتىنىڭ 17-ءشى ءورشۋى. مامانداردىڭ ايتۋىنشا, قازىرگى جاعداي بۇدان دا كەڭ تارالۋى مۇمكىن, سەبەبى العاشقى تەست ناتيجەلەرىندە وڭ كورسەتكىشتەر كوپ جانە كۇدىكتى جاعدايلار سانى ءوسىپ كەلەدى.
ۇيىمنىڭ دەرەگىنشە, كونگونىڭ يتۋري پروۆينتسياسىندا 88 كۇدىكتى ءولىم جاعدايى تىركەلىپ, 8 جاعداي زەرتحانادا راستالعان. سونداي-اق 246 كۇدىكتى جاعداي بار. ىندەت بۋنيا قالاسى مەن مونگۆالۋ, رۆامپارا سياقتى التىن وندىرەتىن ايماقتارعا دا تاراعان.
بۇل ىندەت «توتەنشە جاعداي» دەپ باعالانىپ وتىر. سەبەبى ەبولا-بۋنديبۋگيو ۆيرۋسىنا قارسى بەكىتىلگەن ءدارى دە, ۆاكتسينا دا جوق. بۇعان دەيىن تىركەلگەن ەبولا جاعدايلارىنىڭ باسىم بولىگى ەبولا-زاير شتاممىنان بولعان.
ددۇ ناۋقاستاردى دەرەۋ وقشاۋلاۋدى, ولارمەن بايلانىستا بولعان ادامداردى كۇن سايىن باقىلاۋدى, ەل ىشىندەگى قوزعالىستى شەكتەۋدى جانە حالىقارالىق ساپارلاردى 21 كۇندىك ينكۋباتسيالىق كەزەڭ اياقتالعانعا دەيىن توقتاتۋدى ۇسىندى.
سونىمەن قاتار ۇيىم كونگو مەن ۋگانداعا ارنايى توتەنشە جاعداي ورتالىقتارىن قۇرىپ, ىندەتتى باقىلاۋ مەن الدىن الۋ شارالارىن كۇشەيتۋدى تاپسىردى. باسقا ەلدەرگە دە شەكارالىق باقىلاۋدى كۇشەيتىپ, ىشكى جولداردا تەكسەرىستەر جۇرگىزۋ ۇسىنىلدى.
ددۇ اتاپ وتكەندەي, ۆيرۋسپەن بايلانىستا بولعان نەمەسە اۋرۋ جۇقتىرعان ادامدار مەديتسينالىق ەۆاكۋاتسيادان باسقا جاعدايدا حالىقارالىق ساپارعا شىقپاۋعا ءتيىس.
مامانداردىڭ مالىمدەۋىنشە, ەبولا قىزباسى حانتاۆيرۋسقا قاراعاندا الدەقايدا قاۋىپتى جانە ونىڭ تارالۋ قاۋپى جوعارى. حانتاۆيرۋس كوبىنە كەمىرگىشتەردەن ادامعا جۇعىپ, ادامنان ادامعا بەرىلمەيدى. ال ەبولا ۆيرۋسى بيولوگيالىق سۇيىقتىقتار ارقىلى ادامنان ادامعا وڭاي تارالادى, بۇل ىندەت وشاقتارىنىڭ كەڭەيۋىنە جول اشادى.
ەسكە سالايىق, فرانتسيانىڭ بوردو پورتىندا Ambition كەمەسىندە بولعان جاعدايعا بايلانىستى 1700-دەن استام ادام كارانتينگە الىندى.
