تىزىمگە ەنگىزىلگەن ماماندىققا يە شەتەلدىك جوعارى بىلىكتى كادرلارعا ەلىمىزدە تۇراقتى تۇرۋعا رۇقسات الۋ مۇمكىندىگى بەرىلەدى. بۇل تەتىك باسىم باعىتتارعا قاجەتتى مامانداردى تارتۋدى كوزدەيدى. ەڭبەك جانە حالىقتى الەۋمەتتىك قورعاۋ مينيسترلىگىنىڭ اقپاراتتىق جۇيەلەرىندەگى دەرەكتەرگە سايكەس, بيىل دا بىرقاتار ماماندىققا كادر تاپشىلىعى ساقتالىپ وتىر.
ماسەلەن, Enbek.kz پورتالىنىڭ مالىمەتىنشە, «اكۋشەر-گينەكولوگ» ماماندىعىنىڭ 469 بوس جۇمىس ورنىنا نەبارى 100 تۇيىندەمە جىبەرىلگەن. «پەدياتر» ماماندىعىندا 448 شتات بوس, وعان 139 تۇيىندەمە تۇسكەن. «انەستەزيولوگ-رەانيماتولوگتىڭ» 300 بوس ورنىنا 75 تۇيىندەمە عانا تىركەلگەن. سونىمەن قاتار ونكولوگ, نەوناتولوگ, ەندوكرينولوگ ماماندارىنا دا سۇرانىس جوعارى.
اقپاراتتىق تەحنولوگيالار سالاسىنداعى ماماندارعا دا قاجەتتىلىك ارتىپ كەلەدى. اتاپ ايتقاندا, قولدانبالى باعدارلاماشىلار (509 بوس جۇمىس ورنى), گرافيكالىق ديزاينەرلەر (355 بوس جۇمىس ورنى) سۇرانىسقا يە. ەڭبەك شارتتارىن ەسەپكە الۋدىڭ بىرىڭعاي جۇيەسىنىڭ دەرەكتەرىنە سايكەس, سۇرانىسقا يە ماماندىق يەلەرىمەن 45 مىڭنان استام ەڭبەك شارتى جاسالعان. ونىڭ ىشىندە باعدارلامالىق قامتاماسىز ەتۋ ازىرلەۋشىلەرى شامامەن 8 مىڭ, اكۋشەر-گينەكولوگتەر – 4,6 مىڭ, پەدياترلار –
4,1 مىڭ, قولدانبالى باعدارلاماشى-لار – 3,5 مىڭ ادام ەڭبەك شارتىمەن جۇمىسقا ورنالاسقان. سونىمەن قاتار شەتەلدىك جۇمىسكەرلەرمەن 55 ەڭبەك شارتى راسىمدەلگەن. ولاردىڭ باسىم بولىگى «اۆتوماتتاندىرۋ ينجەنەرى» ماماندىعىنا تيەسىلى.
بىلتىر Enbek.kz پورتالىندا سۇرانىسقا يە ماماندار قاجەت دەپ 9 مىڭنان استام بوس جۇمىس ورنى جاريالاندى. دەرەكتەر ىشكى ەڭبەك نارىعى سۇرانىسقا يە ماماندىقتاردىڭ باسىم بولىگى جونىندەگى قاجەتتىلىكتى قامتاماسىز ەتىپ وتىرعانىن كورسەتەدى. دەگەنمەن, مەديتسينا ماماندارى تۇراقتى تۇردە جوعارى سۇرانىسقا يە, سالادا كادر تاپشىلىعى ءالى دە وزەكتى.
