فرانتسيادان شىققان ايگىلى سۋرەتشى جورج براك 1908 جىلدان باستاپ ءوزىنىڭ يمپرەسسيونيزمگە دەگەن قۇمارلىعىنان جانە فاۋيستىك ستيلدەگى كەيىنگى جۇمىستارىنان ءۇزىلدى-كەسىلدى باس تارتتى. نەگە دەيسىز عوي!؟ ونىڭ كوڭىلى ەۋروپا ونەرىنىڭ باسىم تەندەنتسيالارىن كورسەتەتىن رەۆوليۋتسيالىق كۋبيزمگە اۋدى. ەڭ عاجابى, ول وسى ستيلدە ءوزىن تاپتى.
اسپان تۇستەس تەڭىزدىڭ تاكاپپار مىنەزى جان كوزەسىن شايقايدى. ۇيىتقىعان جەلمەن ارپالىسقان اقجال تولقىندار جاعاعا بارىپ جان تاپسىرادى. بوياۋلار جالعان ءومىردىڭ جارشىسىنداي بۋىرقانادى. كوزدىڭ ءمولدىر تامشىسىنداي ەزىلەدى. بۇل – موماقان مارسەلدەگى ەجەلگى ەستاك جاعالاۋى. جو-جوق, جاي جاعالاۋ ەمەس, سۋرەتشى بىتكەننىڭ سۇيىكتى مەكەنى.
سۋرەتشى ج.براك تەڭىزگە قىلقالامىن مالىپ, تاعدىر كورىنىستەرىن تاسپالاۋعا قۇشتار. ول وسى بەيساۋ تىنىشتىقتان بەيمالىم ءلاززات الاتىنداي الدەبىر ءان ىرعاعىنا بوي جازادى. كۋبيزم يدەيالارىنان ءنار الا وتىرىپ, جان تولعانىسىن جەتكىزەدى. سودان دا بولار, تابيعات پەيزاجدارى مەن قالا تاقىرىبىنا كەلگەندە ءوزىن قۇستاي ەركىن سەزىنەدى.
كارتينادا شەبەردىڭ كەڭىستىك گەومەترياسىن قالاي قىزىقتاعانى جانە الداعى پەرسپەكتيۆالاردىڭ قۇرىلىسىن مۇقيات زەرتتەگەنى انىق بايقالادى. اۆتور ءۇيدىڭ ءاربىر كەسكىنى ءۇشىن تەكشە ءپىشىندى باستى دەتال رەتىندە پايدالاندى. سۋىق تۇستەردىڭ ماتاسۋ ءادىسىن قولدانا وتىرىپ, ب ۇلىڭعىر ويلاردان قاشۋعا تىرىستى.
قۇم رەڭكتى, ءۇش بۇرىشتى الاسا عيماراتتار جارىقتى شەبەر ويناتۋدىڭ ناتيجەسىندە كەنەپ بەتىندە تەگىس كورىنەدى. كارتينانىڭ جوعارى بۇرىشىنداعى اعاش بۇتاقتارى مەن جاپىراقتار گەومەتريالىق يلليۋستراتسيا تۇزگەن. قىزىعى, ولار كومپوزيتسيالىق ورتالىقتا جيناقتالعان جانە سۋرەتتىڭ شەكاراسىنان تىس كەڭىستىكپەن ۇيلەسەدى.
قىلقالام شەبەرى ەستاك جاعالاۋىندا وتكەن جازعا ارناپ كۋبيزم ستيلىندە التى سەريالى كارتينا جازادى. الايدا بۇل شىعارمالاردى وقىرمان بىردەن قابىلداعان جوق. سۋرەتشى مۇنى ەسكەرىپ, تۋىندىلارىن جەكە كورمەسىنىڭ العاشقى سورەسىنە جايعاستىردى. ونداعى ماقسات – كەسكىندەمەنىڭ جاڭا ۇلگىسىنە كورەرمەندى بەيىمدەۋ. ياكي اۆتورلىق شەشىمدەردى راديكالدى تۇردە قابىلدانۋعا دايىنداۋ.
«ەستاكتاعى ءۇي» كارتيناسى – كۋبيزمنىڭ دامۋىندا جانە ونى باسقا باعىتتاعى سىنشىلار مەن سۋرەتشىلەردىڭ مويىنداۋىندا ماڭىزدى ءرول اتقارعان تۋىندى. سونىسىمەن ايگىلى.
