بيىل 20 قازان مەن 19 قاراشا ارالىعىندا وبلىس اۋماعىندا تابيعاتتى قورعاۋ زاڭناماسىن بۇزۋدى انىقتاۋ جانە جولىن كەسۋگە باعىتتالعان «براكونەر» رەسپۋبليكالىق جەدەل-الدىن الۋ ءىس-شاراسى وتۋدە.
شقو پوليتسەيلەرى 3 قاراشادا التاي اۋدانىنىڭ 45 جاستاعى تۇرعىنىن انىقتادى. ول تۇرسۇعىن اۋىلىنىڭ ماڭىنان ايۋ ۇستاعان. ونىڭ ەتىن ءوزى پايدالانىپ, ال تەرىسىن ودان ءارى ساتۋعا نيەتتەنگەن.
ءتارتىپ ساقشىلارى اتالعان ازاماتتى ۇستادى.
«اتالعان فاكتى بويىنشا قر قك-ءنىڭ 337-بابى (زاڭسىز اڭ اۋلاۋ) بويىنشا سوتقا دەيىنگى تەرگەۋ باستالدى, قازىرگى ۋاقىتتا كەلتىرىلگەن شىعىن سوماسى انىقتالۋدا. وسى باپتىڭ سانكتسياسىمەن ءۇش جىلعا دەيىنگى مەرزىمگە باس بوستاندىعىنان ايىرۋ كوزدەلگەن», دەدى پد باستىعى ساعات ماديەۆ.
جەدەل الدىن الۋ ءىس-شاراسى باستالعاننان بەرى بارلىعى 200-دەن استام رەيدتىك ءىس-شارالار وتكىزىلدى, وندا 420 تابيعات قورعاۋ زاڭناماسىن بۇزۋشىلىق, ونىڭ ىشىندە 276-ى اڭ اۋلاۋ قاعيدالارىن بۇزعانى ءۇشىن انىقتالدى. سونىمەن قاتار بەس براكونەر انىقتالىپ, ولارعا قاتىستى قىلمىستىق ءىس قوزعالدى.
